Oikungulu kaifi oudano

0
154

Oshikukungulu shedina Dineo osho sha palufa Namibia omafiku aa, oshi li elondwelo kutya ngaashi naanaa oilongo aishe mounyuni hai dulu oku dengwa koikungulu, Namibia naye inaamukwa.

Hano eshi nashi kale oshileshwa kutya mboli ongoshilongo otu na okukala tweli longekidila oinima yoludi latya ngaho ongepangelo nongoshiwana.

Namibia okwa kala ashike he lilongekidile shi li pauyelele oshikukuta nefundja, shaashi ei oili imwe yomoiningwanima yopashito oyo odula nodula ya kala hai piyaaneke oshilongo.
Paife koinima oko mboli okwa pumbwa okuwedwa oikungulu oyo nokuli ya nyika oshiponga i dule efundja noshikukuta oyo twa kala tu shi.

Omalilongekidilo oikungulu yoludi olo kaifi ashike oku kala noshimaliwa tashi dulu okukwafa penya naapenya pefimbo loupyakadi, nokudeulila ovanhu okuyakula pefimbo lomaudjuu oludi olo, ashike epulo oleli kutya omatungo unene tuu omaumbo etu otaa dulu ngaho okutu xupifa pefimbo loshikungulu.

Pamwe efimbo okutalulula oilongifo oyo hatu longifa okutunga omalukalwa etu opaife.
Shikwao, omalihumbato nomapopyo oshiwana mokuteelela oshikungulu oshivike shadja ko, otaa ulike kutya ovaNamibia inava dengwa va lila nokave shi kutya oikungulu nomaponokelo makwao opaushitwe kaeshi oudano.

Ngeenge owa li wa landula osocial media okuuka kexuliloshivike la djako, omunhu oto lesha nokumona kutya oshiwana shetu kashishi nande kutya oikungulu yomaludi oo oinima ya nyika oshiponga nokaishi yokushendjulwa ngaashi naanaa twa kala, hatu shiningi.

Vamwe otava tula omafano nomashangelo kosocial media tava pula kutya Dineo okuli peni. Vamwe nokuli eshi va uda kutya mboli ina shi fika mo vali moNamibia ova tameka tava ti kutya mboli Dineo omumbada, naikwao ihapu.

Ashike oshiwana nashi kale shishi kutya oikungulu yoludi eli oidjuu, ohai teyaula tai ngumauna nokuhalakanifa yo ohai dipaa pehena oudano.

Ngeenge owa tale Dineo oo nee twa kala hatu pula kutya okuli peni,okwali okakungulu kafa ka nafangwa, ashike moMozambique osha ngumauna mo omatungo, nosha dipaa mo ovanhu. MoBotswana namo osha hanauna, omatungo nomalutenda omashina, ashike ponhele yokupandula Kalunga, fye ovaNamibia ohatu yolo hatu penya.

Odula ya dja ko (2016) oshilongo Haiti, oshali sha dengwa koshikungulu shedina Hurricane Mathew osho sha li sha twaalela eemwenyo dovanhu va fika ile nokuli shiimba vedule pe1000. Ounyuni paife owa ninga okamukunda kamwe, ouyelele ohau tandavele diva mounyuni aushe.

Mo2005, ovanhu veli lwopo 2000 mo United States of America unene mocity moNew Orleans ova file moshikungulu shedina Hurricane Katrina.

Oshikungulu eshi osha li sha kuma oshinano shi fike pounene weembinemeta oma 90 000. Va hapu vomwaavo va fya ovanhu ovo veli moluhepo.

Eshi nasho ovaNamibia ove shi udile, osocial media noikundaneki oye shi ulika.
MoNamibia omu oshiwana shihapu ohashi kala moubashu, ngeenge otwa hangwa koshikungulu sholudi olo, oha tu xupu mbela ngahelipi?

Omolwashike tu na okukala twa hafela oshinima sha nyika oshiponga fye tuhe shi kutya oudjuu washo owa fa peni?

Oshikungulu shomoAmerica tetetete osha denga oshilongo osho mo 1915, tashi aluka mo 1940, 1947, 1969, 1975 nopo nee mo 2005, konima yeedula 30. Ashike odula nodula oshikungulu eshi osha kala ashike tashi kolo. Hano Namibia naye na koneke kutya, Dineo otashi dulika a aluke, naashi taka aluka otashi dulika aaluke a kola edulife po opo.

Ile ha Dineo vali teke ya, otashi dulika kukadje oshikungulu shimwe shilili shanika oshiponga. Ponhele yokupenya nokudanauka nefyo, natu li longekide onga oshilongo, nonga oshiwana pauyadi.

LEAVE A REPLY

Please enter your comment!
Please enter your name here