Kutsima anuwa ota lilwa openzela koshitenya

0
1169

KuLoide Jason

OIPANDAHANGANO -Omukulupe gwomomukunda Oipandahangano moshikandjohogololo Outapi moshitopolwa shaMusati ota mono iihuna omanga iimaliwa ye yopenzela tayi liwa nokutaambwa koshitenya she.

Armas Kuutsima ngoka ngashinheyi ha hupu ashike nokusilwoshimpwiyu komukulukadhi gwe omanga iimaliwa ye tayi hupitha oshitenya she, okwa hokololwa pena iikando oyindji hayi koshipangelo keena nande odollar yimwe yokulanda yoshikulya, nonando oka kwata openzela.

Oonzo dhiinekelwa nawa kuKundana odha hokolola kutya Kuutsima nguka kiimaliwa ye oha pewa ko ashike okamaliwa okashona shoka itaaka vulu nande okulanda oshako yuusila.

“Omukulupe ngoka ota mono iihuna oshoka iimaliwa ye ohayi longithwa ashike moompumbwe dhoshitenya she omanga dhe dha thikama no tadhi kandulwa po noshimaliwa shopenzela yomukulukadhi,” gumwe gwomoonzo ndhoka ati.

Ihe sho Kuutshima a pulwa kuKundana okwa ti ndhoka odho shili nokuna edhilaadhilo lyokukuthamo oshitenya she moku taambaa oshimaliwa shoka. Okwa ti kena nande esiku a pelwe oshimaliwa she sha gwana po nongele okwa pewa ko oshipambu sho ngaa taka pula shoka sha hupa ko oha lombwelwa ashike a tegelele kekwato lya landula ko.

“Ndhoka tamu popi odho shili nonda dhengwa nda luluma oshoka oshitenya sha ndje ondali ndeshi inekela ihe ngashingeyi otashi kotokele ndje,” Kuutsima a ti ngaaka.

Nonando aakulupe oha ya pewa oshmaliwa shithike poN$1200 keshe komwedhi, omukulupe nguka okwa ti ngele okwa pewa ko oshimaliwa sha kola oondola omathele 600 iikwawo ayihe mbi ya hupa ko iheyi pewa we.

Okwa ti petameko okwali a tula mo omwanamati ngoka a hokana oshitenya she ihe sho a mono a kala iteemu pe sha okwa lundulula noku tula mo oshitenya she ihe ngashingeyi ka puna elunduluko lyasha.

“Ngashingeyi onda dhiladhila oku tulamo nande omukulukadhi gwandje oshoka oye tuli naye megumbo ye oye ta kwathelenge omanga iimaliwa yange tayi liwa po kaantu yamwe yi ili,” ati ngaaka.

Kuutsima oyeli 15 megumbo mboka taya paluthwa kekutu lyuusila mboka hawu landwa ashike komukulukadhi. Ekutu limwe olina oshimaliwa shithike poondola omathele 500.
Omukulupe nguka ngashingeyi nduno okuli metegelelo lyokuya koombelewa dhopenzela opo a ka lundulule iinima mbyoka.

Kuutsima okwa ti okwa tula mo oshitenya she oshoka okwali a tila kutya iimaliwa ye kayi vula okukuthwa ko komukulukadhi gwe oshoka keshi ku lesha. Kundana okwa ninga onkambadhala okukonga oshitenya shaKuutsima ihe inaye mu mona oshoka kali mo megumbo ethimbo Kundana a talele po omukunda ngoka.

LEAVE A REPLY

Please enter your comment!
Please enter your name here