Omutwe waMandume ouli peni?

0
137

Eedula 100 konima eshi ohamba Mandume yaNdemufayo ya fya, oiwana yaNamibia naAngola onghene ngaho tai pula kutya omutwe wependafule eli ouli naanaa peni hano?

Pa ndjokonona, ohamba Mandume Ndeulikufa yaNdemufayo okwa fya momafiku 6 Febuliali 1917, a fila poihole efimbo a li molwoodi eshi a ponokelwa kOmuputu nOmwiingilisha.

Nonande omambo amwe otaa ti ina shi yela naanaa ngee Ohamba Mandume oya dipawa ile oye li dipaa yoovene, ondjokonona yOvakwanyama otai ti ofimhu oye li kufa omwenyo yoovene, shaashi kaya li ya hala oku dipawa koindele.
Nokuli opena omatumbulo a shivika nawa oo vati ea tumbula omhanga ina fya eshi a ti
“Ojiheheya, yeengulu yeehama eso noupika shimue ashike”.

Ohaku tiwa nee omatumbulo oo okwe a popya omanga ine li yasha noshikuti shaxuuninwa osho shali kondjebo yaye.
Kashi na nee kutya efyo laMandume ola tya ngaheli pi; ouyelele wa yela oyoo kutya ohamba ei ya file okanaa kashona neenghono, oya pakelwe ihe na mutwe. Ehokololo la yandjwa ota li ulike kutya, ofimu oya hangelwe ihe na omutwe nofingo yayo oya li ya punyangelwa monailona.

Needula 100 konima yefyo layo onghee ngoo omapipi nomapipi taa pula kutya hano omutwe wayo ouli peni? Pamwe eli nali ninge efimbo lokukonga omutwe womukondjeli manguluko ou, oo inaa fimanekwa ashike komuhoko wOvakwanyama ile moNamibia amuke ashike okwa fimanekwa yoo moAngola, nomuAfrika alishe kouyadi.

Odula nodula onghene ngoo taku pulwa kutya omutwe waMandume yaNdemufayo ouli peni. Ashike eshi ohashi popiwa unene ngeenge sha yuka pomafiku edimbuluko lefyo laye, ashike konima epulo eli ola fa hali talala, nomapekaapeko okwa fa ihaa ningwa vali nelitulomo okuko konga omutwe wohamba.

Mbela ongahelipi ngeenge omapangelo laNamibia nAngola tave uya po nokakomitee taka hoololelwa owina okuninga omapekaapeko opo ku fikwe ketindi loshinima osho?

Eedula efele odi hapu, nongeenge epipi eli lili ko paife ita li kongo apa pe na omutwe waMandume, otashi dulika u kanenene.
OvaIngilisha nava tale mo nawa meeMuseum davo, nosho tuu Ovaputu nava konge mo meengulu davo deendjokonona.
Ile pamwe omapyo oo haku tiwa omutwe waMandume ouli pehalandjadja loumulunga oli lili mepandavanda laMandume Ndemufayo moWindhoek oloshili? Opena omapopyo oo taati omutwe wohamba Mandume owa pakwa pamwe novaEngilisha ovo va filile molwoodi lokOihole.

Ngeenge nee fiyo onena ina ku ningwa omapekaapeko opaunongononi opo ku monike kutya omahokololo oo ooshili, pamwe efimbo la wapala okushininga opaife.

Kakele koku konga omutwe wa Mandume, osho sha popiwa kuPresident Hage Geingob kutya Ohamba Mandume Ndeulikufa yaNdemufayo keshi ashike ependafule lomuhoko wOvakwanyama ashike okwa tali ka ko ongependafule olo la lwila emanguluko loshiwana ashishe osha pumbwa oku fimanekwa.

Opena vamwe ve udite kutya edimbuluko lefiku laMandume oshinima shopaukwamuhoko. Ashike ngaashi naanaa ependafule Hendrik Witbooi lafimanekwa koshiwana ashishe nola tulwa nokuli koshimaliwa shopashiwana, osho naanaa ohamba yokapekwa yaMelulo yooNdilokelwa Shime, nomapendafule ooSamuel Maharero, nooIipumbu yaTshilongo navakwao vahapu va tali ka ko. Ashike eshi ina shi udika ko pomunghulo, ita ku ti Mandume naye naye koshimaliwa, olo etokolo lepangelo, naava hava ungaunga noinima yoludi olo. Mandume opamwe nomapendafule makwao oo a kondjifa ovakolonyeki poita ashike yopetameko, ova fimanekwa moshilongo ashishe omo muna omapandaanda eva lukilwa nomoAngola omo yoo muna nokuli ouniversity (oshiputudilo shelongo shopombada) she mu lukilwa.

LEAVE A REPLY

Please enter your comment!
Please enter your name here