Tuyeni Kolupale la Tuyeni: Woo eliko lomulumenhu wange!

0
269

Ame ondi hole tuu okudimbulukwa efimbo lounyuni wonale, nonande inandi dalwa mefimbo lounyuni oo, ashike okuuda eshi kwali hashi ningwa nale pakulombwelwa kovakulunhu, osho nee hashi penge ndi shemunune nokutala nawa oinima imwe tai ningwa nena.

Ndishi nghee sha kala mbela okudja keshito laKalunga ovalihomboli, omushamane oye ngoo a kala ha fiye po ounyuni ou tete.

Omufiyekadi oo a filwa ngaho mounyuni wonale, okwali hashi pula oule weedula mbali natango ta talika ko kutya opo afilwa, molwaashi omunhu okwali hakoshwa olufi mefimbo lonale, nokonima opo nee hadulu okumonapo omulumenhu umwe.

Eshi otashi ku pe ne kutya, mefimbo lonale ohole yashili opo yali pokati kovalihomboli vavali, sho osho uwete tashi pula eedula mbali opo omuhombolwa a dimbwe kaume kaye.

Hano novalumenhu ne vamwe ovo veli ninga ovali li vovanhu, ohava tameke tava hekeleke oonakufiwapo oipupulu, na vamwe ovo nokuli hava kala ve kwetele oivilo yomafyo ovalumenhu vakwao ei komesho, hava kala tava monika vanyika oluhodi loipupulu komwenyo, nonande momitima davo ohava kala tavati eli ladiwa olo hali nangalwa.

Ngeenge ne ove omushamane we lininga ne wokukala toi momakwatafano pahole novakulukadi vavakweni ava vafilwa, ongeenge ne ito fi mbela?

Heeno oshili la diwa olo hali nangalwa, ashike shimwe twa koneka hashi ningwa moshiwana, ovashamane vamwe ava hava kaya momakwatafano opaihole noonakufilwa ava, elalakano lavo kalishi ohole yashili ndele shavo okuka lya po omaliko oo a fiwa po.

Oshinima shakula sho osha shanyika oshiponga oonakufilwa voshilongo shetu inava kotoka ne, navo ohava tameke tava tembula nokushondolifa ovashamane ava komaumbo avo vo veuye koyuumbo yavo oko opo va kale tava tyapula oufiye, nokonima ngeenge wa pu po noihole yavo ohai tameke tai shongola.

Dimbulukwa kutya omushamane ou okuna eumbo laye nomukulukadi waye novana vaye eva fiyapo, ndele neliko laye oko eli fiya keumbo, ye paife nakufilwa ou, paife okwa shaala ne moshiiumbo shaye noluhepo laye molwaashi eliko lapwa po ilo nokuli laya nohonda yaye.

Ehokololo li tilifa lo otali kumwifa, ololo tali popi meme umwe ta hokolola yeemwene ta ti tate YA TUYENI, ame omukainhu nda udifwa nai, ndele ngeno okwali onghalamwenyo haishunwa monima, ngeno ei yange ohandii shuna ko meendelelo molwaashi onda longwa oshilongwa, kombudi imwe.

Ame ondaya mekwatafano paihole nohonda yange imwe konima ashike eshi papita omwedi omushamane wange afiya po ounyuni ou, ashike mbela pamupya wange opapita ashike omwedi umwe ko okamatyona aka kohonda yange okapange po edimo.

Omumati ou opo ndiye naye mekwatafano paihole, oshili okwali ta monika ena efimaneko kwaame ye ne navali ina hombola okwali ne ndatila okuka londakana eehombo dovanhu veli hombola veli momaumbo avo.

Nonande omulumenhu ou kwali ta monika meedula efike pu Erasmus ou woshiveli shange okwa kala nokuli humbatela nge nawa paihole, ashike mboli oteshi ningi opo a lungifenge onhakwi yomeva.

Oimaliwa yange kwali yafiwapo kunakufya okwa ti natu kei shendjele meebaanga daye vati opo tu tote okaambani, eengobe dange dili 56 okwedi kufapo va ti oteke di kongela ofaalama omu dina okukaxupa.

