Efiku loufemba womunhu mongula Namibia okuli ngaho momulandu?

0
146

Efiku lomongula, 10 Deseba, 2016, otali ka ninga odula onhi 26 okudja efiku omo efiku loufemba womunhu la danenwe oshikando shotete moNamibia. Kakele koufemba womunhu, mefiku omo ohatu dimbuluka yoo nokufimaneka oufemba womukainhu omuNamibia, kolelela kefiku 10 Deseba 1959 omo Kakurukaze Mungunda, a tomekele oshihauto shopolifi nokudipawa pefimbo lolwoodi pokati kopolifi yepangelo lokatongotongo novakwashiwana.

Eshi nee oshiwana tashi tjapula nokudimbuluka efiku loufemba womunhu mounyuni nolomukainhu omuNamibia, otwa pumbwa okutala komafindano a hangwa, naapo pa limwa onghudu nokutala kutya openi naanaa pa pumbwa elunduluko nepukululo.
Namibia okuna eeveta neeprograma odo da tulwa po nelalakano okuamena nokungushupaleka oufemba womunhu. Noshiwana oshina okutala kutya kakele kepangelo, keshe omukalimo moNamibia okuna tuu efimaneko loufemba womukainhu noloufemba womunhu pauyadi?

Ohatu li ufa tuu komilandu odo da tulwa po nelalakano oku kaleka po oufemba womunhu? Ile pamwe omilandu odo odi li ashike pamishangwa ndele kadi na elityo lasha?

Ngee owa tale koufemba womukainhu, epangelo laNamibia ola tula po oveta oku fya oshisho kutya ovakainhu ova kalelwa po ngee opa politika, opamahupilo, palongo ile opamalelo omahangano ngee oyaa opapangelo naa ehe fi opapangelo. Hano noshitya osho shi hole okulongifwa Namibia okuna oku li ufa koZebra (ongolo) style.

Pa politika, oshinima eshi otashi longo, unene tuu ngee owa tale pomalelo eedoolopa omo mu mahapu muna omuvalu wovalumenhu novakainhu ufike pamwe. Nomopaliamente yaNamibia, ovakainhu ovena mo oipundi ihapu, unene tuu mongudu yoSwapo, nomolwaasho Namibia okuli umwe womoilongo yomounyuni ili komesho momuvalu wovakainhu tava lele.

Melongo okaana kokakadona okaNamibia inaka tongolwa, noshilongo kashina oveta tai tongola ounona sheli kwatelela koukashike koo okanhu.

Ashike nande ongaha, omahangano opapangelo naao ehefi opapangelo okwa pumbwa okudula ko eenghaku opo ku fiwe oshisho kutya ovakainhu navo yoo ova pewa omhito va lele pauyuuki nopambili no inava tulwa koshiyelekifo ile va ningwa oshihakanwa kokatalekonawa kopaukashike kookanhu.

Shaashi, omahangano aa luhapu ohaa ningi eshi taakufa onghatu imwe okuyuka komesho, oo otaa kufa vali mbali taa shuna monima. Sha hala kutya luhapu omukainhu ngee a pewa oshipundi, ohaku ningwa naanaa ngaashi tashi dulika opo eshi kufululwe.

Oiholelwa oihapu, TransNamib, Namibia Training Authority (NTA) naAir Namibia ovo vamwe vomoiholelwa oyo, oko ovakainhu vali va pewa oipundi ashike nomutumba ina va kala, voo ove i kufwa nale. Oshinima eshi hanga shi ningwe koNamibia Wildlife Resorts (NWR) oko omunani wehangano olo Zelda Hengari a li a ta popilwa eendaka. Eshi osha faafana ashike naasho tashi li nyenge nena ko Namibia Students Financial Assistance Fund (NSFAF) oko oshipundi shelelo lomukainhu shili moshiponga.

Heeno shili pamwe ovakainhu ohave li humbata nai momalelo, ashike omolwashike ihava popilwa sha shihe li pamulandu omanga inava ninga ovanambelewa ovakulunhu voiputudilo yonhumba? Otwa hala okutya ovakainhu aveshe tava lele omahangano unene tuu oo a nyama papangelo ove hole oku dengela odi peisho? Omolwashike ovalumenhu luhapu have efwa va lele nombili no ina va piyaanekwa? Ovalumenhu moNamibia otava valulwa va tewa tewa moilonga ile va tulwa pedu omolwa omalihumbato mai. Otashi dulika fye onga oshiwana, nghee twa kwatelwe kodino nokeitavelo kutya omukainhu ita dulu kulela ina shi tu dja vali, nohatu kendabala ngaashi hatu dulu opo tu ulike kutya ovakainhu havo naanaa vokulela.

Nge owa tale momaumbo, omukainhu omuNamibia onghee ngaho tali ta pi. Oibofa yovakainhu va dipawa ile va monifwa oiponga kovalumenhu, ngee ovovo va tala ko onga ovaholike vavo ile ovalumenhu ashike onghee ngaho ta i twikile.

Ashike eshi itashi ti omulumenhu omuNamibia ye onghalamwenyo yaye kai li moshiponga, shaashi opena ashike oibofa ihapu omo ovalumenhu va lopotwa tava hepekwa kovakainhu.

Osho tashi ulike kutya eemwenyo dovalumenhu nado ina di amenwa.
Kakele komahepeko opaukashike koo okanhu, Namibia okuli yoo oshilongo, omo oikoya inene nene ili omhinge noufemba womunhu ta ningilwa. Oshibofa osho tashi li nyenge mongaha momhangulilo yaMangestalata waNdangwa omo omukwashiwana waDRC Pedro Marcelino Moussongela vati a landifa ounona ouNamibia koUnited Kingdom. Hano oshiningwanima eshi osho shimwe tashi dulu okutulifa Namibia pedu ngeenge oshe ya kondjudo youfemba womunhu.

Hano eshi hatu tyapula efiku loufemba womunhu mounyuni oshikando oshi 26 otwa pumbwa okutala koihopaenenwa oyo tai li nyenge fye tu tungile ko, tu nghonopaleke nokuyukililifa opo sha pumbiwa.

LEAVE A REPLY

Please enter your comment!
Please enter your name here