Omautho omape gaalikoli yoshigungu mOngandjera

0
1107

KuHelvy Shaanika

Elelelo lyoshilongo shaNgandjera olya kunkilile mboka haya likola iilikolomwa mOngandjera, unene mbyoka hayi ya pethimbo lyomvula opo yi iyuthe koveta ndjoka ya tulwa po kelelo.
Okuti kwaNgandjera oko kumwe komomakuti moshilongo ngoka ga yambekwa iilikolomwa, mwa kwatelwa omagungu, omayenkoye, okatalashe nosho tuu yilwe.

Mbino ohayi nana aantu omathele, taya zi komahala ga yooloka moNamibia, unene tuu moNooli opo yaka likole, nokwiikongela uuhupilo.
Shino oha ye shi ningi oshali.

Ihe nande aantu ya kala ya ethiwa oku likola iilikolomwa mbika yopaushitwe, anuwa ohaya thigi omudhingoloko mpoka taya longele kaaguli melandulathano, oshinima shoka tashi vulu oku hanagula po uushitwe, mboka wa pandika kiilikolomwa mbyo taya kongo, noha shi dhipaga po iimina mbyoka hayi napa mokuti moka.

Kakele kwaashoka, aalikoli mbaka anuwa ohaya likola taya mana po, yo nomayi, otaali.
Omushangwa ngoka gwa pitithwa komukwaniilwa Johannes Mupiya, oshiwike shotango sha Febuluali, otagu ti “Elelo lyoshilongo shaNgandjera nomalimbililo noneyeme enene olya koneke nkene aantu yokulikola iilikolomwa mbika itaaya sile omudhingoloko oshimpwiyu shoo taa thigi omulilo inagu dhimwa, onailona, omanyala goonayilona, omalapi, omakende goplasitika nosho tuu, yashapakana nokuti mpoka pwa Ii pwa ningwa/pwa yungwa oontanda dhaalikoli,” osho omukaniilwa a ti.

Opo ku kale kwe po oveta nelandulathano, elelo olya tokola wo opo aalikoli ayehe ya kale taya yungu pontanda yimwe, ndjoka taya ka pewa kumwene gwomukunda moka taya ka likola. Ano hangaashi nale sho kehe gumwe ta vulu okuyunga ontanda kehe mpoka a hala.
Opo shika shi gwanithwe po, aalikoli ngashingeyi oye na okupewa ombapila kumwene gwomukunda omanga inaaya tameke okulikola, nomanga inaaya yunga oontanda.

Mupiya ta ti elelo olya tula po egeelo lya kehe ngoka taka adhika tayi kondje yoveta ndjoka. Olya pula wo aapolisi yomomikunda opo ya kwathele okukaleka po oveta nelandulathano kokuti kwaNgandjera.

“Ngoka to ka adhika wa dhika/yunga ontanda yoye mokuti kowala, mwene gwomukanda ke shi shi otoka futithwa N$1000-00 nenge oshikombo nenge onzi nenge ayihe pethimbo limwe.

“Alikana ino ya mokuti kwaNgandjera u ka tale mo iilikolomwa yoye waa na ombapila ya kwashilipalekwa kElelo Iyopamuthigululwakalo gwoshilongo shaNgandjera. Ooveta nomalandulathano opo ge li,” osho omukwaaniilwa Mupiya a ti.

LEAVE A REPLY

Please enter your comment!
Please enter your name here