Ino pa Januali ombedi

0
58

Omudo nomudo oto hange ovanhu tave li popile vati eshi vehe na oshimaliwa petameko lodula, ile eshi veli meendjo omolwa Januali.
Hano Januali okwa ningwa okatevo kaava hava lande keshe shimwe kehafo naava vehe shi okuningila komongula.
Omwedi Januali oko twe u hanga fye oko hatu u fii.

Sha hala kutya alushe odula oi na etameko yo alushe oi na okuxula. Januali ihe tu li vakele nande nande. Ashike ngeenge otu shi kutya Deseba oo ha kala ena oivilo yeehango yafa ili kepaya, nomahafo a nakupwe oteya, omolwa shike mbela iha tu pungula momukokomoko wodula aishe twa ningila Januali oo alushe ha liwa oshipungo kuDeseba?
Efimbo oku talulula omukalo nghene hatu longifa oimaliwa yetu onena. Hano omanga tuli mu Febuluali 2017, natu tameke nale oku dilaadila Januali 2018.

Eshi hatu popi ngaha, otu shishi nale kutya mu Januali 2018 ounona ove na oku ya keefikola; omidjalo dofikola, omambo neefikola odina oku futwa, voo nounona ohava i noubaki kofikola.

Kakele ka Januali otushishi nale kutya mee famili detu ile dopopepi nafye omuna oku kala ovanhu tava hombolwa, oKrismesa nomudo mupe opo nale ili, moo muDesemba ngaashi naanaa sha kala omo ngoo hamu kala eefya dihapu mu dule eemwedi dikwao.
Molwaasho Januali otu shisheni nale kutya oko a kala, natu kale hatu mu lilongekidile oule wodula aishe.

Oshinima eshi sha fimana oku tota po okambo komavalulo ombaanga nghee weka tota owe ka nunina Januali.
Nande owe ka luku Januali opo keshe komwedi u kale ho umbile ko sha, ye eshi Januali teke ya oto mu li humbatele ashike ngaashi eemwedi dikwao.

Oshinima oshitivali, ngee uli mu Desemba ita shiti oimaliwa yoye i kuwila onghuwo. Ita shiti kala to lande kwafa kuhe na mongula, aye.

Heeno shili omunhu oho kala ngaho wa hafa eshi wa fika pexulilo lomudo ashike ope na omikalo dihapu to dulu okuulika ehafo nokupandula, diheshi oku danena oimaliwa yoye we i longela noudjuu.

Nokuli ope na ovanhu vamwe omunhu nghee eli, oule aushe wodula ina nwa omalodu, ndee muDeseba oha ningi ongholwe. Vamwe Deseba ngee eya meefitola omu hava lande shito nokulyata mo iha va lyata mo vali, tava i kwaadinya domakenge, shaashi vamwe muDeseba omo hava mono obonus koilonga.

Vamwe nokuli ohava shendje ookaume. Ava va kala hava ende navo mokati kodula, otave va henuka opo vaka tyapule nawa noovakwao ovo veshi okutyapula Deseba, shaashi ove wete vakwao ovo hava ende navo shito va nyika oulai. Tava dimbwa kutya Januali ovatakumi nokuli otava ti Januworry opo teya ndee tava kala veli xwina.

Okupopya nee peha na omashendjo, oshiwana shetu shovaAfrica otwa pumbwa oku diladilulula, noku yapo nomukalo mupe nomadilaadilo mape ngeenge tashi ya kelongifo loshimaliwa. Paku shendja ngaha, ohatu uya po yoo vali nomufyuululwakalo mupe oo tau longo oshiwana shokomongula nghene shina oku longifa oshimaliwa.

Paife ngaha Januworry keshi vali omukalondjikilile ashike okwa ninga omufyuululwakalo. Omufyuululwakalo oo omwii neenghono, notwa pumbwa okuu hanauna po, opo oshiwana shetu shokomongula shi tameke epandja lipe li he fi la Januworry, ye January a kale January ile Januali ngaashi naana a nuninwa.

LEAVE A REPLY

Please enter your comment!
Please enter your name here