Ehepeko lovaAfrika moSA eli ningilile mo

0
99

Ongalo yomahepoko nomadipao taa ningilwa ovakwailongo moshishiindalongo South Africa okuli efano lii kuAfrika notaa teya po oukumwe woilongo menenedu Afrika.

Heeno shili okuhena oilonga omukundu wa taalela ounyuni aushe, ashike ounyuni aushe owe li pumbwa, unene tuu ovaAfrica otwa pumbwafana.

Oilongo yauninginino eshi ya xuma komesho noya putuka itu dule, osheshi vakwetu ova kala nale vena omakwatafano mawa, nomolwa omakwatafano oo, ova dula okulongafana noukupukululafana unene pamaxupilo nexumokomesho ngee lomatungo ile loutekenika oo uli etindi lexumokomesho leputuko.

Omolweputuko olo lili moilongo yomouninginino, ovaAfrika otava mboboloka va yuka koilongo oko opo vaka konge ouxupilo.

Ovo hava mboboloka muAfrika va yuka koutokokelo ova kwatela mo oiwana aishe yaAfrika, mwa kwatelwa yoo novaSouth Africa.

Eshi nee tashi ku kumwifa osheshi kutya ovo hava i koi longo oko oto hange tava nyenyeta tava keme kutya oilumbu oina okatongotongo kokakombo noludi. Novalaule ovo hava ningilwa omahepeko, koilongo oko ove li ko tava kuu. Hano omunhu ngeenge a tiwa sha, nande omomapyopyapyo, ashike ina lulumikwa kolutu –nghuo nokOndonga, ye koAfrika okwa dja ko a tetaula mumwaina nomakatana ile emu xwikila metaiyela.

Nghee omunhu a kuwa vati oilumbu oina okatongo, vati ina i hala ovalaule, vati ota i hepeke ovalaule kolutu nokomwenyo. Ndee nghee nee twa popya.

Hano paife otwa hala tu kale tu holike kulye ngeenge nafye vene katu li hole? Oto teelele ngaheli pi shilumbu a kale ehole omulaule ngahelipi ngeenge fye nafye ovalaule inatu halafana?

Ohole yopaumwanaifana oya pumbwa okutameka meni laAfrika, nongaha oukumwe waAfrika ota u nghonopala opo Afrika li dule okulwifa omashongo eli taalela, ngaa ooluhepo mwa katelwa okuhena oilonga, ile opaliko.

Afrika oshiwana shimwe, otwa tukulwa ashike keengaba odo dili momadilaadilo, nokuli da tulwa po kovakolonyeki, ndele ha kovaAfrika fye vene. Ovakondjelimanguluko vamwe ovatetekela vamwe tu va na voo tatekulu Sam Nujoma, Kenneth Kaunda, Samora Machel, Jomo Kenyata, Nelson Mandela, navakwao ova lwa opo Afrika alishe limanguluke pa politika. Fye otwa pumbwa tu twikile ko opo enenedu li manguluke paliko.

Ngeno katwali omunhu umwe, ngeno ina tu kwafafana opo oilongo yaAfrika, mwa kwatelwa Namibia naSouth Afrika i manguluke.

South Africa nasho osha manguluka, sha kwafelwa koiwana ikwao yaAfrika. Noshayela kutya pefimbo loita yekondjelo manguluko, kapali nande pena eendjidikila, ile eudafano kutya omakwatafano nomakwafafano pokati koilongo yaAfrika otaaka xula ngeenge Afrika alishe la manguluka.

Pefimbo loukoloni, ovaSouth Afrika ova kala ashike moupongekwa moilongo ikwao yaAfrika. Ndele kapena nande ovamwe vali va tomekwa omindilo ile va kufilwa omakatana shaashi tava mane po oilonga ile tava li po oikulya yoshiwana shonhumba. Ovanhu ova kala ashike veli tala ko onga omunhu namumwaina. Ashike paife eshi emanguluko lopapolitika leya, oiwana ita i tale vali konima.

Sho vali South Afrika naye oku na eengeshefa ile ovakwashiwana vaye veli moilongo ikwao yaAfrika, tava ngeshefa ile vakutwa, ndele ova tambulwa ko ashike nawa, sha talika ko onga oshitukulwa sheputuko.

Nge owa tale moNooli yaNamibia, omwa li muna ovanangeshefa vahapu hava landifa oikutu noikulya, ngaashi a Continental domunangeshefa Frans Aupa Indongo, Oshinanena shomufimanekwa Usko Nghaamwa, Punyu, Nakambonde, Namundjebo vavakwao vahapu. Eshi eengeshefa dovaSouth Afrika de ya moNamibia nosha yela kutya oda ya moilongo ihapu ya Afrika, ponhele yokutukula ouxwapindi, noku ningila eengeshefa odo owii, ile kutiwe ode uya okudipaa po eengeshefa domoshilongo.

Ovanangeshefa ovo vomoshilongo vamwe ova ya meengeshefa dimwe dilili, omanga vamwe ova ya meengeshefa doukumwe neengeshefa odo da dja kondje yoilongo. Osho ina shi kwafela ashike paliko, ashike osha kwafela ovanangeshefa opo ve li longele ko sha, okueta po oilonga noku yuululilafana omakwatafano opaipindi pokati koilongo.

Kapena nande oshilongo sha putuka nokuya komesho kusho vene. Ovanhu atushe otwa pumbwa fana. Fye otu na okudimbuluka kutya, nonande otwa manguluka pa politika, Afrika onghee ngaho eli moupika wopaliko. Nongeenge otatu lwifafana onga omunhu namuwaina, ohatu nghonopaleke ashike ovo va kolonyeka Afrika paliko, nokatu na efiku tu manguluke.

LEAVE A REPLY

Please enter your comment!
Please enter your name here