Elelo lyaNdonga lya talele po Amutuni lyOmanenge

0
121

KuMaria Namupala

NAMUTONI- Uuministeli wOmidhingoloko nOmatalelopo melongelokumwe nElelo lyaNdonga oya thaneka okuyambulapo ehala mpoka pwa ningililwe iita yokuAmutuni momvo 1904.

Ethaneko ndika olya tseyithwa noku kolekwa pethimbo lyetalelo po lyowina ndyoka lya li lya longekidhwa kElelo lyAndonga oshiwike shayi.

Osheendo shika osha li sha kwatelwa komeho kaawiliki melelo lyOndonga she ende wo pamwe naanambelewa yalwe miikondo yepangelo.

Olweendo olwa tamekele pUuwa pOnamungundo, nelalakano olyo ku tala mpoka pwali iita, ya hingilwe kaakwiita yOmukwaniilwa Nehale LyaMpingana mokuhomona Aandowishi omumvo 1904, ngashingeyi pwa pita omimvo 113 lwaampoka.

Aakwiita ya Nehale LyaMpingana nando ya sindana molugodhi nduka oya li wo ya kanithilemo aakwiita yawo oyendji. Elalakano lyosheendo shuuwa olyali okutala ehala ndyoka opo li yambulwepo.

Omupevi minista gwOmidhingoloko nOmatalelopo Tommy Nambahu naye okwa li oshitopolwa sholweendo nduka, nopethimbo a popitha osheendo shoka okwa pandula elelo lyopamuthigululwakalo sho lya mono sho opala opo li yambulepo ehala ndyoka.
Nambahu ta ti omathaneko ogeli miilonga, no tashi kwathele uuministeli mboka wu yambulepo omahala ngoka ga pumbwa okuyambulwa po moshilongo, a gwedha po kutya pehala mpoka opwa pumbwa ondhimbulutho, opo ndjika yi hile aatalelipo.

Oshiningwanima shiita yokuAmutuni osha ningilwe momasiku 28 Januali 1904, nOlyomakaya ndjoka aantu oya li ya gongala noku dhimbulukwa, yo mboka yali yaashi ehala ndyoka taya tseya mpoka lili.

Pandjokonona polugodhi ndoka opwali aakwiita yomukwaniilwa Nehale 500 mboka ya kuthile ombinga, moku ponokela Aandowishi noondjembo dhomapakolwa,oondhimbo oshowo uutati.

Oondjayi dhiita mbika ongaashi Amupanda gwa Shiponeni, Namupala gwaAmoomo, Shivute sha Ndjongolo nayalwe.
Nambahu okwa ti shino otashi kala ondhimbulutho kaaNamibia ayehe, teya indile ya kale haya talelepo ehala ndyoka oshoka olyopandjokonona. “Otwa pumbwa okuyambulapo ehala ndyoka moka wo tamu kala iihongwathano tayi ulike oohedhi nomithigululwakalo nomukalo omwaanawa goonkalamwenyo dhetu,” ta uvaneke ngaaka.

A ti uuministeli wOmidhingoloko nOmatalelopo owi itaala kutya shoka otashi yambulapo nokugwedha kongushu yomatalelopo nokunana aatalelipo ya za kondje nomeni lyoshilongo, ya tale nokwiilonga oshindji kombinga yondjokonona nomithigululwakalo dhomoshilongo.

Okwa pula aaNamibia ayehe ya gwedheko kongushu yondjokonona, yo aaholi yondjokonona ya gwedheko keyambulepo lyehala ndyoka, nokukwashilipaleka kutya oondjokonona ngaa ndjika otadhi kwatha mokuyambulapo oshilongo , sho shi ye nawa komeho.

LEAVE A REPLY

Please enter your comment!
Please enter your name here