TUYENI KOLUPALE LA TUYENI: Woo, eenghali dohonda yange!

0
268

Hahahaha!!! Oiyolifa yali kOnangava popepi nOkalongo kaanave, omwa ti ndishi meenghali ihamu yolwa. Penya ovanhu ova tokokele omaxuli, nde naava vali va humbata oshikefa osho va tameke tava menyemo mokuhena nghene.

Ndishi fiyo onena moshiwana shetu shOvawambo opena ngoo ovanhu vamwe veheshi kutya ngeenge taku popiwa ohonda oshike, mutu have lipula ngoo kutya oshinima shafimana ilo mutu pamwe omunhu ngoo omufimanekwa umwe moshiwana a longele nande oilonga ya fimana ye tadipo ne taulwa ohonda, taa!  Oinyengandunge oko yali kOnangava oko.

Manga inaatu ya mehokololo pauyadi otwa pumbwa yo okuuda noku lihonga noku shiiva kutya nande omongula ngeenge taku popiwa ohonda oshike naanaa hano, ilo omunhu ngo wonhumba eli poima ndele umwe taimo ta ti okwali ohonda yange nale oo.

Omulumenhu keshe ilo omukainhu omanga ina hombola ilo ina hombolwa ohakala ena kaume kaye kopaihole, ashike eshi mwa pumbwa okudimbuluka osheshi kutya kaume kaye ou kopaihole itashi ti osheshi ashike hava ka nangala naye, otava dulu yo okukala hava shakene nonande ha moikumbafa tava popi oinima yopaihole, ou oye ne haku ti ohonda yange.

Ohonda yange nee ei, oolyelye va pumbwa okuishiiva nokukala veimona nomesho, ilo ndei va lombwela hano kutya paife onda mona po ngoo oshihonda shange pomukunda wetu apa?

Aayee, momishuululwanghedi detu dOvawambo ohonda yoye oove ashike wa pumbwa okukala wiishi ilo hamu shakene nayo onye amuke muli poima ponhumba, nye tamu tulako ne omahokololo eni opaihole oo anyama kouhonda ngaho.

Ouwa washike haukala mouhonda, na owii washike hau shakeniwa nao mouhonda natango hano? Mouhonda mwoovene kamuna naana ouwa washa, osheshi nonande owafiye po ounyuni ou wafya hano, peenghali doye ihapa kala nande noipopiwa yohonda yoye, ilo ngoo taku ti omhito paife tai shikulako oyo honda yaye, efimbo limwe ohonda yoye keenghali doye otashishiva ikale inayuuyako, ilo ngo yiye ndele oili ngo mokati kovanhu omo yeliholeka ngaashi ngo kwali hamu ningi nayo amushe.

Ohaidulu tuu okukanangalela omutata eenghali dohonda yange? Ahowe shoovene oshapuka, osheshi oto dulu okuya keenghali oko uka nangaleko ndele toka shakenekako ovanhu tave ke kupula omapulo weehashi okwaa nyamukula, ove uka tye ngoo oto ningwa nai, nefimbo limwe ne eshi todi meumbo lambuleni tolekele ovakulunhu voye oto ti otoi peni oshili vakwetu?

Ohaidulu tuu okulombwela ovakulunhu vange meumbo. Haiti mOlomakaya odina ohonda yange tai ya okutalelange po? Aayee natango oshapuka osheshi ohonda yoye ovakulunhu voye otavei yuufana tava ti ombudi ikweni, onghene oushakeneno okomaluxwa ngoo oku mweli mona fiku mwatulapo oihole yomoluxwa.

Paife ngeenge ohonda yange ondaudu yafya oshafimana ngo ovakulunhu vange va monenge handikwena mokule? Ahowe natango oshapuka osheshi ovakulunhu voye otave ke kupula omapulo kutya oto kwena shike, nongeenge ito nyamukula otava ka tya oto xunu, ngeenge owa hala okukwena ohonda yoye inda moluxwa omu ngoo kwali hamu shakene, ashike ino monika kovanhu ne tokwena.
Ngeenge ne ondai kongeleka Oshoondaxa ohai dulu tuu okukakala omutumba pamwe tuli koshipundi shimwe ashike nohonda yange? Ahowe natango oshapuka osheshi oinima oyo hamu ningi nohonda yoye oyo, oyo paumbudi na kai shivike kovakulunhu voye nokovakwaneongalo aveshe, momaongalo amwe nokuli oto dulu okuningilwa omapulapulo koshinyanga ove ukondwemo ngo meongalo, molwaashi owa hala okulya ouxuku inaava pepwa ngaho.

