Okuza kokuhanga otombo nokuninga omundohotola……Onkalamwenyo yaDr. Queen Mwahangelai Namundjebo

0
993

Ongwediva- Okwa za megumbo lya halakana, eenda moluhepo olulu, a kala hazi mondunda inaa yi silwa oshimpwiyu nokwa mona omunona ena uulema ngoka iidhimbikwa kuhe. Ihe nando ongawo omashongo ngaka ina ga sinda, Queen Elizabeth Mwahangelai Namundjebo ngoka a sindana nokuninga gumwe mokati kaakiintu mboka ya adha onkatu yUundohotola moNamibia.

Sho a hokololele oshifo shehulilo shiwike shaNew Era, Namundjebo ina vula okuthitikininamo omahodhi ge. Naamboka ye ende pamwe naye oya mwena thilu ya pulakena sho ta hokolola olweendo lwe ye ta lili.

Ndika ehokololo lyomukadhona omugundjuka ngoka a li a thiminikwa konkalo okudhunga otombo noku landitha uukuki kosikola opo yaandjawo ya vule okuhupa.Ndika ehokololo lyomukadhona omushona ngoka a nyolele Kalunga oombilive ta kongo ewiliko lye osho wo emu kwathele moompumbwe dhe. Ngashingeyi ye omukiintu uudha eitaalo no ke nine nando omuntu iikonene. Omunankatu yuuNdohotola ko Univesiti ya Eastern Michigan, Namundjebo oye oshiholelwa oshiwanawa kaavali oomeme taya tekula omaluvalo gawo oyo ayeke moshilongo na ishewe ye omukumiki gwaantu mboka ye li moluhepo.

Oku dhimbulukwa uunona we
Namundjebo ota hokolola ondjokonona ye pethimbo lyoomwedhi hamano.Kombinga ya he okuna aamwahe 50 na oye onkelo yaamwayina kombinga ya yina, ya valwa ye li yatano.

Aakuluntu ye oye mu gandja po a ka tekulwe kumbushe meekulu Queen Namundjebo omukalimo gomOngwediva.Oku gandja po omunona komukwanezimo omuthigululwakalo gOshiwambo.

Manga eli pu meekulu Namundjebo, okwa tameke osikola pOkandjengedhi Primary School mOngwediva, ihe okwa ka shuna kegumbo lyaakuluntu ye ko Haiyandja omanga eli mondondo 7, komukunda ngoka okwa kalako oomvula mbali.

Manga eli poHaiyandja, aakuluntu ye oya li ya topoka, naashika osha thiminike yina a thigepo egumbo lyawo nomusamane gwe nokwa ka kala megumbo lyondunda yimwe noyana yaali osho wo aatekulu yaali.

Pethimbo ndyoka ye okwa li mondondo 10 pOngha Senior Secondary School. Nonando okwa li a taalelwa komashongo ngaka ye okwa piti iilongwa ye nawa.Okwa ka tsikila nokupita oondondo 11 no 12 koPonhofi Senior Secondary School.

Moku dhimbulukwa uupyakadhi moka a piti manga yeli na yina, Namundjebo okwa ti ye naamwayina oya kwathele yina okudhunga otombo noku landitha uukuki kosikola opo ya vule okwiipalutha.Oya li yena Aasamaria aanamutimahenda mboka ye ya futile osikola osho wo ye ya landele oohema dhosikola. Yina ngoka a li ehole egalikano okwa li ena okulandithapo omahangu ge gamwe opo eya gwanithile po oompumbwe dha wo dhesiku kehe.

“Otwa futilwa osikola kaayeni[kaantu kaa ye shi aakwetu].Otandi dhimbulukwa omulongi gwandje goShiingilisa sho ndali mondondo 7 twali hatu mu ithana mee Kateacher Shipundi ngoka a futile ndje osikola.Mondondo 10, kandali ndina omuzalo goskola osho wo ngoka ta futile ndje osikola. Memegona , meme Ester Mukete, okwa pendje omuzalo omukulu gosikola ye ta futile ndje wo osikola”

“Omumwamemati omukuluntu mumeme okwa tameke okuhinga ombesa ya tatekulu, ye omukwawo okwa li a tameke iilonga ko Rosh Pinah omukwawo ishewe okwa ningi omuhingi gwotaxi. Mbaka oyo ya kuthako oshinakugwanithwa shoku futila ndje osikola manga ndili moondondo 11 no 12.Oye tu futile tse nomumwamemekadhona.

Nando okwa li a hala oku ilongela oompango, mumwayinamati okwe mu itaalitha opo iilonge elongo moUnam. Okwa mono onkatu yelongo omumvo 2007” osho a ti.

