Efundja oleya

0
543

KuHelvy Shaanika

Ongwediva – Efundja olo la kala taku fekelwa kutya otashi dulika li uye neudo ile li kale ko ole ya nokwa teelelwa li fike diva monooli, ile la fika nale nokuli.

Ovanawino moshikondo shomeva kouministeli wOunamapya, Omeva nOmaluxwa ova lombwela Kundana kutya oku ya pexulilo loshivike shadja ko, efundja ola li la fika mOndjiva.
Shaashi oyana oi yadi, efundja ola teelelwa li fike efimbo keshe monooli yaNamibia. Ngaashi naanaa li shivike nawa, efundja ohali eta opo ovanhu vahapu monooli, unene tuu mOshakati opo va yelulwe, naluhapu omalelo eedoolopa noopaitukulwa ohaa tululula ovanhu pakafimbo.
Neudo onghalo yefundja oya teelelwa ikale ya nyelevala, unene tuu kwaavo veli momalukanda, , ngeenge odula oya twikile nomuloka muwa ngaashi tai shi ningi.

Mongaha, Elelo lOdoolopa yaShakati ola tembula nale nokuli ovanhu veli 254, ovo va li va yelulwa komeva odula.
Ovanhu ovo ova dja momaumbo 51 mOshakati.

Ouyelele wa pitifwa komukulunhu welelo lodoolopa yaShakati Werner Iita, elelo ola dika eetenda 18, omo la nangeka eefamily dili 51. Ovo va kumwa kefundja ova dja momalukanda ngaashi laPohamba, Oshoopala neEvululuko. Omalukanda makwao kaali naanaa aa kumwa unene komeva odula. Ondjele yomeva momalukanda ngaashi Ekuku nEhenye, oya lopotwa tai shuna pedu.

Ashike nonande ongaha, Iita okwa pula ovakalimo vomOshakati opo veli kwafele oku pa vakwao omalukalwa, oikulya nosho tuu ngeenge pena umwe a yelulwa.

“Eshi osha pumbiwa molwaasho elelo kalina naanaa oikwafifo ya wana, nosho yo eenhele domatulilo opakafimbo,” Iita osho a ti

Iita okwa kumaida oshiwana opo shi lopote kelelo ngeenge sheli hange monghalo yeyelu. Ta ti kongodi oko taku dulu okudengelwa ngeenge pena sha, sha endelela oyo 0811448222.
Ta kunghilile yoo ovashingi voihauto kutya eepate dihapu modoolopa yaShakati oda mona oixuna komeva, onghee ovashingi ova pumbwa okushinga noukeka.

Iita okwa kunghilila natango ovo va tulululwa opo veli vangeke komalihumbato mai oo a kwatela mo oumbudi nomapiyaano elili nakulili efimbo veli peetenda domatulululo.

“Elelo ota li kumaida vali ovakulunhu vaha efe ounona vavo va danauke momeva. Ohatu shivifile yoo ovakalimo vomEkuku kutya elelo otali tungu omutunda oo tau ka yukifa ekunguluko lomeva konhele imwe ilili opo aha ye vali molukanda lavo,” Iita ta udaneke.

LEAVE A REPLY

Please enter your comment!
Please enter your name here