‘Mitiri Katangolo omunelandulathano, omunahole’

0
163

KuAlvine Kapitako

Windhoek- Omukuluntusikola a longa ethimbo ele poprimasikola ya Mandume moVenduka nakusa, ‘Mitiri’ Juuso Panduleni Katangolo ngoka a manene oondjenda dhe Omaandaha oshiwike shika okwa popiwa a li omuholi gwelandulatho ena ohole, ngoka onkalo ye ya gumu unene oshitopolwa shelongo osho wo oshigwana she.

Katangolo okwa mana oondjenda mepipi lyomimvo 79 moshipangelo shaWindhoek. Okwa longo ongomukuluntusikola poprimasikola yaMandume moKatutura okuza mo 1969 sigo 1992. Okwa valelwa mIihongo moshikandjohogololo Onyaanya momasiku 10 Maalitsa 1937.

“Aalongwa oyendji mboka yasikola pOmandume oyendji aawiliki aanamadhina nena.Mbaka ongaashi David Nuyoma ngoka eli omukuluntupitithi gwoGIPF, na yalwe oyendji,” osho Omundohotola Raimo Naanda, ngoka eli omupevi amushanga omukuluntu mUuministeli Welongo lyOpombanda . Katangolo, ngoka oshigwana hashi mu ithana ‘Mitiri’ nenge omulongi, okwa li wo a tseyika ongo kathinana ye ishewe kehe shimwe ota vulu okushininga nokwa li omuningi.

“Okwa longo kehe shimwe moshigwana kutya nee oshinakugwanithwa shoka oshe nenge kashishi she.Ngele pehala lyontumba opwa li pwa pumbwa omusita, nena ye ota kutha ko oshinakugwanithwa shoka nenge ngele opwa pumbwa omutaleli natango moshinakugwanithwa shoka okwa opalelamo,” Linda Shivute osho a hokololele Kundana.

Shivute, ngoka a longwa kunakusa Katangolo, okuli omulongisikola ngashingeyi posikola ndjoka. Okwa ti Katangolo okwa lalakanene aluhe okulonga aalongwa ye omikalo omiwanawa nokwe shi ningi aluhe neitulemo nopwaana omashendjo. “Okwa li ha imbileko aalongwa posikola pethimbo lyowandaha kehe na okwa li ha toto omaimbilo ge mwene.Oshiwike kehe okwa li a toto eimbilo epe. Ondi inekela kutya ngiika omaimbilo ngoka oga pungulwa pehala lyontumba.Kutya okuli moshipundi shevululuko nenge ahawe okwa li aluhe a zala omutsuhu gwe/oshuta ye,” Shivute osho a gwedha po.

Katangolo okwa li wo a tseyika nedhina ‘Kandishi KwiiPemba’ oshilukadhina eshi pewa omolweimbilo ndyoka a toto tali kumike aalongwa ya kale haya opaleke omayulu gawo gaa kale gena omanino, osho Naanda na Shivute ya fatulula.

Okwa li ha tala nawa aalongwa ngele oyo opaleka nawa omayulu gawo naamboka ya adhika nomayulu gena omanino ohaya ulikwa ongoshiholelwa shaamboka aahethi. Etumwalaka olya li kala wa “yogoka ethimbo alihe”.

Katangolo okwa longwa moAugustineum College mOkahandja pamwe naaleli aanamadhina ngaashi Omupresidente Hage Geingob, nakusa Hidipo Hamutenya, Ominista nale Yiikwapondje nOmupopi megumbo lyopashigwana Theo-Ben Gurirab, osho wo omuwiliki nale gwoDTA Katuutire Kaura.

Omumvo 1956, okwa li a longele ehangano nale lya SWANLA nenge pakuudha South West Africa Native Labour Association mOshaanda.

“Okwa tameke iilonga yeithano lyuulongi omumvo 1967 posikola yetumo nenge ya Missioni yaSt Barnabas molukanda Olukulu. Okwa li a longo pamwe noonakusa John ya Otto, Jason Mutumbulwa, Joseph Ithana, Theofelus Katjimune oshowo yalwe oyendji. Pethimbo sho aantu ya thiminikilwa koKatutura okuza kOlukanda olukulu, ye okwa lundululilwa koprimasikola Bethold Himumuine moKatutura,” omwanamati Andreas Katangolo a ti.

“Ongo omunamagano moku imba ye okwa li a tseyika nawa unene a tseyikila eimbilo lye ndyoka a tota noku imba “Jehova omusita gwandje muka,” Andreas osho a tsikileko.

“Aluhe okwa dhenge omuthindo kutya aanona naya kale ya yogoka no kena esiku a pitikile okuya kosikola kwatoka. Otwa kanitha shili ependa moshigwana. Okwa longa oshindji metungo nomedhikopo lyoshigwana,” Naanda a ti.

Mitiri Katangolo okwa thigako omukadhi, Ester, noyana yaheyali yomaanona omulongo.
Oshituthidhimbuluko she Onena megongalo lya Macedonia moKatutura nefumviko lye Olyomakaya pomawendo gopOld Location moHochland Park.

LEAVE A REPLY

Please enter your comment!
Please enter your name here