Hambeleleni oye ethamba dhingi pOnamishu

0
368

KuMaria Namupala

ONAMISHU – Ngaashi oosikola odhindji moshilongo hadhi longekidha ethigathano lyuukadhona dhingi mesiku lyoValentine, osikola Onamishu nayo oyali ya unganeke ethigathano ndyoka omolwesiku lyohole hali tyapulwa momasiku 14 Febuluali omumvo kehe.

Aalongi naalongwa yoposikola mpoka oya gongala oshiwike sha zi ko, yo taya dhana nokutyapula esiku ndyoka. Poshiithanene mpoka opwali iinyangadhalwa oyindji mono aanasikola oyo yali taya dhana unene onkandangala esiku ndyo.

Aanaskola oyali ya zala omuzalo gwesiku yo taya inyanyudha pamwe naalongi yawo, aanaskola yomoondondo dhopetameko sigo ondondo onti-10 oya kuthombinga momathigathano ga yooloka.

Omukuluntuskola Hosian Hitanwa okwa ti osha simana opo aalongwa ya kale nokutyapula omasiku ngaka, yo taya tseyithilwa ya kale ye holathane noku simanekathana.

Okwa ti elalakano lyesiku oya li wo ya hala aanaskola ya nyanyukilwe pamwe yo taya dhana iinyangadhalwa ya yooloka.

Hambeleleni Haishinga omulongwa mondondo onti-10 oye a ulikwa ethamba dhingi noye a zalekwa oshikoloni shokakadhona dhingi esiku ndyoka, Alusina Nghifikepunye oye princessa gwotango omanga Secilia Johanness uulikwa a ninge princessa omutiyali.

Aasindani oya pewa omasindano nomagano ogendji molwaashoka oyeshi pondola methigathano ndyoka lyali edhigu. Hambeleleni okwa ti okuna ehalo nohokwe a kale ta kuthombinga momathigathano nga ngoka, oshoka okuga hole.

Okwa ti okwa hala a ka kuthe woo ombinga momathigathano pauyuni monakuyiwa, ta kumike aakadhona ooyakwawo mboka yena oshipewa shokuya momathigathano ga yooloka ya longithe ompito ndjoka manga pepi yo ya ulike iitalenti yawo.

Ontana dhingi ndjika tayi tsu omukumo ayehe mboka ya kuthile ombinga methigathano ihe inaya mona ompito yokusindana. “Aluhe ngele omuntu toyi methigathano lyontumba ohapu kala omusindani nomudopi,nonande kapuna ngoka ha kala a hala a thigwe po kumukwawo,ina mu sa uunye tsikileni noku kuthombinga esiku lyeni otali keya shito ne mu zalekwe iikoloni ngaashi ngame ndeshi mono no kanda li ndeshi tegelela,” Hambeleleni ta gwedha po ngaaka.

Aalongwa oyali ya dhana iinyandwa, yiimbi oondjimbo yo taya hokolola uuteyo nuuhokololo tawu tanga esiku lyohole, nonkene aantu yena okuholathana ongomuntu namumwayina.

LEAVE A REPLY

Please enter your comment!
Please enter your name here