Ovanadolongo moLüderitz va dimbuluka efiku loAIDS

0
181

Lüderitz – Ovanadolongo moLüderitz ova dimbuluka efiku loAIDS mounyuni omafiku aa. Edimbuluko loAIDS ola ningilwa modolongo yomoshilando omo Etitano la dja ko.

Oshiindingili oshali meni lodolongo, omo ovanadolongo, ovanambelewa oshoyo ovaleli vo modoolopa ya Lüderitz vali va ongala noku dimbuluka pamwe efiku la tya ngaha.

Omunambelewa woundjolowele okudilila koshihakulilo shepangelo mo Lüderitz, Josep Kandjimi, okwa fatulula noku ulika nghene sha fimana, opo omunhu a dule oku longifa ongumi, moku li amena ngee tai momilele.

Kandjimi okwa tumbula kutya oshiponga shongumi tai topa ngee ovanhu veli melongifo layo, oha shi etwa komukalo u he li mondjila oo wa longifwa mokudjala ongumi.

Ovanadolongo ova dana oshinyandwa, osho ta shi ulike nghene omunhu eli kepango lomiti do ARV, ndele omunhaudu oo iha diinine okunwa omiti daye efiku keshe, nopefimbo, osho nokuli pashinyandwa , omunaudu oo she mu twala fiyo omefyo, shaashi eshi aka tutumbilwa koshihakulilo, ovakwaita vaye volutu ovahangika vaya pedu neenghono, naashi a fika koshihakulilo , ekwafo olo a pewa inali pondoka, noku xulifa.

Omukwafeli kulunhu modolongo yomo Lüderitz Assistant Commissioner Michael Swartz moku tambulako ovaleli vodoolopa ovo kwali vaka dimbuluka pamwe efiku, okwa tumbula kutya osha fimana neenghono, opo omafiku ngaashi eli loku dimbuluka omukifi wo AIDS mounyuni, a kale yoo haa dimbulukiwa nomeedolongo, osheshi ovo veli modolongo ngee va mangululwa ovena oku shuna moshiwana.
Ongudulwiimbo yovanadolongo oyali ya mwenyeka efiku olo nomaimbilo. Omunadolongo umwe okwa teva okatevo oko taka tangumuna kutya omukifi wo AIDS ouna okulwifwa, nouna okuteka ekipa lombuda opo uha tandavele vali, nokudipaaya ovakwashiwana.

Kansela woshi-kandjohoololwa sha !Nami#nus Jan Scholtz, moku popifa ovanadolongo mefiku ledimbuluko lo AIDS okwa tumbula nghene sha fimana opo ovanhu velikonaakonife kombinga yomukifi wo HIV/ADIS, va shiive opo vafikama.

Ta ti oshiwa omunhu u shiive opo wa fikama, ngeenge owa konaakonwa ndele to monika kutya kuna ombuto, shikale oshinakuwanifwa shoye opo ombuto oyo iheku kwate nande, naau nee to konaakonwa ndele to monika kutya ouna ombuto, shikale oshinakuwanifwa shoye , opo ombuto oyo uhe itandavelife, ove utameke epango diva noku lidiinina, nokuli ufa komalombwelo aeshe oo to pewa kovanambelewa voundjolowele.

Scholtz okwa tumbula kutya oshiwana ashishe osha pumbwa okulimanga kumwe mokulwifa omukifi wo HIV/AIDS.
Ta tumbula kutya shimwe osho tashi tandaveleke ombuto yo HIV/AIDS osho elongifo nai lomalodu, oshoyo okuya momilele komapupi manini.

Ta ti mefiku lokudimbuluka omukifi wo AIDS mounyuni, oshiwana oshina yoo okupandula keenghedabala odo da hangika po mokulwifa omukifi ou.

LEAVE A REPLY

Please enter your comment!
Please enter your name here