Elenga mUukwanambwa lya kuthwa miilonga

0
127

KuMaria Namupala

ONDANGWA- Elelo lyOndonga olya kutha miilonga elenga enene moshikandjo shUukwanambwa omusamane Wilbard Lidker.
Etokolo ndika olya thiki kelenga ndika pamushangwa ngoka lya nyolelwa momasiku 23 Januali nuumvo. Omushangwa nguka ogwa ulike noku koleka ekutho miilonga lye. Ekutho miilonga lyelenga enene olyeya konima sho lwopehulilo lyomumvo gwa ziko a lopotwa a ningi oonkambadhala dhokufikapo ondunda yakuume ke kopaihole gomofuthi, sha ningilwa pomukunda Omutse-gOnime moshikandjo osho tuu shoka. Lidker gumwe gomomalenga ngoka Omukwaniilwa Tatekulu Kauluma Immanuel Elifas a li inekele mokuwilika oshigwana, omushangwa ngoka ogwa thamuna kutya okwa konekwa elenga ndika li inekelelwa oshilonga shoku yakula aantu lya dhini oompango dhelelo lyoshilongo no lyayi pombambo shono shi li ompinge noompango dhelelo lyopamuthigululwakalo.

Otaku hokololwa kutya ekutho miilonga lyelenga ndika enene olyo etiyali, konima sho natango oomvula dha ziko elelo lya kuthile miilonga ngoka a li nale elenga enene moshikandjo Oniimwandi, Boas Mweendeleli omolwa omatompelo gontumba.

Elenga ndika olya tseyithilwa pakana ekutho lyalyo miilonga momasiku 16 Januali, nombaapila yekutho miilonga okwe yi tuminwa momasiku 23 Januali nuumvo nokwa kumagidhwa iikaleke kokule niilonga yelelo lyopamuthigululwakalo.
Amushanga gwelelo lyopamuthigululwakalo lyaNdonga Tatekulu Joseph Asino okwa koleke ekutho miilonga lyelenga ndika enene, ta ti ayihe oyili puuyelele no kapuna shimwe tashi vulu okuholekwa pethimbo ndika.

Asino okwa ti aakwashigwana oyendji moku uva oshiningwanima shika oya kala yu uvite nayi, naasho sha ka thika kelelo lyOndonga Omukwaniilwa okwa tokola opo Lidker a kuthwe miilonga, ye ti ikaleke kokule niilonga yelelo.

Ta gwedhapo kutya elelo lyOndonga otali ka eta ayihe puuyelele, lyo li gandje woo gamwe gomomatompelo ngoka ga kuthitha Lidker miilonga.

Tatekulu Asino ta ti oshinakugwanithwa shelelo lyolyene li kuthe miilonga nokugandja omageelo komalenga ngoka itaaga iyutha nenge itaaga longo shoka shi li mondjila. Lidker moonkundathana ndhoka twa ningi naye okwa yelitha kutya omahokololo ngoka ka gena uushili washa, no ita dhimbulukwa a ninga oonkambadhala a fikile omuntu mondunda.

Lidker okwa pingenepo ngoka ali nale elenga enene moshikandjo shoka Andreas Uukule konima sho a mana oondjenda mo 2010.

LEAVE A REPLY

Please enter your comment!
Please enter your name here