Nestor oye tuu lye?

0
114

Komutoolinkundana

Windhoek- Opena onkulungu nomuhikingalo omupe a holokele moshitopolwa shoondjimbo nuupe we owa holoka molwashoka nguka opo ashike ta pititha okaCD ke kotango omwedhi nguka. Edhina lyonkulungu ndjika oNestor ya Metusalem.

“Otandi ka pititha oalbuma yandje yotango tayi ithanwa “Politics of The Heart” nondi iinekela kutya aaNamibia oshowo uuyuni palwe otawu kala we yi hokwa” osho Nestor a ti.
Onkene Nestor oye tuu lye na okwa zi peni opo eye mokuhika oongalo?

Oshoka okwa valwa megumbo lyaantu oyendji, okwiimba okwa li onzo onene yekwatathano kutse osho a ulike. Egumbo olya li eKritse onkene omathimbo ogendji gumwe oha kutha embo lyomaimbilo noku tameka okwiimba naayehe otaya landulamo.

Nestor okwa holola kutya moku putuka kwe okwa li ena ohoni nosigo onena ohoni inayi mu thiga po, ndele uuna a thithikile ye oha etha ewi lye li ngwelengendje memanguluko. Ihe kali ena ompito okuilonga omaimbilo pamwe naanegumbo, onkene okwa mono ompito moshimpungu shomusiki unene tuu ndjoka yoludhi lwo R&B[rythm and blues] nomitono dhayo dhohole.

Lyo ndika olyo etompelo Nestor ngoka oongalo dhe hadhi kwatwa kehangano Hametu Music ha imbi oondjimbo dhohole, nonando oku shishi kutya oshigwana ohashi dhiladhila kutya omulumentu ngoka e hole okwiimba oondjimbo dhohole okuna sha shapuka momutse gwe.
Etokolo lye okuimba olya tameke pethimbo ali momuhandjo penongelo mOshomeya kokule negumbo lyaandjawo.

Okwa ti uuna ayi kegumbo pethimbo lyefudho oha ndhindhilike kutya aantu yaandjawo oha adha ya ya kokule montseyo yoondjimbo. Kehe gumwe oha ulike kutya okwa ya pombanda mokwiimba, naamwayina aashona nayo oha adha ye na ontseyo ohwepo momitono dhoondjimbo kuye. Onkene shika ohashi mu dhigupalele opo a kale pomuthika guthike pwaangoka gwoyaandjawo.

Shika kuye osha li tashi ngwangwaneke oshoka kosikola pethimbo lyokapause uukadhona owali we mu iindile opo ewu imbileko omaimbilo gohole ga hikwa ku R Kelly naWestlife. Nenge aalongi oya li ye mu indile opo a kwatele komeho omaimbilo powandaha.

Ihe kegumbo ewi lye olya li hali thindilwa pevi komawi gaamwayina ngoka goopala molwashoka yo ohaya kala taya ilongo okwiimba esiku kehe.

Ihe esiku lye olya ka thika omanga eli mondondo 12 nokwa li ha zi mohostela yopaumwene moka a tsakanene nookuume moku imba oongalo noku hika iiyimbo nongeyi okwa tameke eithano lye lyopamusika. Mbaka oya toto po ehangano lyomusiki hali ithanwa Cool Cats nomusika yawo yotango oyi ithnwa Hobby.

Mo universiti Nestor okwa hokwa okulongitha okompiuta nuunene tuu oshilongwa shokuthaneka,okukwata omawi noku tula mumwe nokwi ilongo mbika oku yi tseya nawa.
“Esiku kehe ohandi kutha ewi nomutono gwokwiimba na ohandi holele okwiimba iitya mewi ndyoka, oshoka onda koneke kutya onda pumbwa okwiishonga ngame mwene , ndi tale ngele esiku limwe, onda tokola okwiimba otandi ke shi gwanitha po tuu. Noshowo ngele ondina tuu shili ohokwe yoku kala omuhikingalo no hohokwe yuuhikingalo nenge pamwe otandi ithindile mo ashike’ osho a hokolola.

Momumvo omutiyali gwe mounivesiti ina vula okutsikila nomusiki oshoka okwa li a yi mopolitika yaanasikola naashika oshe mu manene po ethimbo no ina vula oku kwata oongalo dhe onkene okwa li ashike a tsikile noshilongwa shokuthaneka. Ihe momumvo ogo tuu ngoka Nestor omalupita okwa li ha ithanwa kostudio Ekiya moVenduka yokuumbangalantu moka tashi vulika omuhikingalo ha kala ta nyengwa kokwiimba opo a kwathele. Ethimbo sho lye ende tali piti po ye okwa tameke wo okwiimba oye awike a tameke tango neimbilo lye Smiling again.

“Momumvo gwandje omutine , kuume kandje Hazard Violla okwa hiya ndje kostudio opo ndika imbe pamwe naye mongalo ye , “ I don’t know’.Oku za mpoka otwa tameke okuimba pamwe omaimbilo ngoka omawanawa na oga hokiwa kaapulakeni yago ayehe.

LEAVE A REPLY

Please enter your comment!
Please enter your name here