Nkene aahikingalo ya tyapula efudho

0
98

KuSabina Elago

Windhoek- Omutoolinkundana gwaKundana, Sabina Elago okwa kundathana naahikingalo yomoshilongo oku uva kutya oya tyapula ngiini ethimbo lyefudho ndyoka lya piti. Okwe ya pula wo kutya omathaneko geni yena omvo nguka.

Aahikingalo oya ti ethimbo lyefudho kuyo olyo ethimbo lyeipyakidhilo enene na ohali ya pe iilonga oyindji.
The Dogg okwa ti ethimbo ndika ye okwe li tyapula pamwe nofamili ihe nando ongaaka okwa li wo eshi pondola okulonga. “Desemba omwedhi gweipyakidhilo enene, ihe nando ongawo ngame itandi nyenyeta oshoka ohandi longele ofamili yandje” osho omunedhina mokwaito a ti.

KuGazza efudho lyapiti olyali ethimbo lyiilonga no ka pwa li nando uudhano. “Ihandi tyapula efudho nefamili lyandje, kashishi oshiwana ihe ndika olyo ethimbo handi kala niilonga oyindji” Gazza ngoka a li molweendo ethimbo ndyoka osho a ti.

“Kapwali ethimbo nando naashika oshidhigu kaanona, ndele nee ondina okuya longela opo ya kale nonkalamwenyo yili nawa” osho Gazza a ulike .Okwa ti aayambidhidhi ye oya tegelela oshindji okuza kuye nuumvo. Ihe The Dogg, ina tya sha kombinga yaashoka e ni ne aayambidhidhi ye nuumvo a ti shoka “oshiholekwa”.

Kombinga yomwiimbi gwoondjimbo dhopambepo D-Naff efudho olya li oshinamumwe kokutya iilonga nofamili. “Otwa li nolweendo lwomatalelopo nehangano lyokunyanyudha lya D-Naff moka twa li tatu landitha oalbuma mOutapi, Ondangwa, Ongwediva nEenhana pethimbo olyo tuu ndyoka ngame onde ende pamwe nofamili yandje moshilongo,” osho omunedhina moondjimbo dhopambepo a holola.

D-Naff okwa holola kutya molweendo nduka okwa koleke ekwatathano lye nawa nefamili lye molwashoka oya li ya nyanyukilwa pamwe mo ku inyanyudha mokuyoga osho wo mokukayila omapakapaka gomagulu gane mombuga.

Ehangano lyoondjimbo lyaD-Naff olya pititha oalbuma ne ndhoka a ti odha landithwa nawa pethimbo lyolweendo moshilongo. “Nuumvo otatu kiipyakidhila ashike nokuthaneka uuvideo womusika yetu nokulonga nkene tatu tseyitha oalbuma dhetu miilongo yilwe yAfrika.Nuumvo otatu ka taaguluka oongamba,” D-Naff a uvaneke.

Lize Ehlers okwa tyapula efudho lye pamwe naaholike ye poLangstrand. “Osha li ondjodhi. Okupulakena efuta omanga walala mombete to lesha embo ngoye to kotha ishewe,” osho a ti.

Efudho lye lyoKrismesa nOmumvo omupe olya li ethimbo lyeinyanyudho. A tuka nedhagadhaga inaali edhilwa, petokolamumvo osho wo a tuka nondhila konima yevalo lye mesiku lyOmumvo omupe.  “Osha li tashi nyanyudha okupewa omagano kookuume molupe lwokutuka medhagadhaga osho wo mondhila okuza komusamane gwandje omuholike.Omutima gwandje ogwa li tagu dhenge , yo ombinzi oya li tayi ende nonda li ndu uvite ndinomwenyo nonda pandula,” osho Lize a ti.

Aayambidhidhi ya Lize otaya tegelele oalbuma ye ontine. “Nomauliko ga The Song Night otaga ka thika sigo okomunkulofuta nopalwe wo. Onkene koneka ehala ndika nuumvo oshoka omvo nguka ogwiilonga iiwanawa” osho a tsikileko.

Musician-3 Musician-2

LEAVE A REPLY

Please enter your comment!
Please enter your name here