Natango ngeenge ohonda yange oyakwatelwa meembete moshipangelo hano, ohaidulu tu okukeikalela nokukeiningila okatete keshe fiku ongula? Aayee opo watulwa ne nomodolongo nokuli, osheshi ngeenge oye kuxulifile manga nee muli moshipangelo, naashi ne to ka popya eenghali oto ti olye afya na oto ke di popya peni? Hano oinima aishe ei twadja nokutumbula pombada, oshili oya eta pouyelele kutya kaume koye oo oye eli ohonda yoye hano, oshili pauxupi okutya ei oshondolo ikweni ashike mwa shakena koshana, ndele hado ne toka hokololela ovanhu ilo ovakulunhu keumbo leni, oto dulu okuyolwa ndele tofi noshikukutila.

Paife pwilikina ne oupyakadi noilengifa ei ya holokele kOnangava omukunda uli popepi nOkalongo, kuinya okwa dile ovanhu tava vele pomitima kokuyola nonande oshili oshinima oshali eefya domunhu a xulifa.

Taa!! Ovakriste okakadona aka ka kala ka shivika nawa meongalo lavo nokwa kala ka kwatele olwiimbo lovanyasha komesho mongeleka yavo oinima osho ne kei tile omeva takwena ohonda yako pomaendo opOnangava.

Ndeumono ya Hedimbi okwa kwenene ohonda yaye Hamukwaya ya Kalyati, ndele nomwenyo tau hale okupwamo ndele ovakwanedimo vaye novohonda yaye vamwe tava hale okuliiteekapo pomaendo omanga ashike omudimba inaufika nomoshilambo nokuli, ohoni kovanhu ava okwali tai va pangele nai shili.

Mboli Ndeumono eedula adishe odo a kala ha kwatele ovanyasha komesho mongeleka yavo mboli mokati kovanyasha omo haku namo ashike ohonda yaye Hamukwaya omona waKalyati pOnangava kaanave, vati aveshe nohonda yaye okwali ne havaimbi oteenule mbela ngeenge tavaimbileko ovakwaneongalo lavo, mbela osho ne velikufilapo.

Hamukwaya lopokati opo inakakwatwapo ne komukifi wo shuundalala, ye ota kwatelwa moshipangelo shaShikuku osho oko ne a ninga omafiku oko eli meembete, ovakulunhu vaNdeumono keshe fiku Osoondaxa vati ohava mono ngo Ndeumono ta teleke okambiki ta twala koshipangelo kOshikuku, vati meumbo omwafa ngo kwali mwakana noxuxwa yondema nookuli yakula, ashike otaku tiwa ngeno pomukunda wavo opo kapena ngo omakodi nande.

Aayee ovakulunhu efimbo olo Ndeumono haka talelapo ohonda yaye koshipangelo kakwali ngoo vena nasho okwali ngoo tave lipula kutya omunhu okuna ngoo okukatalelapo kaume kaye womongeleka yavo, ye navali omunyasha mukwao havaimbi moshihongi shovanyasha aveshe.

Ooi!! Hamukwaya yaKalyati aya wani, etufiyapo shili neenghali osho daka fikifwa keumbo lavo kutya Hamukwaya okwaya hewa, ndele nomeongalo ola ka lombwelwa kutya oshilyo shimwe shovanyasha oshetufiyapo, uhu!! Mboli nakufya hamushamane ashike wa Ndeumono womonanguwii nonande ovakulunhu kave shishi kaanave.