Konima yokulonga ashike omumvo gumwe noomwedhi omugoyi ongo omulongisikola , okwa shuna koUnama sho oUnivesiti ye mu pe iimaliwa yeilongo opo a gwedheko onkatu yuuMaster mElongo kombinga yokulesha nokwiilonga. Osha li pethimbo ndyoka sho a mono ompito yoku ki ilonga onkatu ontiyali yomaster koUnivesiti ya Eastern Michigan USA niimaliwa yokwi ilongitha yoFulbright .
“Onda kala hoka okuza 2011 sigo 2013, nonda piti niitsa yopombanda mokulonga Oshiingilisa kaapopi yomalaka galwe.Sho nda galukile kegumbo ondi ishangitha oku ilonga onkatu yuundohotola mbala mbala mo 2013,” osho a fatulula.

Konima yoku ishangitha mo 2013 Namundjebo okwa gandja iipumbiwa ayihe mwa kwatelwa nomathaneko gaashoka a hala okupekapeka nomomumvo 2015 okwa gandja omushangwa gwe guundohotola.Ngaashi shito ye okwa sindi omashongo agehe mondjila yoku ninga ondohotola.Ngashingeyi oha longo moUnam nokwa tegelela oku pewa onkatu yuundohotola momasiku 3 Apilili 2017.

“Ihe ayihe oya lunduluka na ohandi ithanwa nale ondohotola, shoka sha thigalako osho owala okuzalekwa ondjatha, ondi shi uvitile nawa….” osho a ti.

Momukokomoko guunona wawo he kalipo. Ndele okwa galukila moonkalamwenyo dhawo ngashingeyi. Noshipala sha Namundjebo ohashi yadhima uuna ta popi kombinga ya he.

“Ondi hole tate unene.Tate oye tate kaakunawe muuyuni . Oshoka okwa ulike oku uva nayi kwe kwaashoka a ninga.”osho a ti.
Aakuluntu ye mboka inaa ya hengathana pambelewa oya dhiminathanapo , nonando oya topoka uukuume wawo itawu pewathanwa.
Omunona ena uulema

Omanga ti ilongo poUnam, mo2005 Namundjebo okwa mono omunona gomumati, Prince HaitangeOmwene Namundjebo. Omupya omunene nguka okwa monika ena uuvu woonerve hau ithanwa (CP) mbuka ohawu holoka pethimbo omunona omushona nenge mepipi lyuunona. CP oha gumu iilyo nomainyengo golutu osho wo ngoka goontumba dholutu no taga kala itaaga longo nawa. Nando moompito dhimwe aanona mboka ye na uuvu mbuka wo CP oya gumwa pamadhiladhilo, Prince Namundjebo ngoka ha ende ashike mokatemba okuli nawa pamadhiladhilo.Omolwonkalo yomwanamati ye okwa li a ethapo manga ootundi dhe mounivesiti.
“Omumati a kotoka” osho a ti ye ti imemeha.

Eshongo ndyoka a li a tsakaneke kombinga ya, Prince oondika kutya he ye okwa ti ye kena naye.
“Ina tsakanena na he sigo oompaka.Sho nde mu dhengele oku mu lombwela kutya onda mona omunona omumati , okwa ti owala kashishi uupyakadhi we, onkene nandi ungaunge nuupyakadhi wandje.Shika oshinima shomuntu ta ekelehi omunona ena uulema no ina hala oku kwatathana naye.Ofamili ye oya tameke oku konga Prince mo 2014 sho a gwanitha omimvo omugoyi” osho a gwedhapo.
He ya Prince ngoka ti ilongo ngashingeyi ko Russia okwi ile po omumvo gwayi.

“Okwa dhengele ndje ongodhi a hala okumona omwanamati ndele onde mu lombwele kutya kandi shi ngele omumwandje mati okwa li iilongekidha oku mu mona.Okwe ya uusiku, onkene kungame oshinima ashike shomuntu ngoka inee ya shili okumona omwanamati ndele okwa hala okuya a mone ndje.Na ishewe ngiika molwashoka ngame onda huma nawa komeho no nda adha esindano na ohandi longo moUnam, ndika olyo etompelo sho mbaka opo taya holoka ngashingeyi.Ngele andola onda li ashike omuntu ndafa aantu yalwe , yo andola ina ye ya ko kungame nomumwandje,” osho a ti.

Prince ye mwene okwe shi popi shuukilila kutya ka li natango iilongekidha okutsakaneka he gwopanyama.
Namundjebo okwa ti ookuume ke yaalumentu ohaya kwathele.

“Ondina kuume kandje a shewa gwedhina Mathew Nambahu ngoka ha fala Prince okuya noku za kosikola he mu sile oshimpwiyu nokwe mu taamba omwanamati. Ondina wo omunonakadhona gwoomwedhi hamano nahe yaanguka oha kwathele lela,” osho a ti ye ti iyolitha.

Prince okwa mona iihuna omolwuulema we. Namundjebo okwe mu thigile momuhandjo sho a yile kosikola koUSA naasho a galuka okwe mu adha a lemana unene okuyeleka naasho emu thigilepo.

