Okamati ka kwatwa koonkondo

0
112

KuMaria Namupala

ONDANGWA – Okanona kokamati koomvula 11 oka lopotwa ka longelwa omiyonena dhopaihulo komulumentu goomvula 20, mOsoondaha, sha ningilwa komukunda Omadhiya moshitopolwa Oshikoto.

Omukonakoni nomukwatakanithi mopolisi yoshilongo koshikondo shiimbuluma Edna Nawa, okwa ti omufekelwa ngoka okwa mangwapo esiku olyo tuu ndyoka a mangelwa komukunda Onakahama moshitopolwa tuu shoka.

Nawa ta ti oshiningwanima shika osha ningwa lopotundi onti 18h00, otaku hokololwa kutya omufekelwa okwaadha okamatyona hoka pedhiya, ta tameke okuka dhenga noshiti omanga inee ka kookololela moluhwa, noku ka longela omiyonena dhopaihulo.

Ayehe yaali oya za momukunda gumwe nomufekelwa oku shiwike nawa, okwa tegelelwa a kale a holoka mompangu ya mangestrata oshiwike shika.

Okwa lopotwa woo moshiningwanima shimwe uunona uyali wa longelwa omiyonena dhopaihulo koKhorixas. Uunona mbuka owuna oomvula 7 na kamwe okena oomvula hetatu, shika osha ningwa Etitano lyayi.

Omukonakoni nomukwatakanithi koshikondo shiimbuluma Omupevi Kommissiona moshitopolwa shoka Rudolf Kanyetu okwa yelitha kutya omufekelwa gomimvo 15 okwa ningile uumatyona mboka omatilitho nekatana.

Otaku hokololwa ewu kwata kiilyo yawo yopaumwene esiku ndyoka lwopotundi onti 13h00, Kanyetu ta ti iiningwanima mbika yuunona wuumati ta wu longelwa omiyonena dhopaihulo otayi lopotwa unene moshitopolwa shoka, ta ti oshinima shika oshina enwethemo ewinayi, no tashi yonopo aanona.

Ta kumagidha aavali ya longe aanona yawo momagumbo, yo yeya kumagidhe ya yande okulonga iilonga mbyoka tayi teyagula po oshigwana.

Kanyetu ta ti natango okwa lopotwa okanona kokamati koomvula 14, ka longelwa omuyonena gopamilalo kokakwawo moshitopolwa shoka. Moshiningwanima shika omufekelwa ina mangwapo nopolisi otayi tsikile nomakonakono.

LEAVE A REPLY

Please enter your comment!
Please enter your name here