Ouna ku ninga ngahelipi ngee wa lika keyoka, ile una omunhu a lika keyoka?

0
1398

Okulika keyoka oshiima shi tilifa neenghono, novanhu vahapu ohatu tila omayoka. Ohaku ti wa omayoka nao oshitopolwa sheshito, na luhapu ohaa lyana ngaho ngee twe a shindi. Omayoka nao ohaa tila yoo ovanhu. Ashike eshi sha yela osheshi kutya vahapu vomufye, ngee twa mono eyoka, olutu ohali haluka neenghono nonande eyoka inali lyana natango.

Omayoka aa ena oudiyo moNamibia okwa topolwa meengudu nhatu:
Omayoka oo haa eta onerve paralysis
Onhoka (Mamba), nEfu (Cobra) oha yi kwata unene omifipa deenerve, nomunhu ota dulu okukala ita fuda nawa, nota dulu okufya meendelelo
(Onhoka)Mamba
(Efu) Cobra

Omayoka oo haa eta oshipa neenhumba difye Epili
Epili (Puff Adder )ohali eta ouyehame muhapu apa pa lika, noshipa neenhumba otadi fi, nosho yoo odindo ihapu

(Epili) Puff Adder

Omayoka oo haa eta omunhu a kale ta di ohonde unenene ongaashi Boomslang, ngaashi la shivika kovatakumi.

Eli ohali piyaaneke ohonde, nomunhu ota dulu okudja ohonde ihapu.
Boomslang

Omayoka mahapu otaa dulu kweeta omaupyakadi aeshe opatatu, nonande a tukulwa meengudu.

Ovanaudu va hapu va lika komayoka, ohava lika komaoko ile komaulu. Naashi lukapu ohashi ningwa oufiku, nonande nomutenya omunhu ota dulu oku lika yoo keyoka. Uudiyo weyoka ouli komutwe walo.

Wa holekwa moushako veli popepi nomesho alo. Ngee nee eyoka ola lyana, oudiyo oo ohau piti nee moumufipa va yuka momayoo alo eli pombada yokanya, oudiyo tawii nee molutu lumunhu (tala yoo efano pedu). Okuehama ohakuli kolelele nee kutya omunhu okwa lika keyoka loludi lilipi, omukulunhu ile okaana, okwa lika komhadi ile okomutwe, nosho yoo koundjolowele womunhu.

OUNA OKU NINGA NGAIPI NGEE UNA OMUNHU A LIKA KEYOKA?
Keelela oku lika vali keyoka olo tuu olo, kotoka yoo naave uha like. Hano, kufa po omunhu ou a lika keyoka mu kale kokule nalo)

Ngee otamu kendabala oku li dipaa, kotokeni shaashi otali dulu ku lyana natango shaashi nalo ola handuka ngaho.

Kaleka nakulika keyoka a ngungumana, na mu kwashilipaleka kutya oto kongo ekwafo. Luhapu oumbada nokulinyenga luhapu otashi dulika shi taandavelife oudiyo diva.
Denga ongodi, ile konga ekwafo meendelelo

Kufako oinima aishe eyi tayi dulu ku finaneka oshitukulwa sholutu eshi odindo tayi tameke, ngaashi eeringa, eenghaku, oikutu ya pama noulyenge.

Kaleka oshitukulwa sholutu eshi sha lika shi kale sha mwena. Omalinyengo mahapu otaa dulu oku taandavelifa oudiyo diva. Nakulika naye mu kaleka a mwena nokwa ngungumana, (nonande haalushes hipu.

Didilika nawa: Ngee eyoka ola dimbululwa kutya onhoka ile efu, oto dulu okukufa oshilapi sha yela ndele to mange kashona ashike pombada yaapa pa lika. Haku nana unenenene.
ASHIKE NGEENGE EYOKA ELI LA LYANA EPILI, ESHI INOSHININGA NANDE NANDE, shaashi otashi eta oupyakadi muhapu, tashi dulika okuulu ile okwooko ku ka tetweko. Ngee eyoka kali shiivike oshihwepu okuulu ku ha mangwe nandenande.
Endelela nee ufikife nakulika keyoka koshipangelo.

Ngee eyoka omweli dipaa, li tuleni monailona ndele tamu li twaalele. Ngee ola faduka po inamu li landula, otashi dulika li lyane natango.

OINIMA EI IHE NA OKUNINGWA NANDENANDE NGEE OMUNHU A LIKA KEYOKA.
Inamu lwifa eyoka, ile muli landule oufiku, otali dulu okulyana natango. Kotoka
Ino manga okuulu, ongeenge ashike eyoka li shiivike kutya Onhoka ile Efu. Nokumanga kwoye inaku kala kwa nana unene. Kala wa fa to mange ashike oshipute. Luhapu ohaku tiwa ino manga ashike nandenande.

Ino teta apa pa lika keyoka. Eshi otashi yeulula omhito yeembakiteli dimwe po di ye molutu.
Ino tula po oimbodi, ile omutoko apa pa lika keyoka. Opena omhito kutya oto tula po vali ondova oyo tai ka naipaleka onghalo Ino fipa apa pa lika keyoka. Eshi otashi eta oudiyo uli hanene meenhumba. Oudiyo otau dulu yoo okuku etela oupyakadi ove ou to kendabala okuu fipa mo.
Ono pa omunhu alye ile anwe sha manga.

OKUKEELELA OKU LIKA OKUHWEPO, SHIDULIFE OKUHAKULA NGEE OMUNHU A LIKA NALE
Ino kala unene ho i poihwa ya fita, poikololo pa kaka, pomangade ile poima pe na omitutu. Ngee wa shakene neyoka, inoli lwifa nande. Kala wa mwena. Ngee opena omhito enghenako to ende kashona ndee to faduka po. Luhapu omolwa oumbada, ohatu faduka po ashike, shoo osho fimbo limwe otashi eta okulika keyoka. Kashi pu nande, ashike eshi shili mondjila oku ha kulukuta unene. Koneka kutya eyoka nalo ola haluka loo ola tila yoo. Kotokela omayoka amwe oo haa monika afya, efimbo limwe, eyoka otashi dulika likale inali fya. Eyoka nande ola dipawa, li kotokela, otali dulu oku lyana. Ngee oto longo moihwa, djala omidjalo tadi keelele okulika koikwa mayoka.

EPANGO LOMUNHU A LIKA KEYOKA OHALI NINGILWA MOSHIPANGELO
Luhapu nande omunhu okwa lika ashike kashona, ndele kena naanaa omadidiliko mahapu, natango oha tambulilwa ngaho meembete opo a pewe omiti, yee a talwe ngee ota kala ngaho nawa.

Ongee ngee una omunhu a lika keyoka, endelela umu twale koshipangelo eshi shili popepi. Ngee otashi shiiva, dengela koshipangelo oko wa yuka kutya ouli mondjila una omunhu a lika keyoka, shaashi opuna omiti odo tadi dulu oku yandjwa diva diva di xupife omunhu. Ashike omiti edi oha di pula elongekido. Ngee eyoka ola dipawa, li eteleleni koshipangelo opo ku talike kutya olilipi po. Epango ohali li kolelele kutya omunhu okwa lika keyoka lilipi po.

LEAVE A REPLY

Please enter your comment!
Please enter your name here