Osoccer moChina nayi pe aaNamibia uuwanawa

0
61

China okuume kaNamibia kopothingo. Okuza tuu sho a ningi omuwiliki gwoshilongo shoka momumvo 2012 Omuperesidente Xi Jinping okwa tula elunduluko muudhano wetanga lyokoompadhi moshilongo she ongoshimwe shiilalakanenwa yopombanda.

Osho shili, otwa koneke nookuli aadhanitanga aanamadhina muuyuni taya dhana moshilongo shoka. Shika oye shi ningi molwashoka China okwa tameka okuninga oshilongo oshinankondo muudhano wetanga lyokoompadhi.

Ethaneko enene olyo oku ninga China shimwe shomiilongo yili pombanda ngele tashi ya pokudhana etanga lyokoompadhi okuthika komumvo 2050. Oholomende yaChina otayi kumike opo omapungulo kepangelo oshowo okuza koshikondo shopaumwene ga indjipalekwe nelalakano okunenepeka omahupilo guudhano moChina okuya momumvo 2025. Okuyeleka naaNamibia tse mboka twi ipyakidhila noku shunitha monima oshitopolwa shomaudhano moshilongo.

Aawiliki ya China ayehe aluhe oya kala aanamathaneko gopandunge okuza tuu ku Sun Tzu sigo okOmunashipundi Mao nongashingeyi otatu popi Xi Jinping.

Omuwiliki kehe gwa China gwonale nenge gwongashingeyi okwa kala ena ondjodhi ya yela okuza tuu pethimbo kehe gumwe gwawo a pewa oshinakugwanithwa shewiliko lyaantu ye.

Moku galukila komakwatathano omawanawa pokati ka Namibia na China, ngoka ga tungwa po mbala mbala konima ashike yesiku limwe sho oshilongo shika sha manguluka. Ihe dhoshili aaNamibia oyendji inaya mona naanaa uuwanawa womakwatathano ngaka shuudhilila, Kakele kaanona yaanamadhina mboka ye li poondondo dhopombanda moholomende oyo ya mono oompito oku kiilonga niimaliwa yokwiilongitha koChina omimvo dhapiti po.

Ngiika onyama yongombe yaNamibia oya thika ngaa nee moositola dhaaChina, ihe nando ongawo otwa gandja po konyala odolla kehe ya li moshiketha shetu kaaChina okupitila megandjo lyiilonga yepangelo konyala okuza tuu kemanguluko.Egandjo lyootendela niilongadhalwa yimwe yoholomende oyindji oya kala noku pewa aaChina omimvo 26 dha piti.

Egandjo lyiilonga nenge ootendela olya hulupo omvogu onkene ngashingeyi ookuume ketu aaChina oya taalela iikwakuti yetu. Pethimbo ndika ohatu mono unene ookuume ketu mbaka koTiivii nenge miifonkundana konyala omwedhi kehe ya holoka moompangulilo molwiilonga yiikulumuna shina sha nuufuthi wiiyamakuti.

Ashike omushangi gwoshinyolwa shika okwa lesha miikundaneki kutya Omuperesidente Omundohotola Hage Geingob oku hole osoka.Onkene osho ondjodhi yomunyoli nguka osho wo yaaNamibia yalwe kutya Omuambasade gwaNamibia koChina Omundohotola Elia Kaiyamo a kundathane nookuume ketu opo tu mone aadhani oyendji taya kuthombinga moLiga yopombanda ya China noku joina aadhani aanamadhina ngaashi; Carlos Teves, Oscar, Ramirez,omudhani gwomokati kokapale gwa Nigeria John Obi Mikel nongashingeyi omudhani dhingi muudhano woAFCON 2017 ngoka hadhanene Cameroon, Christian Bassogog.

Aa Namibia otaya kala ya hala okumona Benyamin Nenkavu, Deon Hotto, Absalom Iimbondi, Petrus Shitembi, Oswaldo Xamseb na yalwe oyendji taya dhana etanga lyokoompadhi noku taamba iimaliwa oyindji okuza koBeijing. Opo pamukalo nguka Namibia ota vulu oku galulako yimwe yomiimaliwa oobilliona mbyoka ya tuminwa koBeijing okupitila mootendela ndhoka dha pewa aaChina.

Omushangi gwoshinyolwa shika ota thaneke kutya ewilikongundu lyootendela olina okutula po oshipumbiwa kutya ehangano kehe lyaa China tali mono otendela aaNamibia aadhanitanga omulongo oyena okutumwa ya ka dhane mooliha dhoshilongo shoka.
Oshikwawo moshipotha kehe shuufuthi wiiyamakuti muna omuChina aadhanitanga omilongo mbali naya tuminwe koBeijing.

Elalakano nali kale okukala tuna aadhani etehele limwe haya dhana moliha yopombanda ya China okuya pomumvo 2020.

Nongele aaNamibia otamu dhimbulukwa nawa omudhanitanga nale gwa Namibia Eliphas Safile Shivute okwa li gwotango maaNamibia ngoka a mwene ompito yili nawa oku ka dhanena ospana yetanga lyokoompadhi yoShengzen Football Club ndjoka ya li moliha ndjika momimvo dhomilongo 90.

Onkene omushangi gwoshinyolwa shika okwa itaala kutya oshi li muuwanawa womuNamibia kehe okukaleka po omakwatathano omawanawa pokati kiilongo mbika iyali.

Eeno omakwatathano goshili moka omwaalu gwaaNamibia yeli moChina gu thike wo pomwaalu gwaa China mboka yeli moNamibia.

Oshinima shika otashi vulu okuningwa manga tse tuna omwenyo, tashi vulu nookuli oku endelela unene tuu kohi yomathaneko nethimbo lyoHarambee.

Onkene aagandjimayele aaholike moombelewa dhOmuperesidente gwaNamibia mboka tamu lesha oshinyolwa shika alikana longeni shoka shi li mondjila sho tamu faalele Omupresidente oshinyolwa shika oshowo sho tamu shi tumine kuAmbassada gwaNamibia koBeijing.

LEAVE A REPLY

Please enter your comment!
Please enter your name here