Nakukutha Jahiteeri epunda ota pangulilwa edhipago

0
2589

KuMaria Namupala

ONDANGWA – Omukiintu gomimvo dhopokati okwa holoka mompangu ya mangestrata gwaNdangwa Etiyali oshiwike shika ta pangulilwa edhipago noshowo okuhoya omukiintu omukwawo epunda, shoka shili kondje yoveta.

Otaku hokololwa Jahiteeri Nyanyukwa Nuuyoma gomimvo 28 a hulitha pethimbo ali ta kambadhala okwiikutha epunda, ali te shiningi ta kwathelwa kukuume ke. Ndinelao Matilde Mateus okwa holokele komeho gaMangestrata Peter Nangula mompangu ya Mangestrata gwaNdangwa, taku fekelwa kutya oye kuume ka Nuuyoma ngoka a kambadhala andola emu gwithe epunda.

Ina pulwa a tye sha komatamaneko ngoka gaali noshipotha she osha undulilwa komeho sigo omomasiku 28 Apiilili nuumvo. Omakonakono gopolisi moshinima shika otaga tsikile
Mateus otaku hokololwa a kwathele kuume ke emu kuthe epunda, shono sha hulile meso, oshiningwanima shika osha ningwa Osoondaha pUupopo mOndangwa.

Oshiningwanima shika sha halutha aantu osha kolekwa wo kOmukuluntu gopolisi moshitopolwa Oshana Kommissiona Rauha Amwele ngoka a ti nakusa okwa hulithile mondunda yaangoka emu kutha epunda Osoondaha ndjoka.

Okwa li wo a koleke kutya gumwe gwaakiintu mboka ya longo oshinima shika inaashi pitikwa paveta okwa mangwa po. Ye oye nee Matheus ngoka holokele mompangu Etiyali oshiwike shika. Omufekelwa omutiyali moshinima shika okwa li natango ta landulwa kopolisi.

Kommissiona okwa hokolola kutya nakusa sho a kwathelwa mokukuthamo epunda, okwa thigwa anuwa mondunda yomufekelwa, a pewa ashike oopela ndhoka inaadhi mu kwathela okuloteka etiko lyombinzi. “Pa mahokololo okwa thigwa a pewa oopela ashike inadhi mu kwathela molwaashoka okwa kanitha ombinzi oyindji unene,” Amwele a ti.

Okwa ulike eyeme lye sho moshigwana muna aantu taya longo omiyonena dhi thike mpoka, no tadhi zitha omahwilili, ta indile kehe ngoka ta longo iilonga yafa mbyoka eyi hulithe po.

Okwa londodha wo kutya opolisi otayi ka longa noku konakona iiningwanima mbyoka tayi inyenge moshigwana. Nakusa Nuuyoma okwa adhika a sa eli metente lyombinzi komushiinda shaanegumbo moka a li ta kuthilwa epunda. Omulumentu ngoka anuwa okwa li uuvu omainyengo taga limbilike nokwa yi a ka tale kutya oga shike opo mpoka okwi itsu mu Mateus a sa eli mekungu lyombinzi.

Omulumentu ngoka okwa tseyithile opolisi oshinima shoka.

Oonzo dhi shi okwi inekelwa odha kundaneke kutya Mateus nooyakwawo yalwe oya tseyika anuwa oyo ookapyoko mokugwitha mo omala gaakiintu mboka inaa ye ga hala. Nomolwiilonga yawo mbika ohaya futwa shi ikwatelela kiiyemo yomuyakulwa.

“Ohaya pula oondando dha yooloka noshimaliwa shoka haya pula oshi li pokati kooN$1000-2500 lwaampoka, aakiintu oyendji ohaye ya, ya kwathelwe okukuthamo nokuhoyamo omapunda gawo, yo taya futu nee oshimaliwa shoka,”Onzo yimwe tayi hokolola ngaaka.
Aapambele ya nakusa Nuuyoma mOshaandja moshitopolwa Oshana oya tseyithilwa nale oshinima shika.

LEAVE A REPLY

Please enter your comment!
Please enter your name here