‘Ooyene yomikunda landuleni omilandu dhElelo’ -Asino

0
180

KuMaria Namupala

ONDANGWA – Aawiliki yopamuthigululwakalo kohi yelelo lyopahedhi mOndonga oya indilwa opo ya landule omautho noompango dhelelo lyopamuthigululwakalo gwOndonga.

Eindilo nekumiko ndika olya ningwa kuAmushanga gwelelo lyOndonga Joseph Simaneka Asino pethimbo lyoshigongi shokomumvo shono sha ningilwe Olyomakaya ga yi mOndangwa. Asino moshipopiwa she okwa indile ooyene yomikunda ya landule ooveta nomilandu dhelelo lyopamuthigululwakalo. Okwa tseyithile oshigongi kutya okwa konekwa gamwe gomomalenga taga longo iinima pombambo, go itaga landula oompango nomilandu ndhoka dha tulwapo.

Okwa tseyitha kutya okwa lopotwa ooyene yomikunda yamwe taya thitike oondjila, omahala gomaulithilo nokudhina aakwashigwana mboka yeli mewiliko lyawo. Okwa ulike wo kutya momikunda omuna omaupyakadhi nomashongo gokwiikuthila evi, uufuthi wiimuna, oongeleka dhiiveva tadhi topola omazimo, omatukano, uundingosho womomagumbo naantu haya ende ya humbata iilwitho mokati kooyakwawo.

“Omukunda kehe nagu kale guna okakomitiye hoka taka kwatele iilonga ya go komeho.Haka na ka kale kwatelamo kapatashu, ookomitiye dhuundingosho oshowo amushanga gomukunda, natu kaleni woo hatu ningi iigongi momikunda dhetu tse tatu kundathaneni iipambele yamo,” amushanga a kumike.

Okwa ti ooyene yomikunda naya kwatele komeho iilonga yokweeta omahumokomeho momikunda ngaashi omanongelo gopetameko, oosinagoga, olusheno, omeya, oondama dhokupungula omeya pethimbo lyomvula opo ngaka ga ka longithwe uuna omvula ya sheka oshowo oopolyeka ndhoka dhili muuwanawa waakwashigwana yamo.

Okwi itaala kutya uuna omilandu tadhi landulwa kwaayehe momikunda, nena nomayambulepo gomukunda otaga ende nawa.Ishewe ayihe mbyoka tayi lalakanenwa otayi adhika uuna ooyene yomikunda yiimanga kumwe naakwashigwana yo taya longo muukumwe pwaana omanyenyeto. Okwa indile opo ombili yi kalekwe po momikunda.

Tatekulu Asino okwa gwedha po kutya mpoka pwa holoka omangwandjulathano nomaipumomumwe nenge okwaa uvathana, naku ningwe omakonakono , ko ta ku nyolwa olopota, nokutala kutya omukundu ngoka otagu kandulwapo ngiini, yo ombili yi kalekwepo.

Ooyene yomikunda ayehe oya tegelelwa ya fale oolopota dhawo komunashipundi shomukunda gwe, ye omunashipundi tedhi thindikile kombelewa yoshilongo muKotoba omumvo kehe. Okwa tegelelwa wo ooyene yomikunda ya tseye oongamba dhomikunda dhawo, yo ya yande okulangeka momikunda dhaantu.

Ta ti omikunda ndhoka dhaana ooyene nadhi kale dha mona ooyene mbala, yo taya kwatele iilonga yomukunda komeho mono mwa kwatelwa eyo komeho. Ta pula ooyene yomikunda ya longe ngaashi omautho taga ti.

LEAVE A REPLY

Please enter your comment!
Please enter your name here