“Sho nda tseya omulandu gwelongo lyetu , kali noompito dhoku yakula aanona mboka ya pumbwa eyambidhidho lya shewa. Anuwa okwa li ashike ha tulwa mokakolonela, ta gu ko kokatemba ke no kapena ngoka te mu yambulapo sigo uuna osikola ya pitimo. Aanona yalwe otaye mu tile omeya noku mu lundila kutya okwi isitamena, ye omulongi te mu dhenge. Oya li shili ya hepeka omumwandje” osho a ti. Aalongi nomusilishimpwiyu gomumati ngoka a li thigilwa oshinakugwanithwa posikola oya li wo ya longele kumwe naanona mboka ye mu hepeke.

Sho a galuka keilongo lye oosikola dhimwe mo Windhoek odha tindi oku taamba Prince omoluulema we. Okwa li ena oku mu longa megumbo ndele konima osikola yopaumwene ya Sunshine Private School oye mu taamba. Pethimbo ndyoka Namundjebo ye mwene okwa li omulongi po NUST nomwiilongo goPhD. Nena Prince omunamimvo 11 uudha ombili noku li mondondo 3 posikola Liberty Primary School.

Namundjebo okwa ti omwanamati oye awike omunona ena uulema posikola yawo, molwashoka aanona yamwe aanuulema oya holekwa opo kaaya monike koshigwana.

“Esiku kehe to undula okatemba komumoye naantu otaye ku tala nomeho gokatale ko nawa. Oku tala hoka taku ku etele omaiyuvo gaa li nawa ngoye nomumoye. Nuuna wu na omunona ena uulema aantu ohaye ku tala wafa wa thingwa” osho a gwedhapo.
Namundjebo okwa ti oonkondo dhe dhopambepo noonkondo nomukumo gomwana omunuulema oyo iinima mbyoka ye mu hingi opo a sindane mu ashihe shoka a tsakaneke.

“Ngame omuntu ngoka ihaa kala noku endulula omashongo ngoka ga taalela ndje monkalamwenyo.Ohandi ga tala ongo iilongwa.Nomumwandjemati oye etompelo sho nda longo nuudhiginini ngeyi. Kena he ngoka eli po monkalamwenyo ye nongele ando onda kalele ashike omulongisikola ngaashi aalongisikola ooyakwetu ando inandi vula okumufutila epango ndyoka ha mono ngashingeyi”osho a fatulula.

Aavali aagundjuka mboka taya iyadha monkalo ngaashi ndjika yoye oto ya lombwele shike ?
Namundjebo okwa ti mboka yeli moluhepo naya longithe onkalo yawo ongo ongudhi yoonkondo netompelo kutya omolwashike yena okulonga nuudhiginini.

Okwa gwedhapo a ti okwaapo kweyambidhidho osho wo aavali yaalumentu mboka yandopa osho etompelo ndyoka hali thiminike aavali aagundjuka ya ekelehi oyana nenge ya kuthemo omapunda.Oshigwana wo ohashi pangula nayi aakiintu mboka ya vala aanona yena uulema. “Etompelo sho aanona haya ekelwahi omolwashoka oohe kayepo naashika osho eshongo enene sho oshigwana otashi ku pangula mbala unene tuu ngele omumoye okwa ningi oshilema ngaashi omumwandje. Ofamili yoye otayi luku wo omumoye omadhina ga yooloka ngoka omunona ta vulu oku uva. Ngele kupo kapena nando olye ta sile omunona ngoka oshimpwiyu. Aantu ashike aashona mboka taya vulu unene tuu mboka yu uviteko.,”osho a ti.

“Ngele iho galikana nena onkalamwenyo yoye yopambepo ka yi li pombanda unene na oto taalele omaupyakadhi, ihe ngele owa kundathana naKalunga nena onkalamwenyo yoye otayi lunduluka.Owuna okukala neitaalo, wa kola, owu na oku kumikwa opo wu pite monkalamwenyo unene tuu aavali yaakiintu taya putudha oyana oyo ayeke.Oya pumbwa oku ithikamena yoyene”

“Oya pumbwa okugalikana olundji noku popya naantu mboka ye ya lile po, oshoka haantu ayehe ye ku lile po monkalamwenyo.Aantu yamwe oye li po ashike okuku teya po omanga yamwe oyo aapopi mokule” osho a gwedhapo. Okwa ti wo sho aakiintu haya ningi iihakanwa yehepeko omolwashoka konima yomulumentu ngoka okuna omukiintu gulwe oye ta tsitsimike omahepeko ngoka.
“Eeno omulumentu oye eku ningi nayi ndele tse aakiintu otse hatu kolitha aalumentu opo ya hepeke aakiintu yalwe. Aalumentu oya fa uunona ngele omukiintu monkalamwenyo ye ina kotoka ota kala noku kambadhala ngaashi tashi vulika okukala nomulumentu ye itaa taambako aanona ye” osho a gwedhako.

queen-namundjebo queen-namundjebo-2

 

LEAVE A REPLY

Please enter your comment!
Please enter your name here