Luis Munana otaka ulika uunongo moLondon

0
67

KuPinehas Nakaziko

Windhoek – Omuendi omulumentu dhingi moshilongo, Luis Munana, okwa tegelelwa natango opo aka tule edhina lyoshilongo pomuthika gwopombanda omwedhi nguka.

Shika osha holoka sho Munana a li a hiwa opo aka ulike uunongo we moshilando London moUnited Kingdom (UK), pethimbo lyoshituthi shoshiwike shoku ulika oonguwo dhaalumentu shedhina London Fashion Week.

Oshituthi shika osha tengenekwa shika dhanwe momasiku 23 sigo 26 omwedhi nguka, pehala lyoStore Studios, 180 Strand lili mokati kaLondon.

Newi lyenyanyu, Munana okwa ti okuuvite uuntsa nuunambano, oku kala onga oye omuNamibia awike a hogololwa aka kuthe ombinga moshituthi shika. Okwa ti ndjika onkatu ombwaanawa kuye oshoka otashi ka humitha ohokwe yiilonga ye komeho, unene okuulika uunongo we komeho gengathithi lyaantu oyendji mboka oonkulungu ngele tashiya miizalomwa.

“Otandi ka mona ishewe ompito ombwaanawa  yokutsakanena naa-endi ooyakwetu, mpoka tatu ka tulilathanamo omayele gontumba, nokutseyathana,” Munana ta ti ngaaka.

Okwa gwedhapo ishewe ta ti ye natango otayi koshituthi shika opo eki ilonge kaalongekidhi yoshituthi shika opo a galuke ena uunongo owundji, awape okuhumitha oshituhti shoshiwike shoku ulika iizalomwa shaVenduka,  Windhoek Fashion Week, shoka a totelepo omvula yaziko, nonando kashali sha enda nawa ngaashi shali shatengenekelwa.

Okwa ti shika osho oshikando shotango, ta ka ulika uunongo we piilongo yopondje yenenevi ndika oshoka konyala oha ende ashike miilongo yaAfrica.

Oshituthi shika sho moLondon osha totwapo kehangano lyo British Fashion Council (BFC). Nuumvo aalongekidhi oyali ya tseyitha kutya oshituthi otashi ka kala shadhenga mbanda.

Luis Munana ngoka ta ka ulika uunongo we pondje yoshilongo.

LEAVE A REPLY

Please enter your comment!
Please enter your name here