Longitheni uuministeli womauyelele

0
160

EENHANA – Minista gOmauyelele, Omakwatathano nIikwateknika Tjekero Tweya okwa kumike aakwashigwana ya longithe oombelewa dhuuministeli we ndhoka dha andjaganekwa oshilongo ashihe.

Ekumiko ndika okweli ningi pethimbo a egulula pambelewa oombelewa dhuuministeli we Etitano lya ziko pEenhana moshitopolwa shaHangwena.

Tweya okwa ti uuministeli we owuna oshinakugwanithwa oshinene oku andjagakaneka uuyelele moshigwana, noku yelithila aakwashigwana shoka ya pumbwa okutseya.

“Ondu uvite etumba oku egulula yimwe yomoombelewa dhuuministeli wandje, otuli muuyuni muna ongushu yonkalamwenyo nomahupilo neyambulepo lyeliko, ndjoka yi ikwatelela keindjipalo neyandjaneko lyomauyelele,” Tweya ta ti.

Etungo ndyoka Tweya a egulula okwa holola kutya olina iilongitho ayihe yopauteknika, na otali vulu okulongithwa woo ku kehe ngoka a pumbwa uuyelele moka.

Omuna ngaashi ostudio moka aahikingalo noongundu dhomalwiimbo taya vulu oku kwatelamo omaimbilo noongalo niinyandomwa yawo, otamu adhika ongulumambo ndjono tayi longithwa okukonga omauyelele, nomambo ngoka taga adhika mongulumambo ogeli pethimbo.

Minista ta kumagidha aakalimo yomomudhingoloko nopuushinda ya longithe omayakulo gombelewa ndjoka uuna ye ga pumbwa, yo ya kwashilipaleke kutya ombelewa oyo shigwana, yo naya lopote ngoka itaa gandja eyakulo ewanawa opo a katukilwe onkatu.

Ta gwedhapo kutya Uuministeli womauyelele nomakwatathano gopaungomba owa tunga no ta wu tsikile okutunga noku kwashilipaleka kutya omandiki gaakwashigwana oga tungwa miikandjohogololo ayihe moshilongo.

Omandiki ngaka mOhangwena otaga adhika pEndola nopOkongo, Tweya ta ti otaya lalakanene okugwanithapo oondjodhi dhuuministeli moku tunga omahala ngaka.

Omunambelewa omukuluntu mombelewa ndjika Mestilde Shiningayamwe okwa kwashilipaleke Minista naayehe yali ya gongala peegululo lyombelewa ndjoka kutya aaniilonga yuuministeli mboka mEenhana, oyi ilongekidha okuyakula ngaashi sha tegelelwa ye shi ninge.

Okwa ti nonande pena oowili dhiilonga, yo ohaya longo ethimbo kehe oshoka oya hala oku adha shoka taya lalakanene. “Otatu tsikile nokugandja omayakulo ngaashi hatu ga gandja shito nonda hala woo kutya otuna elongelokumwe pamwe naaniilonga ooyakwetu, onkene kehe ngoka wa pumbwa uuyelele kehe talelapo oombelewa dhetu otwe mu taambako amuhe,” Shiningayamwe ta uvaneke.

Shiningayamwe ta gwedhapo kutya moombelewa ndhoka omuna aaniilonga konyala ye vule pomulongo noyi ilongekidha okufala omayakulo koshigwana, ta ti ohaya talelepo omikunda dhi ili nodhi ili moshitopolwa shaHangwena noku ulika uuvidio, nomathano woo.

LEAVE A REPLY

Please enter your comment!
Please enter your name here