Mayola gOniipa a kumagidha aakalimo yomondoolopa ndjoka

0
91

KuMaria Namupala

ONIIPA – Meya gondoolopa yaNiipa Immanuel Kambonde okwa kumagidha nokuguna aakalimo yamo, yiiyageke okwiikuthila omahala gomalukalwa inaaya pitikwa okushininga.
Kambonde okweya galikana wo opo yaaa landithe nando omahal mondoolopa ndjika inaaya pitikwa okushininga.

Mayola ndhika okwedhi popi oshiwike shayi, pethimbo a holola okuuva nayi kwe omolwomalangeko ngoka taga ningwa nomaikuthilo gevi shaali paveta mondoolopa ndjoka nonande opo ya tulwa miilonga omumvo gwa ziko.

Okwa pula aakalimo yiikaleke kokule nokwiikuthila nenge okulanda omavi inaashi uthwa, shino osheya puuyelele sho kwa konekwa aakalimo yomondoolopa ndjoka taya longitha oonkondo okwiikuthila evi.

Elelo lyondoolopa ndjoka olya uvaneke tali ka longa nuudhiginini okukondjitha eikuthilo lyevi mokati kaakalimo oshowo elanditho lyiipambu yevi inaashi pitikwa kulyo.

Kambonde okwa londodha kutya nando aakalimo otaya tsikile okwiikuthila omahala oshinima shoka inashi opala onkene ewiliko lye otali ka kambadhala okushi hulithapo mbala.

Otaku hokololwa aakalimo yamwe ya tunga pomahala ngoka inaaga uthwa okutungwa molwaashoka opwa thanekelwa omahumokomeho gondoolopa ndjoka, ta ti ayehe mboka ya tunga pomahala inaashi uthwa otaya ka katukilwa onkatu yomeendelelelo.

“Aakalimo oyendji yomondoolopa mboka taya tungu pethimbo ndika otwa koneke kutya inaya landula omilandu dho kutula po omatungo, no taya tungu owala omatungo inaaga kola nonande ogeli meni lyondoolopa,” Mayola ta ti ngaaka.

Elelo lyondoolopa olya tameka okuthaaneka omutungilo gondoolopa ko okaalita hoka otaka ka longithwa momathanekululo nokutula pamuthika omidhingoloko dhOnethindi extension 1,2 oshowo 3.

Kambonde okwa ti oyiilongekidha okweeta ehumokomeho mondoolopa ayihe, yo yi kale yafa oondoolopa adhihe moshilongo, noya hala okukala taya gandja omayakulo giihwapo kaakalimo yomondoolopa ayehe, yo ondoolopa yi koke nawa nopaliko.

Okwa dhimbulutha aakalimo kutya omukundu gwevi inaguya okukalelela, ashike oya hala ayihe yi kale yili melandulathano, lyo elelo lyondoolopa tali tulapo omilandu tadhi vulu okukandulapo omukundu gwevi ngoka guli oshilongo ashihe.

Kambonde okwa gwedha po kutya ondjodhi yawo tayi kalelele oyo okugandja omagumbo nomahala gomalukalwa kaakalimo yomondoolopa.Okwa kwashilipaleke wo kutya oya thaneka omutungilo gondoolopa omwaanawa no tagu hokitha.

LEAVE A REPLY

Please enter your comment!
Please enter your name here