Aakwashigwana mOndonga otaya nyenyeta elelo lyopamuthigululwakalo

0
179

KuMaria Namupala

OLUKONDA – Aakwashigwana moshitunda shaNdonga oya holola enyenyeto lyawo omolwa elelo lyopamuthigululwakalo ndyoka.
Omasiku ga ziko oya nyola ombapila yomanyenyeto gawo noyeyi tumine kombelewa yoshilongo.

Konima sho ombelewa yoshilongo ya mono omushangwa ngoka, oyali ya longekidha oshigongi showina nosho meendelelo, ya pulakene momakana gaakwashigwana yoyene. Oshigongi shika osha ningilwa pomukwiyu gwiigongi pOnethindi mondjila ndjoka yuuka kOlukonda.

Oshigongi osha kwatelwa komeho kelenga enene moshikandjo shOndangwa John Walenga oshowo omalenga ga za kiikandjo ya yooloka. Walenga okwa yelithile aakwashigwana mboka yali ya holoka momwaalu omunene elalakano lyoshigongi.

“Omolwa ombaapila ndjoka elelo lya taamba okuza kaakwashigwana taya nyenyeta elelo lyopamuthigululwakalo, ombelewa yelelo oyetu tumu opo tuye tu uve notu pulakene mune, tse tatu ka thikitha omakemo nomadhiladhilo geni kombelewa yoshilongo, tse tu tale kutya otatu yamukula ngiini kiikumungu mbyoka,” Walenga ta ti.

Aakwashigwana oya li ya pewa oompito dha yooloka, noyendji otaya nyenyeta elelo lyopamuthigululwakalo, taya ti olyafa lili mevundakano omolwa iinima mbyoka tayi ningilwa aakwashigwana meholamo.

Yamwe yomaakwashigwana oya holola onkugo yawo oshowo eyeme, taya popi kutya otaya kuthwa omavi nomapya gawo shaa heli paveta, go taga landithwapo kiimaliwa oyindjiyindji yo ihaya monoko sha kiimaliwa mbyoka.

Aakalimo yamwe mOndonga otaya kugu sho puna okangundu ta keya kutha omavi nomapya gawo, nokangundu hoka ohaka ti oka tumwa kOmukwaniilwa, “Oshigwana otashi hepa, tashi thipwa ombinzi manga elelo lya talako, otatu kala tuli monkugo yina onkambe ngeyi sigo uunake otwa hala tu popilwe mbala manga iinima inaayi yonuka,” akwashigwana taya popi ngaaka.

Oya holola kutya omahala otaga langekwa shaali paveta mOndonga no kapena we uupandiinda oshowo omahala guulithilo, oyendji oya kuthwa omapya gawo nohaya adha momapya gawo mwa dhikwa oopaala yo inaaya tseyithilwa, shampa anuwa ya pula ooyene yoopala ohaya lombwelwa owala kutya anuwa oya landapo omapya ngoka.

Aakwashigwana oya li yena omapulo ogendji ngono ogendji inaaga yamukulwa, oyali ya pula kutya “ Aakombanda oyena uuthemba okulangeka, nongele osho, oyena okulangeka momikunda dhini, nongele taya langeke ohaya langeke koomiliona nenge komayovi,? Ngono ogo gamwe gomomapulo ya pula no yati oya hala ya yamukulwe mbala.

Oyati oya hala onkugo yawo yi yamukulwe mbala, noya pula elenga ene moshikandjo sha Nalusheshete li kale lya kuthwa miilonga mbala, omolwa iilonga mbyoka tali longo inaayi ukilako. Taya popi nongeyo kutya elelo nali ya yamukule mbala omanga inaaya katuka oonkatu dhilwe, sho oshilongo inashi ningina mefuta lyapindjala.

Nonande okuya pehulilo oshigongi sha ka kala shaali mombepo ombwaanawa, elenga enene Walenga okwa uvaneke kutya otaya ka thikitha omakemo ngoka gaakwashigwan kombelewa yelelo lyopamuthigululwakalo, go taga gwedha komishangwa ndhoka dhi liko nale. Okwa ti otaya kala ya gandja eyamukulo yo ya tale kutya moshikumungu shoka otaya yimo ngiini.

LEAVE A REPLY

Please enter your comment!
Please enter your name here