Eta keshe lomeva ola fimana

0
89

Komutoolinghundana

WINDHOEK – Nande odula ya loka nawa oitukulwa aishe yoshilongo, elelo loshilando shaWindhoek oli na ekunghililo lowina kovalongifi vomeva moshilando va twikile kukwata omeva nawa.

Ekumaido eli ola popiwa komupopiliko welelo loshilando shaWindhoek Lydia Amutenya kutya, oshiwana nashi twikile nokungungunina omeva ngaashi shito. Nande odula ya loka nomeva a talama fiyo opapa Namwater ina yandja epitikilo kombinga youhapu welongifo lomeva.

Okudja 2013, elelo loshilando shaWindhoek ola tula moilonga eeveta da kelela ehepeko lomeva.

Oshilando shaWindhoek osha shiivika hashi longifa omeva mahapu shaashi moWindhoek omuna ovakalimo omayovi 350 vahapu ve dule ovakalimo meedoolopa adishe moshilongo.

Muni okwa tula po eeveta opo omuneumbo keshe moshilando a kwate omeva nawa shi kwafele ekwato nawa lomeva oo e li meendama, shi ninipike ofuto yomeva. Muni okwa tula po oveta ku patwe eengeshefa dimwe dokukosha omatuwa moshilando. Omunambelewa nomupopiliko woshilando shaWindhoek ta twikile ko kutya, eepelesenda 75 domeva aMuni ohaa di kuNawater noshixupe 25% omeva oo ohaa di meedjo daMuni ngaashi omeva a longa nale haa longololwa oshoyo omeva haa di meefifiya doshilando shaWindhoek.

Oshilando nande sha faneka kukala neemboola dasho 12, eemboola omuwoi da uluka odo hadi yandje omeva haa longifwa paife. Amutenya okwa yelifa kutya Namwater ina tya sha kombinga youhapu welongifo lomeva okudja keendama Von Bach, Swakoppoort nOmatako edi odo hadi andjaneke omeva kovakali moshitukulwa shoponhofi yoshillongo fiyo omoshilando.

Ovakali moWindhoek natango otava tuwa omukumo va kwate omeva nawa ngaashi naanaa ve luufa keeveta dikwao da kelela ovakalimo va kale neengeshefa inadi pitikwa moshilando ngaashi dokukosha omatuwa nokulandifa oilandifomwa ngaashi okupatulula eembaa, okukala neendama dokuyowa, okututika ohofa opo i kombwe eshi osha kelelwa natango.

Nande oovene voungeshefa vokukosha omatuwa moWindhoek opo va yandje omukandakemo wavo kuMeya waWindhoek va pula epitikilo lokukosha omatuwa shaashi odula oya loka, fiyo opapa inava efiwa va koshe omatuwa nenyamukulo lavo inave li pewa natango.

LEAVE A REPLY

Please enter your comment!
Please enter your name here