Oosikola mOshikoto dha pewa iikwathitholongo

0
74

KuMaria Namupala

OMUTHIYA – Ehangano lyo Namsov Fishing Enterprises olya gandja omagano giikwathitholongo yongushu yooN$120 000 koosikola ntano, dho moshitopolwa shaShikoto.
Omunambelewa omukuluntu mehangano ndika Tuna Willem okwa ti iikwathitholongo mbyoka oya gandjwa okupitila momunani gwehangano Omundohotola Nickey Iyambo, a ti ndika otali lalakanene okupungula nokuyambulapo ongushu yelongo moshilongo.

Okwa tothamo gamwe gomomalalakano galyo ngaashi okuyambidhidha oosikola dhomoshilongo, aailongi naalongwa oku mona oonkatu nuunongo melongo mboka tawu keya petha omauwanawa moonkalamwenyo dhawo monakuyiwa.

Willem pethimbo ta gandja iikwathitholongo mbyoka okwa ulike kutya sigo oompaka Namsov okwa pungula oopelesenda10% miilonga yawo okugandja omauwanawa komidhingoloko dha yooloka okupitila moopoloyeka dhomayambulepo.

Namsov oku za mo1991 okwa longitha oshimaliwa shoomiliona 20 okupitila meyambulepo lyelongo moshilongo, okugandja oshimaliwa shokwiilongitha kaalongwa mboka ya hala okuka tsikila elongo lyawo lyopombanda nokutungapo omahala nomandiki gomadheulo.

Willem okwa uvaneke kutya ehangano lyawo otali tsikile okukwathela pompito kehe mpoka tali vulu, ta ti otaya lalakanene okugandja sha moshigwana shoka woo hashi ya kwathele opendji. Ta ti ehangano olya totwapo nelalakano okugandja omakwatho.

Oosikola ndhoka dha pewa iikwathitholongo odho Emanya Combined School, Engoyi Primary School, Uukuma CS, Onamavo CS nOndumetana PS, osikola kehe oya mono iikwathitholongo yongushu yooN$24 000.00.

Iikwathitholongo mbyoka ya gandjwa oya kwatelamo omashina gokutopatopa, omashina gokwiindjipaleka oombaapila, ookompiuta noyindji yuukwatechnika.

Ehangano ndika olya kala nokukwathela iikondo ya yooloka moshilongo, nohali gandja omayambidhidho opendji.

Ngoloneya goshitopolwa sha Oshikoto Henock Kankoshi okwa pandula ehangano ndika omolwiikwathitholongo mbika, nokwe li kumike li tsikile natango ngaaka.

“Oshitopolwa shetu osho shimwe shina oosikola dha pumbwa omakwatho nomayambidhidho, otatu pandula unene sho tuna omahangano gena aanona komitima naaluhe otaga yambidhidha mpoka taga vulu,” Kankoshi ta ti.

Okwa pula aakuluntuskola naalongi poosikola ndhoka dha pewa omakwatho ngoka yega kwate nawa yo taya tsikile okulonga aanona ngaashi haye shi ningi shito.

LEAVE A REPLY

Please enter your comment!
Please enter your name here