Ehangano lyoNored lya kunkilile omalelo gopaikandjo

0
101

KuMaria Namupala

ONDANGWA – Ehangano lyokwaandjaganeka olusheno monooli yoshilongo (NORED), olya holola okwaa uva ombili kwalyo omolwa aakwashigwana nomalelo gopaikandjo oshowo gopamuthigululwakalo ngoka taga pitike aatungi ya tunge kohi yoongodhi dholusheno oshowo pooha noopaala dhomalusheno.

Omupopiliko gwehangano ndika Herman Ngasia moonkundathana ndhoka twa ningi naye kuyele oshiwike shika, okwa yelitha kutya omalelo gopamuthigululwakalo naga yande okugandja omahala ngoka geli pooha noopala dholusheno, oshoka osha nika oshiponga noonkondo.

“Shika osha konekiwa sho aaleli yopamuthigululwakalo taya tsikile noku langeka aantu pooha dhopaala dhomalusheno, nonande ya kala nokulombwelwa ya yande omukalo ngoka,”a londodha kutya oshinima shika osha nika oshiponga unene.

Ngasia ta ti omatungo ogendji taga tungwa pethimbo ndika ogeli mooha noopaala dhomalusheno, nosha tula oonkalamwenyo dhaatungi moshiponga ethimbo kehe. Okwa gwedha ko wo kutya omatungo ogendji oga tungwa kohi yoongodhi dholusheno, go gamwe oga tungwa mooha dhoopala unene.

Okwa ulike okwaa nombili kwe naakwashigwana oyendji mboka ya dhini omalombwelo noompango dhehangano, noya tsikila nokutunga pomahala mpoka nenge ngoka gaana egameno uuna pwa holoka uupyakadhi niikwamalusheno yaNored.

Omupopiliko okwa gandja oshiholelwa ngaashi mpoka pwa tungwa omuhandjo goskola yaShituwa tagu adhika mEndola moshitopolwa shaHangwena, hoka aaniilonga yaadhika taya tungu kohi yoongodhi dholusheno.Pehala mpaka omuniilonga gumwe okwa li a dhengwa kolusheno ndoka, elago olili ashike mpoka kutya inalu mu dhipaga.

Okwa gandja iiholelwa oyindji yomahala nomatungo ngoka taga adhika kohi nenge popepi noopaala dhomalusheno ngaashi mOndangwa pomalukalwa gUupopo oshowo pokati kOluno nOnethindi.

Okwa ti ehangano lyaNored olya tsakaneke wo omikundu dhafa ndhika miitopolwa ngaashi shaZambezi, iitopolwa ayihe iyali yaKavango, Ohangwena Oshikoto, Oshana, Omusati noshowo oshitopolwa shaKunene.

Nored okwa gandja ompito kaakwashigwana ya kalekepo oometa 12 okuza poopala nopoongodhi dholusheno, ta ti ehangano otali tsikile noku ninga iigongi yomayelithilo moshigwana, yo taya kumagidha aaleli yopamuthigululwakalo kaaya gandje we omahala mpoka puna oopala dholusheno.

Kombinga yomaupyakadhi nuuyelele wulwe mboka olusheno halu vulu okweeta, otawu ka andjaganekwa nziya moshigwana pethimbo lyiikonga yowina, ta ti pethimbo lyiikonga mbika uuyelele otawu gandjwa melaka lyopambelelwa oshowo elaka ndyoka hali uvika moshitopolwa shoka.

Okwa galikana wo aakwashigwana mboka ya konekwa haya umbile iinima yaashiwike koongodhi dholusheno, ye shi hulithepo. Okwe ya kumagidha shili opo yi iyageke okuumbilako iinima oshoka ohasheeta oshiponga noonkondo.

LEAVE A REPLY

Please enter your comment!
Please enter your name here