Oshipangelo Omuthiya sha pewa ooambulance

0
77

KuMaria Namupala

OMUTHIYA – Oshipangelo shopashitopolwa Omuthiya moshitopolwa shaShikoto osha pewa ooambulansa mbali dhokufala aavu mboka ya mona iiponga yaka mone omayakulo kiipangelo yopopepi.

Ooambulansa ndhika odha gandjwa kUuministeli wUundjolowele nonkalonawa oshowo oshiketha shokukwatha mboka ya mona iiponga yomoondjila Motor Vehicle Accident Fund. Iiyenditho mbika oya gandjwa pambelewa kuNgoloneya goshitopolwa Oshikoto Henock Kankoshi.

Ngoloneya okwa ti elalakano okuthikitha aavu mboka ya mona iiponga kiipangelo yopopepi hoka taya ka mona omakwatho gopaunamiti, ta ti okuuvite etumba sho onkugo yoshitopolwa ya yamukulwa. Ooambulansa ndhika odha gwedha ku dhimwe ndhoka dha gandjelwe omumvo gwaziko koshipangelo shoka natango.

Ngoloneya Kankoshi ta ti epangelo niikondo yopaumwene otali longo iilonga yomupondo mokuyakula, nokugandja omayambidhidho moshigwana.

“Omolwa iiponga tayi indjipala mondjila ndjoka onene Uuministeli noMVA oya mono shoopala okugandja oombesa ndhoka dhi gandje omayakulo ngaashi sha pumbiwa.’ Kankoshi uulike.

Kankoshi okwa tsikile kutya oya tothamo ompumbwe yokunkondopaleka omayakulo gopaunamiti gomeendelelo kaantu mboka ya mona iiponga, noya pumbwa okukwathelwa mbala. Onkene oshikondo shIilonga yopaulumompumbwe oshiinekelelwa okugandja omayakulo gopetameko noku fala mboka ya mona iiponga komahala gokuyakulwa mbala hoka taya ka mona omakwatho guunamiti.
Omukuluntu guundjolowele moshitopolwa shaShikoto Peter Angala pethimbo ta taambako ooambulansa ndhoka mbali okwa ti, oshitopolwa shawo osha kala shina ompumbwe onene ashike ngaashingeyi ompumbwe ndjoka oya kandulwapo.

Angala oku ulike kutya ooambulansa ndhika odhina aaniilonga naayakuli oshowo aahingi yapyokoka molwashoka ayehe oya mona omadheulo gongushu,onkene omayakulo agehe otaga vulu okugandjwa pethimbo ndika.

Okwa pandula oshiketha sho MVA sho natango tashi tsikile okugandja omakwatho nomayambidhidho moshigwana. Okwa uvaneke kutya aaniilonga koshikondo shomeendelelo otaya ka gandja omayakulo ngoka ga pumbiwa moshigwana.

Okwa kumike aaniilonga mboka ya mona omadheulo ya yakule oshigwana ngaashi sha pumbiwa, yo ya longe neitulemo miilonga yawo.

Okwa uvaneke kutya ooambulansa otadhi ka longithwa nawa dho dhi kalekwepo, dhi vule okulongithwa omimvo odhindji.

Ambulance3 Ambulance2

LEAVE A REPLY

Please enter your comment!
Please enter your name here