A fumvulithwa mo ongombe yii sila

0
1181

KuLoide Jason

ONAMUTENE-Omukalimo gwomOnamutene Shapwa Andreas okwa fumvulithwa mo ongombe yii sila moshilambo moka a li eyi fumvike.

Elombwelo kutya ndjoka nayi fumvulwe mo olya gandjwa kumwene gomukunda Iikokola sho anuwa inaa pula epitikilo opo eyi fumvike.

Shapwa ngoka eli omukalimo gwomomukunda gwIikokola poongamba ashike dhomukunda ngoka a fumvike ongombe ndjoka okwa hokolola kutya ongombe ye yondumetana oyali tayi ehama nokwali eyi wende opo ando yi tyepo hwepo.

“Sho nde yi wende ngaaka omasiku gaali ga landulathana oya si nonda mono kutya kayili pondondo yo kuliwa kaantu na oshihwepo ndi yi fumvike pehala ndyoka lyaandjuka kaalili mokati kaantu”, Shapwa a ti ngaaka.

Okwa tsikileko kutya ye shili mwene gwomukunda ine mu lombwela oshoka okwa li ta endelele opo a fumvike ongombe ndjoka yi kale inaayi liwa kaantu oshoka opuna uupu aantu mboka ya ehame ngele ya li ongombe yii sila.

Nonande oombangi dhimwe odha ti ka dhi wete shi li mondjila okufulula mo ongombe ya fumvikwa nale, mwene gwomukunda ngoka a gandja elombweo okwa ti ongombe nayi fumvulwe mo opo yi vule oku fikwa po.

Hileni Mbeeli okwa hokolola kutya Shapwa okwa endela ko kantu oshoka ye okwali a hala ongombe ndjoka yi fikwepo.

“Sho nde mu lombwele kutya ngombe ndjoka nayi fikwepo okwa ti kena okapalwa nondali nde mu pe okapalwa hoka. Ihe nee nduno omahooli inandi ga dhilaadhila opo ongombe yi vule okulunguna po thiluthilu,” Mbeeli a ti ngaaka.

Okwa tsikileko woo kutya anuwa opwa li puna ehilathano pokati kawo na Shapwa oshoka okwe mu lombwela a fikile ongombe moshilambo ihe Shapwa okweyi kutha mo eteyi fikile komutuni gwelambo ndyoka.

Shoka tashi halutha ooshika kutya anuwa ongombe ndjika inayi pyapo we ngaashi shali elalakano ihe oya ka polagulwapo kaakwashigwana mboka ye yi lya po thiluthilu.
Ihe shika Shapwa okwa ti hasho shali elalakano lyoku fumvika ongombe ndjoka ihe okwali okukaleka po uundjolowele waantu yomomudhingoloko ngoka.

“ Sho nduno elaka lyamwene gwomukunda ihaali kondwa onda longo sho nda lombwelwa. Ihe nonando osha yonukila mbyoka kayi shi iilonga yandje. Ngele opwa li pwa lopotwa omuntu kuuvite nawa molwongombe ndjoka ando ngame kandimo mwaashoka. Oshoka sho nda fumvike oosho kaa ndi na omahooli, yo ongombe ihayi lunguna inaayi tilwa omahooli,” Shapwa a ti ngaaka sho a pulwa kuKundana.

Ashike Mbeeli ndhika okwe dhi tala ko dhafa dhowala ta ti mpoka pwali pwa fumvikwa ongombe ndjoka opo hapu ku nguluka omeya nomeya otaga ka kaka ngele ongombe ndjoka oya fumvikwa mpoka.

Oombangi odha ti omukalo ngoka Mbeeli a ungauka noshinima shika ka gu li mondjila nokwa pumbwa okushendja onkalo ye yuuntu.

Ihe ndhika okwa ti odha nakalindi ye okwa lombwele ashike Shapwa kutya ngele iti iyutha koompango dha mwene gomukunda nena oshilanduli ote shi mono.

Mbeeli nonando oshilanduli shoka okwa tindi okushi fatululila omutoolinkunda .
Mbeeli okuli pehala lyomwanamati ngoka oye a pewa omukunda konima yeso lya he.

LEAVE A REPLY

Please enter your comment!
Please enter your name here