Ya dhimbulukwa Mandume pOihole

0
126

KuLoide Jason

OIHOLE- Aakwashigwana omayovi yomoAngola noshowo engungo enene lyaaNamibia ndyoka lya thindikilile Ohamba yAukwanyama Meekulu Martha Mwandinomho Kristiaan yaNelumbu oya li ya tangumuna Mandume yaNdemufawo Ohamba onene yOvakwanyama kutya oyali ohamba yaayehe.

Shika osha li sha popiwa Omaandaha goshiwike shika sho Aakwanyama ayehe kumwe nookuume kawo ya dhimbulukwa esiku ndika moka mwali mwa si Ohamba Mandume. Mandume okwa sile momasiku gahamano gomwedhi nguka momumvo 1917 pOihole moAngola hoka ali ta kondjitha aatiligane aakolonyeki yaaIngilisa kumwe naaPutu. Nuumvo eso lyaMandume otali dhimbulukiwa konima yomimvo 100. Aangola oyati mevi moka omwaya epandafule ndyoka lyali tali kondjele oshigwana.

“Ando Mandume okwali inaa sa ando ngiika inatu kolonyekwa kaatiligane nokaaputu mboka yetu kolonyeka ngashingeyi,”David Nghifimbwa omukokele gwomuAngola a ti ngaaka.

Nghifimbwa okwa ti kutya okwa hala aagundjuka ya kale ya simaneka iilonga ya longwa kuMandume oshoka oyo aawiliki yokomongula. Aapopi ya yooloka oyati kutya yo unene oya hala okulongela kumwe noshigwana shomoNamibia opo ya konge omutse gwaMandume oshoka ependafule inali fumbikwa nomutse. Okwa hokololwa kutya anuwa nale oohamba odhali ha dhi fumvikwa omidhimba dhawo dha thikamekwa ihe Mandume okwali a fumvikwa kaatiligane a lala moshilambo.

Sho anuwa omudhimba gwe gwa fulwa mo okwali a adhika keena omutse ihe okwa mangwa nonayilona mothingo moka. Oyati kutya otaya fekele omutse gwaMandume guna mpoka gwa tulwa kaatiligane oshoka sho gwa kongwa moshilambo moka ka gwali mo no popepi noshilambo inagu adhika po.

Ashike oyati kutya nayo oyi itula mo mokukonga omutse ngoka noya hala gu monike meendelelo ngaashin tashi vulika opo gu tulwe pamwe nomasipa ge. Aanamibia ye vulithe pomathele gatano oyali ya ka tala ombila yaMandume mpoka a fumvikwa naampoka a dhipagelwa. Oyendji woo oyali ya popi uupenda we noya holola nkene ya kanitha ependafule.

Ihe nonando meni lyoshilongo muka omwa patululwa oshitholomothano sha Mandume, Aangola nayo woo oyeli melongekidho okulonga mo wo oshitholomothano shependafule ndyoka. Meekulu yaNelumbu okwali a tulako ongala kombila yaMandume ongo ehupulitho nedhimbuluko lyiilonga ye ya simana moshigwana.

Okwa li a thindikilwa kaanenentu mepangelo lyaNamibia , pamwe naaleli yopamuthigululwakalo moNamibia.
Okwa li a taambwako kendiki lyAngola mwakwatelwa Ominista yIipindi moshilongo moka.

 

LEAVE A REPLY

Please enter your comment!
Please enter your name here