Sophee a pititha tango Rise Again

0
387

KuMaria Namupala

ONAYENA – Omuhikingalo ngoka opo eya moshimpungu shuuhikingalo Esther Namushinga a tseyika nawa Sophee, omasiku ga zi ko okwa pititha oalbuma ye yotango ndjoka ta ti oyopandjokonona.

Sophee ngoka ha hiki oongalo dhopambepo no po a tameke okudhi hika, okwa valelwa nokuputukila mOnayena naakuluntu ye, okwa kala e hole okwiimba koosikola dhoSondaha nolundji okwa kala hayi koontanda ye tiimbi naanona ooyakwawo.

“ Meputuko lyandje onda kala ndi hole oondjimbo dhopambepo, nonda kala nda hala ondjodhi yandje yi ninge yoshili, onda kala ndi hole okupulakena iihikomwa yomuhikingalo omuSouth Afrika Rebbeka Malope,” Sophee ta ti.

Okwa holola kutya nonande a kala ehole oongalo dhopambepo osha kala she mu nyenga oshoka ina kala eshi ondjila ndjoka ena okweenda , ye a wayimine ehangano lyaahikingalo aaNamibia. Okwa ti okwali a tameke okweeta po oalbuma ye ndjoka yotango omumvo gwa zi ko, ashike omolwomatompelo gontumba no go ngandi ina vula okuyi pititha.

“Shika onde shi ningi mekwathelo lyomusamane gwandje, ngoka ena ostudio hoka oko twa kwatela oalbuma yandje, ondu uvite etumba mokweeta puuyelele kutya oalbuma yandje oya pita ngaashingeyi naaholi yoondjimbo dhopambepo otaya vulu okuyi imonena,” osho a gwedha po.

Okwa ti oalbuma ndjika otayi ithanwa Rise Again, nomuna oongalo dhi li 11, mono mwa kwatelwa oholikengalo tayi ithanwa When you fall rise again, ta ti owundji womuungalo we otawu gandja etsomukumo kaaNamibia yaa ha tyololoke noku tenguka ihe ya pule komeho noonkalamwenyo dhawo.

Sophee ta tsikileko kutya oongalo dhe otadhi landwa noonkondo nokwa hala a pitithe natango oalbuma ye ontiyali omumvo nguka, ta ti okwa hala noku halelela a yambulepo oongalo dhopambepo, ye a gandje etumwalaka lyopambepo tali tungu oshigwana.

“ Oongalo ohadhi pulakenwa nomuntu oha kuthamo etumwalaka. Pethimbo ndika oongalo odho oshinima sha simana muuyuni okupititha etumwalaka liye nuuyuni awuhe, nonande opo nda tameke otandi kambadhala ndi kaleke po oshipewa noshitalenti shandje oshowo ohokwe yandje yoongalo noondjimbo dhopambepo,” a uvaneke ngaaka.

Okwa thaaneka oku kala tiimbi oongalo dhe piituthi ya yooloka, nokwa hala aantu ya kale taya pulakene oongalo dhe. Okwa indile aahikingalo mboka opo taye ya mowela kaaya se uunye ihe ya tsikile, oshoka kapuna oshilonga hashi longwa nuupu ashike eidhidhimiko olyo owala lya pumbiwa.

Sophee sigo oompaka ina tsakaneka omashongo ngoka tage mwiimbi okuya komeho noongalo dhe, nokwa tokola oku tsikila komeho mewiliko lyOmushiti. Okwa pandula ookuume ke, omusamane gwe oshowo aakwanezimo mboka ya kala noku mu kumika.

LEAVE A REPLY

Please enter your comment!
Please enter your name here