Oituwa yange ili ivali kwali nda fiilwa kunakufya, okwa lombwelange opo tu kei shendjele kedina laye, molwaashi vati oveta oya ti hamukunhu ta kala notuwa ili kedina laye omanga ehe shi okushinga, onda kala noku muudifa nawa nokuli andi hale kutya shidule na nakufya wange, molwaashi oikando ihapu ngeenge teya keumbo letu ngeenge inadi dipaya oshikombo ohandi mu ningile okaxuxwa.

Eshi ndamona kutya opapita eemwedi nhatu, onda tokola okudengela okalumenhu honda yange aka, opo ndika lombwele kutya ame ondina oufimba wako, ashike efiku ndeka mu dengela kakwali ka hala okukufa po ongodi ya ko. Okwa ka shangela nge osms tai ti “mekulu eshi to ti ouna edimo lange, oshili owa tala ngo nokuyeleka eedula doye naadi dange? Ino dengelako vali kongodi yange oku.”

Paife osha tameka okuulange inakulu nokuli sho nale okwali shi hole okuula nge mwali wange oipatululo yotuwa oili peni, oshinona mbela shina oumbudi woo inakulu wokepata lavo.
Paife tate YA TUYENI oshilume eshi sha enda nge eenyiki dalya ngaha sho noxo osha tuta po omaliko ange, paife inashi hala okufimaneka nge oshili nandi shiningile shike?

Meme wange ne wedina inoo hala li tongwe moshiwana, omolwoilengifa oyo wa ninga ifike opo, sho tete epuko oloye, molwaashi epya loye owe lilikifa po koikombo ihe na omatwi.
Oshitivali, otashi ulike naana kutya oshilume honda shoye osho owa kala nasho nale mekwatafano lopaihole omanga omushamane woye inaa fya.

Ashike paife eshi ne una okudimbulukwa, oko kutya oove wa tula oludalo loye moluhepo, omolweliko olo kwali lafiwa po kunakufya mweli lila moikumbafa, onghe ne ame oshili kandi wete apa una okumona vali ekwafo limwe.

Pomukunda weni pe yadi novashamane vepupi loye vehena ovakulukadi, ndele oshili oshilume osho ngo wa ka mona po, naashi ne hokala nasho oho ti tate wambuletu ilo ohoti shiveli shange, tala ne nena oshosho tashi popi ngaho kutya sho ihashi keli vata po novakulupe.
Ovakainhu moshilongo

shetu pwilikineni ne oikumwifalonga, napamwe opena ngo meme umwe to ke li hanga monghalo yokufiwapo komulumenhu woye. Kotokeleni okukaya momilele nounona voumati nokonima vo tave ke mu lila omaliko eni. Omukainhu itashi ti ngeenge owafilwa ke li ku pule nomomakanya eenghoshi.

Ove nande owa filwa, ouna ongushu natango, oto okuhombolwa ngeenge ouli mepupi leedula dinini.

Ashike eshi otashi shipula okulikwata nawa kwoye.
Nye ne vashamane ava mwe li longa okufyuulula po ovakulukadi vavakweni, ou emu lombwela kutya onye ookalako kounyuni oku olye? Oinima ngo ei ho ningile vakweni ngeenge vafya naave oyo ngo toka ningilwa efiku to fi. Ngeno okwali hakwaalukiwa nokuli uuye utale eshi to shanwa omaholongo kovalumenhu vakweni ne.

Ngaashi nokuli meme ou inali lwa nawa nokuli, ngeno okwali a shakena nomakekenye oo YA TUYENI, okaana handi ka lile nde nande omongula kashakena nokaana kokamati ota tameke ashike ta ka tale kwinya.

NB: Omadiladilo moshinyolwa eshi oomushangi mwene ndele kae shi a Kundana.
JOHN YA TUYENI
MRTUYENI76@GMAILA
CELL 0812988549

LEAVE A REPLY

Please enter your comment!
Please enter your name here