Iitopitha nayi lopotwe kopolisi mbala

0
130

KuMaria Namupala

OKATOPE – Omukuluntu gopolisi moshitopolwa shaShikoto Kommissiona Anna-Marie Nainda okwa kumike aaShikoto ya kale taya lopota iinima tayi limbilike mbyoka taya mono momidhingoloko dhawo.

Kommissiona Nainda okwa ningi ekumiko ndika moonkundathana naKundana, konima sho kwa konekwa kutya moshitopolwa moka onkene natango tamu iitsuwa iitopitha yopakwiita pomahala ga yooloka. Oyindji yomiitopitha mbyoka ohayi itsuwa naantu mboka haye yi mono oya fa inaaya nongela kutya oya nika oshiponga.

Nainda okwa kumagidha aakwashigwana ya angale okudhana niinima kaaye yi shi, oshoka osha nika oshiponga noonkondo, ta ti oyindji yomiitopitha mbyoka ya li hayi longithwa pethimbo lyiita yekondjelomanguluko ohayi adhika unene kohi yevi.

Okwa ti nonande aakwashigwana haya kala noku tseyithilwa ya kale kokule niinima mbyoka ya nika oshiponga, oyendji ohaya dhini omalombwelo ngoka, no ihaya lopota iikwaholo mbyoka kopolisi.

Okwa londodha kutya uuna omuntu gontumba ta ka monika a pungula iilwitho nenge kehe tuu shoka sha nika oshiponga opolisi otayi mu katukile onkatu yomeendelelo.

Opolisi mOshikoto oshiwike sha yi oyali ya hanagula nokufika po iilwitho mbyoka, yimwe yeetwa kaakwashigwana sho yali ya tseyithilwa kutya ngele opuna gumwe ena iitopitha nenge eyi itsu na lopotele opolisi, oshowo ngoka ena iilwitho shaa li paveta.

Yimwe yomiitopitha mbyoka ya hanagulwapo nokufikwapo kopolisi ongaashi oomboma dhalongwa moSouth Africa dhili heyali inaadhi longasha niikuti nooholo dhili 10 359 mwa kwatelwa mbyoka yali ya lopotwa kaakwashigwana, pethimbo ya lombwelwa ya kale ya lopota iinima mbyoka tayi limbilike.

Oshikonga shokugongela iilwitho niitopitha osha tamekele muAguste omumvo gwaziko, noyindji oyi itsuwa komukunda Engoyi muDeseba. Okwa thanekwa oshikonga shika shi hule muMaalitsa nuumvo nokwa tegelelwa kehe ngoka ena iitopitha a kale eyi lopota kopolisi yo tayi ka talwako manga inaayi eta oshiponga moshigwana.

Omukwatakanithi gopolisi noshigwana Chief Inspekta Stefan Nuuyi okwa holola kutya iitopitha oya nika oshiponga, no hayi eta ekanitho moshigwana. “Otatu kumagidha kehe ngoka to kiitsa iinima yili megumbo lyoye, mepya nenge kehe mpoka tweende waa yi kwate ihe wu tseyithile mbala opolisi ndjoka yili popepi nangoye, yo tayi ilwapo mbala,” Nuuyi a galikana. Okwa kumike wo aavali ya longe aanona momagumbo opo ya angale okudhana iinima mbyoka taya adha momalundu kaayi shiwike, yo ya kale taya tseyithile aavali, opo mbaka ya ka lopote kopolisi meendelelo manga inaayi eta oshiponga.

LEAVE A REPLY

Please enter your comment!
Please enter your name here