Bantu a tokola okulonga nuudhiginini nuumvo

0
102

KuPinehas Nakaziko

Windhoek – Omuhikingalo gwoongalo dhoAfropop a tseyika nawa nedhina lyo moongalo Bantu, oye gumwe gwomaahikingalo mboka yali ya landitha nawa iipandi yoongalo dhawo muDesemba, naJanuali.

Shika osha tseyithwa kehangano ndyoka hali landitha uuCD moshilando shaVenduka, lyo Antonio’s Art, sho lyali lya gandja omadhina gaahikingalo omulongo mboka ya landitha nawa oongalo dhawo.

Nedhina lye pakuudha Nepolo Asser, omvalele yomomukunda Oshivanda sha Nghatanga moshitopolwa shaMusati, oye omuhikingalo ngoka eli kohi yehangano lyo Number Buzzy, lili kohi yewiliko lyomuhikingalo Fishman.

Bantu okwa hokithwa okuiimba oongalo kaahikingalo aaSouth Africa ngaashi Zola 7, na M’du Masilela, nongeyi okwa tameke wo okuiimba nokuhika oongalo.

Okwa ti sho a holokele moongalo oomvula hamano dha piti, okwali iiluku edhina Bantu, omolwashoka ye omuimbi omuAfrica ngoka ena ohokwe nombili.

Omvula yaziko, Bantu okwa li a holoka noalbuma ye ‘’Tower of Babel” ndjoka ta ti okweyi luku edhina ndyoka nelalakano lyokusimaneka aatungi, naahumithi komeho yoshilongo shaNamibia.

Ngaashingeyi Bantu oti ilongekidhile oalbuma ye ontiyali, ndjoka a tengeneka yi ka pite mu Juni, moka tamu ka kala muna omaimbilo omawanawa ngaashi, Ombiibeli, Beautiful nEkaya.

Nuumvo Bantu okwa tokola a manamo, ye okwa hala oye a kale omuhikingalo dhingi moNamibia. “Ondjodhi  yandje onda hala ndi kale ongame omuhikingalo dhingi moshilongo, monakuyiwa naashika osha hololwa nale koalbuma yandje ndjoka opo ya pitile,” Bantu ta ti ngaaka.

Okwa kumike aaNamibia, unene tuu aagundjuka, ya ye komeho noku hika oongalo noondjimbo dhoshiNamibia opo dhi hume komeho.

Okwa ti omaimbilo ge otaga longo, go otaga tungu nota gopalele kehe epipi.
Bantu okuna ishewe iizalomwa ye mbyoka ha landitha kombiliha.

LEAVE A REPLY

Please enter your comment!
Please enter your name here