Taa!!! oidjemo opo taiya ne idjemo pomaendo opOnangava ne, ndele eenghali osho daka shituka oiyola yoingungumina, nande ukale ngo tofitikinine oiyola, aayee nomufita osho a menyemo mokuhena nghee ta yolele kenyeme nedu laye lokuyapula omudimba kwali ekwete peke okwa tula mondjato.

Olomakaya osho lafiki, ovanhu vaka ninge epako la Hamukwaya womona waKalyati, ashike lopokati opo manga epako inaali fika Ndeumono okwali ngo veke lihakapo nameme waye, kwali ngo veheli udite hano, molwaashi ina temu keelele opo aha ka nangale keenghali da Hamukwaya.

Omanga ashike ovanhu veli  pepako pomaendo opOnangava opo, vati  vamwe oveuditemo ngo muna oikwena ngo yomunhu takwena ta ti”vakwetu oshili omwali wange!!! vati ava kwali veli popepi na Ndeumono ova kendambala ngo okumumwenifa, molwaashi otava ti ngo omunhu okwauda ngo mutu nai komunyasha mukwao.

Taa!! oixuna opo ne taixunuka upwilikine ne eshi ombudi taikwena ombudi ikwao, va ti eshi elandulafano lomufita lafika lokukayapula omudimba,va ti Ndeumono naye okwafikama ngeno aka tuleko edu laxuuninwa tete, ngaashi naanaa hashiningwa kovafiyekadi, meme waye ali ne kutya kaanave mumwange kala omutumba otoi peni hano tolengifange utale.

Taa!! va ti ngheengo oshikefa shomudimba sha Hamukwaya shati ngo kulu!! shakuluka shauka medu ye Ndeumono naye okwa shitata eshina leenghali nokuli osho, woo ohonda yange!! woo ohonda yange!! Hamukwaya vakwetu oshili omwali wange Ohandi ke muhanga vali peni ohonda yange vakwe woo ohonda yange vakwe!!!

Aaye ovalilinghali aveshe ovakumwako ngoo nee ovakwanedimo aveshe pavali ovelipo ngo ne tava hale okushita medu, naava kwali vakwatwa koluhodi unene vamwe ovatameka okulipushula omahodi, opo vapwilikine okakadona taka kwena ohonda yako, vamwe nokuli otava ti oshikando shotete kuvo okuuda omukadona takwena ohonda yaye ta ingida mokule ngaho.

Oshike vali shaningwa po, omufita naye ou kwali ta ningi epako oshili ounyuni owe mu tilyanena ngo ne nOmbibeli ili peke vamwe ava vemu mona nawa otavati edu eli kwali ta ningi epako nalo lali peke okweli tula mondjato, ye naye okwa tameka vali ta fufilifa Ombibeli kombila, oshili oilengifa yali pomaendo opOnangava shili. Ookatale konawa ava valipo noo hakulya eenghali pomukunda opo otava ti, Ndeumono pepako okwakufwapo koshitukutuku aukifwa koshipangelo shaNgela, omwenyo tauhale okupwamo ashikule ohonda yaye, okaana otakutiwa okakwenene nai taka tilwa ashike omeva.

VaNamibia, osho shali kOnangava popepi nOkalongo ngaho, nye kombinga yee honda deni ngeenge odafi otamu ti ngaipi?
Kombinga yange ame JOHN YA TUYENI, oshili ohonda yange ohandiikwena olangu, apa ngo taidi tai hale nokunyumukamo moshikefa, ombudi ikwetu handiikwena ndele novalilafya taa kumwa, okaana haikakwena ame hai lipula eshi kwali hatu kala nako eefika momilaulu oufiku,  omwalikadi ohandi mu kwena ndele neenghali tadi shitopa manga, ohaikakwena ndele novalilafya tava puka komaumbo oku vadja.Ndeumono keshishi nawa nokuli, ame shapo nghifilwapo ohonda yange opo, oshina okuudika nokwaava vahalipo, omwalikadi ohandi mu lili apa ngo tadi inaafya vali.

Omadiladilo moshinyolwa eshi oomushangi mwene ndele kae shi a Kundana. MRTUYENI76@GMAILA

LEAVE A REPLY

Please enter your comment!
Please enter your name here