Yatatu ya si moshiponga shohauto

0
125

KuMaria Namupala

OMUTHIYA – Opolisi moshitopolwa Oshikoto oya kumagidha aahingi ya simaneke oompango dhomoondjila, yo ishewe ya kale aluhe haya tala iiyenditho yawo nawa omanga inaa yaya momalweendo.

Omukwatakanithi moshikondo shokukondjitha iimbuluma mopolisi mOshikoto, Kommissiona gwopevi Naomi Katjirua okwa ti ngele aahingi oya vulika koompango dhomoondjila nena iiponga oyindji otayi vulu okuyandwa, ihe ngele aahingi itaya vulika koompango nena iiponga otayi kala nokutsikila.

Katjirua okwa ningi ekumagidho ndika konima sho opolisi moshitopolwa sha Oshikoto ya lopota aantu yatatu ya sila moshiponga shohauto Omaandaha ngaka, moshiponga shoka sha ningilwa mondjila pokati kaTsumeb noTsintsabis mondjila ya Tsumeb na Katwitwi.

Uuyelele wa gandjwa komukonakoni nomukwatakanithi koshikondo shoku kondjitha iimbuluma mopolisi Kommissiona gwopevi Katjirua okwa ti mosheenditho moka omwali aantu yatano mwa kwatelwa nomuhingi.

Omuhingi naafaalelwa yaali oya hupu moshiponga shika, noya falwa koshipangelo shaTsumeb hoka ya pangwa noya tumwa komagumbo.

Moshiningwanima oshikwawo opolisi mOnayena oya patulula epeko lyomakonakono nomapukululo omolwedhipago lyaashi lyoshiningilawina.

Omushangwa ngoka gwa pitithwa kuKommisiona gwopevi Katjirua ogwa yelitha kutya Timoteus Pinias gomimvo 78 okwa hulitha konima sho omuhingi gohauto moka ye ali omufaalelwa a kanitha okupangela osheenditho she, shoka sha gu kopate noku kandoma.
Oshiponga shika osha ningilwa mopate yongalama yaza kEpumbu yuuka kOshali moshitopolwa Oshikoto, otaku hokololwa ohauto ndjoka yi na onomola yaNdangwa.

Katjirua ta ti osheenditho shoka osha topa etayela, nomuhingi okwa nyengwa okushipangela.
Omuhingi okwali eehamekwa momutse nokwa pangwa moshipangelo mOnandjokwe, omanga aafaalelwa yalwe nayo oya falwa koshipangelo hoka noya mono epango lyopakathimbo.

Aakwanezimo oya tseyithilwa nale nopolisi otayi tsikile nomakonakono.
Okwa kumagidha aahingi unene mboka haya hingi koopate dhoongalama ya kale taya hingi ondapo ndjoka ya tulwapo, yo ya kwashilipaleke kutya omatayela giiyenditho yawo ogena uukolele, no taga vulu okweenda nawa koondjila ndhoka.

LEAVE A REPLY

Please enter your comment!
Please enter your name here