Uupuka inaawu tseyika wa lipo iikapa

0
156

KuLoide Jason

ETUNDA-Uupuka waa shiwike owa etele omunafaalama omushona pofaalama pEtunda moshitopolwa Omusati ekanitho enene.

Omunafaalama omushona ngoka ha kunu iikapa okwa yonenwa iimeno ye shoka okapuka hoka inaaka tseyika natango ka li ko omafo giikapa mepya lye.

Andreas Kaanyena okwa hokolele Kundana kutya uupuka mboka a ndhindhilike ekalepo lyawo oshiwike shayi otawu li omafo niitayi yiikapa.

Okwa ti sigo oompaka oshitopolwa shuunene konyala woohekta ndatu odha lika po kuupuka mbuka, meni ashike lyomasiku gaali.

Uupuka mbuka wa konekiwa oshiwike shayi ohawu ponokele nokulya po omafo giimeno mbika wuli muungundu . Tawu li po omafo ngoka agehe naashika otashi fala meso lyoshimeno shoka.

“Otwa tamekele okutsika iimeno mbika Etine no twa manitha mEtitano. Ihe mesiku olyo tuu ndyoka uupuka mbuka owa tameke tawu li kashona nakashona, naasho twa galuka Olyomakaya ,otwa koneke kutya omikweyo adhihe odha hanagulwa po okuza mpaka sigo oohwiyaka, opwa thigala ashike itaayi yaana omafo,” osho a ti. Uupuka mbuka wuna omalwaala ga yooloka nonando owa faathana meholoke po otwaadha tawu ende wuuka mepya tawu kongo mpoka pena iikulya opo wu lye pethimbo Kundana a talele po Etunda oshiwike shika.

Uupuka mbuka uunene konyala to vulu okuwu yeleka muunene wawo nomagungu nenge nomankandyangali,ohawu endelele niishewe ohawu li neulumo.

Mbuka owuna omalwaala omaziza, omandjimbi, omaluudhe naangoka gafa uuhutu. Mbuka Kaanyena opo ewu mono lwotango monkalamwenyo ye yokufaalama niikapa omimvo ne dha piti po.

Kaanyena okwa ti okwa hogolola okukuna iikapa neinekelo okuimonena iiyemo konima sho epya lye moka a li a kuna epungu lya hanagulwapo niimeno ye ya lethekwa po kokapuka kedhina African armyworm oshowo hoka haka ithanwa American bollworm.

Nonando aanafaalama oya kambadhala okupombela uupuka mbuka nomuti gwoCyperfos mbuka itawu si kugo ohawu fe ashike wa fa wa sa nokonima ohawu yumuka po ishewe noku tsikila tawu li po iikunwa mbyoka ya thikama natango.

Aanafaalam mbaka aashona noyopokati oyi ikwatelela mokulonga omapya gawo ngaka opo yiimonene iiyemo ya vule wo okufuta omayakulo galwe. Oya ulike uutile wawo kutya otashi vulika ya kale inaaya mona mo sha momapya gawo moka nuumvo.

Kaanyena okuna uutile nomaipulo kutya oteshi pititha ngiini okufuta oongunga dhe dhomeya, uuhoho noombuto, unene tuu sho okapuka hoka keya thigi pomutenya oshoka inaya tegelela eteyo lya sha momapya gawo.

Okwa ti oshikwawo oshikukuta shoka sha tsikila otashi ka dhigupaleka oonkambadhala dhe okupalutha aanegumbo lye molwashoka okulonga mepya oko onzo yimwe yokuimonena iikulya nokuhupa.

Kaanyena okwa indile uuministeli wUunamapya , Omeya Nomakuti opo wu ya hupithemo miikaha yuupuka mbuka molwashoka etegameno lyawo okulikola sha momapya gawo kali po we lya kola.

 

LEAVE A REPLY

Please enter your comment!
Please enter your name here