Fimbiko na Mbuku ya uvathana

0
4590

Ku Pinehas Nakaziko

Windhoek- Otashi vulika yamwe muumbangalantu woshilongo yaashi kutya Mbuku na Fimbiko oyo oolye. Lesha sho Pinehas Nakaziko teya takuma mehokololo ndika.
Mbaka oyo aanyandi naahikingalo yaali ya kala noku mwenyeka ngele tashiya piinyangadhalwa yomainyanyudho.

Mathew “Fimbiko” Shipushu na Niinyanda “Mbuku” Seblon, aadhani mboka yali ya tseyathana okuza mo-2013, noyali ya toto po ehangano lyawo lyOmsheka Family, mundyoka ya kala noku ningila oongalo dhawo osho wo uufelema wa wo wOshiwambo.

Fimbiko okwa tamekele okudhana iinyandwa mo-2005, pethimbo ali omudhani muufelema womunyandi gookino mOshiwambo omunene moshilongo gwedhina Ndjeke yaMalimba Giindongo, mokino ye Konalenale naTelekeshe Ya Tawasha.
Pethimbo ndika okwali ashike ena oomvula 16.

Okwa ti oshitalenti shika okwe shi hokithwa kuyina sho ali emu kumagidha opo a taandelithe oshipewa she shika. “Sho nda koko onda popi naNdjeke opo tu topoke ye kehe gumwe a tameke okuninga iinyandwa ye, Ndjeke okwa li a zimine ethaneko lyandje,” Fimbiko ta ti ngaaka.

Momumvo 2013, Fimbiko okwa li a mono ompito ombwaanawa yokuya koshituthi shOmukwaniilwa gwAngandjera shaahikingalo hoka oko a tsakanene naMbuku, etaya paathana oonomola dhoongodhi dhawo.

Ethimbo ndyoka Mbuku okwa li omuhikingalo, a tseyika nawa nokangalo ke Okulya Kwandje.
Konima yoku ulika uunongo wawo Fimbiko okwa ti Mbuku okwali emu pula opo ya tameke okudhana uufeelema noongalo dhawo pamwe.

Mo 2014 konima sho yali ya toto po ehangano lyawo Omsheka Family oyali ya thaaneke okafilima kawo kotango kedhina Fimbiko Pomagadhi. “Okwa li tau landithwa ashike momapandaanda, nokaantu ayehe mboka tushi,” Fimbiko ta ti ngaaka, ye ta gwedha po ati ethimbo ndyoka Mbuku naye okwali a pititha oalubuma ye Okulya Kwandje.

Momumvo 2015 aanyandi mbaka oyali ya tsakanene nomuningi gwiikwelengendjo gwedhina Chano, ngoka a kala nokuya ningila iinima iiwanawa. “Pethimbo ndyoka aantu oya kala noku tu yola oshoka ka twali nando tuna oshimaliwa,” Fimbiko ati.

Ethimbo hale lya piti po, Fimbiko naMbuku oyali yamono ekwatho lyaawo lyotango okuza kehangano lyoMakuva Investment, nokonima Mbuku naye okwa ka pititha oalubuma ye ontiyali yedhina Inotulamo oCurry.

Oalbuma ndjika oyina oongalo 20, mwakwatelwa ongalo Ngu’tuukula Nena Olye, yali ya hokiwa koyendji noya kala tayi dhana onkandangala nokulilithwa konyala oshilongo ashihe. Mpaka oya tameke nokuli okwiithanwa kiituthi yayoolokathana, mpoka yakala nokuulika uunongo wawo. Omvula oyo tuu ndjoka, ehangano lyawo olyali lyapititha okafilima kawo okatiyali kedhina Okangungumani, haka okali taka popi kombinga ya nkene Fimbiko ta mono iihuna nokwa kambadhala opo a ka konge ezimo lye.

Omvula yazi ko, ehangano lyawo olyali ishewe lya pititha oalbuma ompeempeka yaFimbiko yedhina Oshihakautu, yi na oongalo 9. Oalbuma otayi kumike aantu ya thikame yo ya wape okukandulapo uuthigona.

Moalbuma muka omuna ongalo ndjoka Me & My Girl, tayi kumagidha aamati opo yaka kenkwe. Yo ya yande omikithi dhopamilalo. Moalbuma muka Fimbiko okwa kwathelwa okwiimba kuMbuku, Anna, Tjonga, Jomolizo na D-Square.

Nuumvo aanyandi naahikngalo mbaka oya holokele moshilandopangelo, noya ti oongalo dhawo noofiilima dhawo ngashingeyi odhili pamuthika gwopombanda. Mbuku ota pititha oalbuma ye Uulangedhi, nokafilima Ondjila muMaalitsa, noya hala oalbuma yi taambweko koshigwana ashihe.

LEAVE A REPLY

Please enter your comment!
Please enter your name here