Nakufekelelwa omindaba a pewa eedula 35 mokakuma

0
4045

KuHelvy Shaanika

Ongwediva- “Owa lombwela omhangu kutya omolwashike wa dipaela omunhu, ashike ino holola kutya omolwashike wali una okuteta ko oulumenhu waye.

“Eshi osha yela kutya ino hala okuyelekela omhangu kutya omolwashike wa longela oilonga youbalibali nomolwashike wali una oku diapela omunhu oipundjamenye,” osho omupanguli Marlene Tomasi a popya omanga ina tuma Silas Shilamba kondjendililo.

Shilamba okwa kala modolongo okudja mu Apilili 2015, sha landula eshi a li a dipaa, nokuteta ko oilyo youlumenhu yomunamudo 44 Lazarus Hangula womomukunda Ehoma mOkongo mOshitukulwa shaHangwena. Pefimbo taka dja mo modolongo, Shilamba oo paife ena eedula 28, otaka kala ena omido 63 eshi efimbo lokumangululwa tali fiki.

Hangula oo ali ena oulema wokupopya nokuuda ko, okwa li tadi koukukamba vopomukunda wavo opo, eshi a ponokelwa nokutuwa nombele kuShilamba manga vali tava ende moixwa.
Shilamba okwa li ena eedula 26 pefimbo loshiningwanima. Otaku hokololwa a kutula Hangula omunino ndele ta tete ko oulumenhu waye, ndele ta i nao.

Oulumenhu oo fiyo onena ina u monika. Kongodi yaye vati okwali kwa hangika etumwalaka eli tumina omunhu wonhumba kutya “Oinima ei mwa tuma nge ondei mona.”

Konima yokudipaa Hangula, Shilamba okwe ke litwa vali omukainhu mondjila, ndele ta kendabala okumu kwata onghonga. Lao linene omukainhu okwe mu dula eenghono.

Omukainhu okwa li adula okufaduka po, nonande a tetwa kuShilamba nombele peke. Eshi a hangwa kopolifi, Shilamba okwa hangika nale a tauluka omikunda nhee lwaapo, a yuka lwokoAngola.

Ovakwashiwana vamwe ovali tava fekele kutya Shilamba otashi dulika ali a tumwa oilyo yoidalifi keendudu nokwaava hava li omindaba. Ashike edi Shilamba ine di hololela omhangu. Eshi a pulwa kutya oulumenhu waHangula okwe u tula peni, okwa lombwela omhangu kutya okweu ekela shi manga ali mondjila a yuka keumbo lavo, nokeshi naanaa kutya openi eu ekela.

Shilamba okwa itavela momhangulilo yopombada mOshakati kutya oye shili a dipaa Hangula.

Ta ti ova li tava ende okudja koundingosho, eshi Hangula emu ponokela nomukonda. Ashike okwa dula Hangula eenghono, ndele omukonda tau wile pedu, teu toola po ndele tu u mu dipaifa.

Okwa dimina yoo kutya okwa monifa omukainhu oshiponga eshi emu teta nombele.
Okwa kendabala opo eli popile kutya okwali a kolwa.

Ashike Omupanguli Tomasi okwa popya kutya Shilamba otashi dulika shili a li a kolwa, ashike okwali eshi eshi ta ningi.

Omupanguli oo a ti kutya Shilamba ine ya lela pouyelele opo a hokololele omhangu kutya omolwashike a longela oilonga oyo i kukutu, okwa pa Shilamba ehandukilo lomido 30 molwa edipao nadikwao dili nhano molwa eehameko neponokelo lomukainhu.

LEAVE A REPLY

Please enter your comment!
Please enter your name here