Nadilu a hala moNamibia mu kale efiku lomailikano

0
155

Lüderitz – Omunamido 47 Wilhelmina Nadilu, okuna eindilo opo kukale efiku lomailikano odula keshe moshilongo ashishe.
Nadilu okwa lombwele Kundana ta ti, moshilongo omuna oiningwanima ihapu ya pumbwa oku ilikanenwa. Moku tumbulapo imwe, omuna oiponga yomahauto tai twaalele eemwenyo dovanhu vahapu, omuna omalimangeleko, oingangamifi nayo omo ili moshilongo, nelongifo nai lomalodu, ovanhu otava hepekafana, nomakwato keenghono, omikifi ngaashi oo wo Kankera, AIDS, ondjala moshilongo, odula ya kala itai loko, naikwao ihapu.

“Omudo 2014 muMaalisa okwali kuna efiku lomailikano oshilongo ashishe. Ovanhu tava ilikana oshihomo. Eembaa domalodu odali dapata efiku olo, ndele ovanhu tavai keengolo. Efiku olali lapola, efiku olali liwa neenghono. Oshili ovaleli vetu ihava longekida vali efiku loludi latya ngaha, oshilongo ashishe, loo likale hali kalako odula keshe?Nadilu ta indile.

“Ame itai ti ngeno ovanhu ina va ya koilonga, efiku olo lomailikano, omafaneko ange ngeno eembaa odo ashike tadi pate efiku olo, ovanhu tavai koilonga, lwopo kati komutenya pee, ngaashi ngoo sha ningilwe kokapale ka Sam Nujoma ko Katutura, ovo veli koshilando pangelo tavai ngoo oko, oshiwana tashi limwenene oule wee vili donhumba, pamwe Tate Kalunga ote tu udu ngoo!” Nadilu osho a tumbula.

Ta twikile noku popya kutya ovanhu navafimaneke Kalunga, momailikano, omunhu ngee to indile uhe li indilile ashike ove mwene neumbo loye, ndele wu indilile yoo oshilongo shoye.

Nadilu okwa tumbula kutya ovanhu ovo hava longifa omalodu sha pitilila, nava lundulule, ndele tave li tula mo moilonga unene tuu oilonga yokomake, opo oshilongo shi dule okuyambukapo.

Nadilu omunailonga mofaablika ya Seaflower mo Lüderitz, nomafimbo oo a fuda po itaa ka longa kofaablika, oha kala ta landifa oushike pengeyo vae modoolopa.

Ota ti omutumba ihau eta sha, ovanhu nava nyangadale, opo vadule oku mona omungome wefiku keshe.

LEAVE A REPLY

Please enter your comment!
Please enter your name here