Iilyo yetanga lyokukondjitha iimbuluma ya gongala

0
103

KuMaria Namupala

ONANKALI- Iilyo yetanga lyokukondjitha iimbuluma tayi ihilile po200 moshitopolwa shaShikoto, oya gongalele moshigongi shawo shokomumvo Olyomakaya ga piti pOnankali moshikandjohogololo Onyaanya.

Oshigongi shoka osha kuthwombinga kiilyo yomoshikandjohogololo shoka oshowo yilwe yaza kOmuntele. Oshigongi osha longekidhwa komukwatakanithi gopolisi noshigwana moshitopolwa shoka Chief Inspekta Stefan Nuuyi pamwe newilikongundu lyetanga ndika lyokukondjitha iimbuluma.

Inspekta Nuuyi sho a popitha aakwashigongi okweya pandula sho natango yiimanga kumwe mokukondjitha iimbuluma, sho taya longo muukumwe nokukwathela opolisi moshitopolwa okukondjitha iilonga yomiyonena oshowo okuyi shunitha pevi.

Esiku ndyoka ewilikongundu lyoWomen and Men network olyali lyiitseyitha kiilyo mbyoka yali ya holoka. Ewilikongundu olya thikamapo momunashipundi Lovisa Amutenya, Josephina Asheelo omupevinashipundi, amushanga Mathew Shanto oshowo Rebbeka Shipanga ngoka oye omudhiginini gwiiniwe.

Inspekta Nuuyi okwa fatulula dhimwe dhomooveta dhetanga lyonetwork, ta ti oongundu dhokukondjitha iimbuluma moshilongo odhili ewawa lyopolisi yaNamibia, mono taya longele kumwe mekondjitho lyiimbuluma.

Okwa pula omalelo gopamuthigululwakalo ga longele pamwe nopolisi oshowo etanga lyokukondjitha iimbuluma naakwashigwana ya kwashilipaleke kutya iilonga iiwinayi momidhingoloko dhawo oya pwamo, yo naamboka taya longo omiyonena moshigwana oya mangwapo.

Meme Amutenya ngoka eli omunashipundi okwa kumagidha iilyo yo Women and Men network yiiyageke okulongitha iikolitha niingangamithi, yo yi yakule ngaashi ye shiinekelelwa.

“Onda hala okudhimbulutha iilyo yetanga ndika kutya nayi tsikile okulongela pomahala gopashigwana ngaashi poopenzela, piituthi nopuundingosho uuna sha pumbiwa nokukaleka egameno pomahala galwe mpoka ndika tali pumbiwa, ne tamu gandja iiholelwa iiwanawa moshigwana,” Amutenya ta gwedhapo.

Ta uvaneke kutya etanga lyonetwork moshitopolwa shOshikoto olyiilongekidha okutulapo elandulathano, notali ka longa ngaashi lya komandwa kopolisi yoshilongo. Oshigongi oshali woo sha kwalwa ku Kansela goshikandjohogololo Onyaanya Petrus Kambala.

Kansela okwa kumike iilyo yetanga lyokukondjitha iimbuluma ya tsikile noku yi kondjitha, yo ya kale aluhe haya notheleko opolisi uuna ya mona omainyengo taga limbilike momidhingoloko dhawo.

Ta ti okwa pandula woo sho iilyo mbika aluhe tayi gamene omaliko gaakwashigwana, nokukwashilipaleka aluhe kutya egameno olya kalekwapo

LEAVE A REPLY

Please enter your comment!
Please enter your name here