A dhipaga e tiimangeleke sho a hengwa po

0
3082

Loide Jason

ONGWEDIVA-Opolisi mOngwediva oya patulula epeko , tayi konakona edhipago. Ekonakono otali ningwa sha landula omaso gaashi gopaushitwe sho omukiintu gwomimvo 18 a tetwa nekatana sigo ota si. Nakuteta omukiintu nguka otaku hokololwa a li nale omuholike gwe, ngoka pethimbo ndika aadhika eethiwa.

Oshiningwanima shika pahapu dhopolisi osha ningwa mOndjodjo ya Helondo mOshekasheka moshikandjohogololo Ongwediva Omaandaha oshiwike shika.

Pahapu dha Kommissiona gwopevi gwopolisi Nico Steenkamp moshitopolwa Oshana, omufekelwa omunamimvo 21 anuwa okwa thiminike nakusa opo a ye pamwe naye kaandjawo a ka taleko okamwanakadhona komvula yimwe oshoka nguka okwa tindi okushi zimina kutya okweethiwa.

Kommissiona gwopevi okwa ti omukiintu nguka pamwe nomwana oya zi puundingosho wopOmahenene yuuka kaandjawo yomufekelwa kOndjodjo, ye omufekelwa okweya landula.
“Mondjila konima yokuya landula okwa tete nakusa nekata momutse oshowo kokwaako kokolumoho. Nguka okwa kuthapo okanona nokwa thigi nakusa eehama noonkondo mpoka eta yi kegumbo lyaandjawo” osho Steenkamp a hokolola.

Okwa endulula a ti omufekelwa ngoka oye a li ha kala nomwanakadhona nguka, anuwa okwa li a lombwele yina yomunona opo e ke mu taleko kaandjawo oshoka ye okwe mu ethapo nenge okwa hulithapo ekwatathano lyiihole pokati kawo.

Kommissiona okwa ti oshafa anuwa omufekelwa a gee’kwa nokuuvithwa nayi konkundana yokuhengwa po komukiintu gwe ngoka, oshowo okuuva kutya nguka okwa mona po kuume omulumentu gulwe.

Steenkamp okwa ti omufekelwa anuwa okwa fala omunona mondunda megumbo nokwayi ete kiimangelekela momuti guli mepya lyaandjawo.

Moshiningwanima shilwe opolisi mOutapi oya lopotelwa edhipago lyomunamimvo 26 ngoka anuwa a si sho a tsuwa nombele komulumentu omukwawo omolwa okakalata koradio.

Oshiningwanima shika osha ningwa Osoondaha yayi pOndugu molukanda, Onkatanga moshikandjohogololo shaTsandi mOmusati.

Okwa hokololwa anuwa omufekelwa eya mokandingosho kamwe noku lombwela mboka ya li mo kutya naya dhime oradio yawo oshoka otayi kudhile.

“Aantu mboka oya yamukula nawa keindilo lye etaya dhimi oradio. Ihe sho a thigi po ondingosho ndjoka eta yi ku yilwe mbaka anuwa oya tameke ishewe okudhanitha oradio. Nguka anuwa okwa galuka ishewe sho uuvu tayi lili nokupula opo yi patwe ishewe,”omupopiliko gwopolisi Lineekela Shikongo mOmusati a hokolola.

Shikongo okwa ti eindilo etiyali lyaanguka inali ziminwa ye nokwa tilitha kutya otaka hanagulapo oradio ndjoka, naashika osha fala sigo omolugodhi.

Anuwa omumati gumwe mokati kaamboka yali taya pulakene oradio okwiithana omufekelwa , naasho nguka a thiki puye okwa pweya mo ashike ombele noku mu tsa nopwaana enyenyeto lyasha.Nakutsuwa okwa sile pondingosho mpoka ye nakutsana okwa fadhuka po ndele okwa ka kwatwa konima, shaningilwa momukunda ogo tuu ngoka” Shikongo a ti.

Omufekelwa okwa holoka mohofa yamangestrata gwaKahao Etiyali oshiwike shika.Ina pulwa a tye sha noshipotha she oshuundulilwa komasiku 25 Apilili nuumvo omanga opolisi tayi tsikile omakonakono. Omufekelwa okuli natango mokakuma sigo esiku ndyoka.

Nakusa okwa lopotwa oye Ngolo Fillemon gomOndugu nomufekelwa oye Erastus Hango aka Ingwatha omunamimvo 22 naye omukalimo gwomukunda ogo tuu ngoka.

LEAVE A REPLY

Please enter your comment!
Please enter your name here