Ya tyapula Okrismesa kuyele

0
152

ONIIPA – Ehangano lyoClouds Trading Enterprises olya shambula aavu moshipangelo Onandjokwe, sho lyeya longekidhile oshituthi shaKrismesa kuyele Etitano lyayi moshipangelo moka.

Aavu mboka taya mono epango no yeli metonatelo lyaapangi, unene mboka taya vulu okwiinyenga nokweenda oya gongala pehala limwe noku tyapula oshituthi shawo. Oshituthi shaKrismesa shika oshali sha longekidhilwa aavu ayehe aanona naakuluntu.
Omukuluntuwiliki gwehangano Claudia Mbura okwa ti ehangano lyawo nenge eshona, olya thaneka opo li kale tali longekidhile aavu moshipangelo Onandjokwe oshituthi shoKrismesa, omumvo kehe yo ya nyanyukilwe pamwe.

“Ohashi kala oshidhigu unene komuntu eli moombete, no ita vulu okuka tyapula oKrismesa pamwe naakwanezimo lye molwaashoka ota mono epango, shika otwe shi ningi owina opo aavu yetu ya tseye noku mona kutya otuna oshimpwiyu na yo,” Mbura ta ti.

Mbura okwa tsikile ati shino oye shi ningi wo opo ya gandje sha moshigwana shoka hashi ya yambidhidha. Ta gwedhapo kutya elalakano lyawo okugandja wo ombili yokomwenyo kaavu, yo ya tseye kutya Clouds Trading oku ya na komutima.
Omukuluntu gUuministeli wUundjolowele nonkalo nawa moshitopolwa shaShikoto Peter Angala na ye okwa li poshituthi shika, opo a tyapule oKrismesa pamwe naavu moshitopolwa she. Angala okwa pandula ehangano ndika sho tali longo nokugwanithapo iilonga yalyo mbyoka li inekelelwa koshigwana.

“Ohashi pupaleke onkalo yomuntu unene ngele eli moombete oku tsuwa omukumo, osho wo okulongekidhilwa oshituthi ngaashika. Otatu pandula ehangano ndika omolweitulemo lyalyo miilonga, ehangano olya kala hali longekidhile aavu moshipangelo shika oshituthi shoKrismesa konyala omumvo kehe no tatu pandula kwaashika,” Angala ta ti.

Angala okwa kumike nokutsa omukumo aavu ya dhiginine epango lyawo, yo ya tseye kutya uuna ya dhiginina epango lyawo otaya kala ya lalekwamo moombete mbala, yo yaye komagumbo ya ka kale naapambele yawo.

Okwa ti aavu oya pumbwa oku ningwa nawa moonkalamwenyo dhawo, noya pumbwa woo etonatelo ewaanawa. Yamwe yomaavu mboka yali ya holoka koshituthi shawo oya li ya nyanyukwa noonkondo, taya pandula aasamalia aanamutimahenda mboka yena oshigwana komutima.

LEAVE A REPLY

Please enter your comment!
Please enter your name here