Oalkoholi okwali omusamane ashike onde mu henga po

    0
    314

    Ku Alvine Kapitako

    Windhoek-Oku za momasiku 8 gomwedhi nguka Sophia ngoka a li omupika gwiikolitha ota ka tameka onkalamwenyo ompe yemanguluko okuza muupika womakende giikolitha.

    “Onda zalekwa iikondjitho okumwenya monkalamwenyo yaana oalkoholi, ndele ezulo lyandje nemangululo okuza muunkolwevu olya tameke momasiku 8 Maalitsa konima sho nda thigipo ehala lyokuzulwa noku toyithwa okuza kegundji lyuunkolwi” Sophia osho a ulike kombinga yehulilo lyolweendo luunkolwi noku tameka ondjila ompe yaana omalovu uuna a katuka okuza mezulonkalo lyedhina Etegameno konyala ookilometa omilongo ndatu kuumbangalantu waVenduka oshiwike shika.

    Sophia [edhina ndyoka lyaashi lye lyoshili] okwa ningi etokolo enene manga eli mezulonkalo pEtegameno kutya ota hulithapo ekwatathano lyuule konyala woshitine thelemumvo shimwe noalkoholi.

    “Onda kutha ombapila nopena nonda shanga ombapila okuhulithapo uukuume wandje nomalovu. Onda nyola ombilive nda ti, hello kuume kandje.Ngame otandi hulitha po ekwathano lyetu nangoye pambelewa. Eeno owa pele ndje omathimbo omawanawa nomadhimbuluko oshowo omaupyakadhi ogendji nuuwehame’ Sophia osho a nyola nokuhokolola kombinga yontumwafo ndjoka ye a shangele kuume ke komimvo odhindji.

    Sophia ngoka a hokolola omalovu noku ga ithana “omusamane gwe gwonale’ okwa lombwele New Era Weekend kutya okwa li a mono uuwanawa netalaleko momakende gomalovu ngoka ge mu kwatha okufadhuka po omaupyakadhi ge gopaumwene monkalamwenyo. Aakuluntu ye oya hengathana omanga ye a li ashike ena omimvo omugoyi.

    “Otwa tembukile kegumbo lya meekulu ihe nguka okwa ka mana oondjenda omanga ndina omimvo 12’ osho Sophia a hokolola. Ti idhana moonyala Sophia okwa tsikile ehokololo lye negundjilo.

    Okwa ti pomimvo ndhoka opo a tameke okulola oalkoholi oshowo iingangamithi ‘okufadhuka po onkalamwenyo yolela yesiku kehe’.Nando okwa tameke ongomunwi ha lolo mo ashike omalupita, okwa ka haluka kashona nakashona a ninga omupika gwoalkoholi.

    “ Onda kala aluhe handi ipopile kutya inandi pumbwa okuhokanwa oshoka ekende olyo omusamane gwandje. Ekende ihali yamukula omuntu, ihali gandja omalombwelo nohandi li longitha uuna nda hala okushininga’ osho a ti.

    ‘Ndjika oya li ondjila oku fadhuka po onkalo yoshili. Na osha li eipopilo okulongitha nayi oalkoholi. Onkene omathimbo ngaka ngame onda hengana nayo. Shika osha longele ndje nawa” osho a koleke.

    Sophia okwa hulithile eegameno lye koalkoholi pEtegameno, endiki lyezulonkalo lyaamboka yapikwa kiikolitha niingangamith lili pondje kuumbangalantu woVenduka moka ye a indile a kwathelwe uule womwedhi gumwe noshiwike shimwe.

    Moku shanga ombapila yetokolo kutya okwa hulithapo uupika womalovu osha li etokolo lye lya hugunina kutya ye ita shuna mo we mombwili yuunkolwi nomonkalamwenyo ye onkulu.
    “Ombapila onde yi gandja komuhungimwneyo gwandje ngoka eyi leshe le ndje naashoka osho shali oshikando shotango tandi uvu shoka ngame nda nyola.Kapena gumwe a lombwele ndje ndi nyole ombapila ndjoka. Onde shi ningi molwashoka onda tokola okuteya omalyenge guunkolwi ngoka ga li ga manga ndje” osho omunamimvo 37 a ti.

    “Onda tokola okuya huka ngame mwene.Ondi ilombwele kutya otandi ka manitha iiwike mbika itano oshoka ondina iilongitho okushi adha.Ndele omanga ndili muka onda li ndina edhiladhilo lyo ku shuna kokunwa oalkoholi” osho a ti.

    Okwi iyadha a yuulukwa ookuume ke aakulu mokunwa.
    “Esiku limwe komeho yoku ninga etokolo enene onda li tandi dhiladhila ookuume kandje mokunwa noonkundathana ndhoka twali hatu kala nadho. Ongula yesiku lya landula onda penduka ndina omulyo gwomalovu mokana nokuuka pethimbo lyomwiha okonyala ndi ye oonkwengu” osho a ti.

    Okwa matukile mbala komupangi noku mu fatululila shoka a li uuvite kutya okuna omaiyuvo tage mu thiminike opo eethepo etokolo lye lyokwaanwa we omalovu.

    “Onde mu lombwele kutya itandi dhiladhila we nawa. Ondu uvite omulyo gwoalkoholi mokana kandje ye nokwa pendje uuleke wosingamu yoClorets “ osho a hokolola.

    “Onda kambadhala ngaashi tandi vulu oku dhiladhila nawa ndele omadhiladhilo gandje oga kala taga shuna komulyo gwoalkoholi. Onda li ndu uvite omulyo lela gwoalkoholi.Okonyala ndi shune kegumbo nookuli. ‘Molwashoka okukala mezulonkalo olyo ehogololo lyoye omupangi okwa lombwele ndje kutya otashi kala oshiwinayi ngele onde etha etokolo lyandje unene tuu sho lyeeta ndje sigo omendiki lyezulonkalo’ osho a ti.Opo ihe mpoka ye okwa indile omupangi emu wende opo a vule okungungumana.

    “Onda kotha nongula sho kwashi onda tokola kutya tashiya nashiye itandi shuna monima. Shika osho she eta ndje metokolo lyandje enene lyokushanga ontumwafo yokuhenga oalkoholi” osho Sophia a tsikile.

    Oku ethapo uupika womalovu okwa pumbwa ekwathelo lyakola okuza kwaayehe.
    “ Owa pumbwa okukala wi ilongekidha pamadhiladhilo ngoye mwene unene tuu kiilanduli oshoka okwiikutha muunkolwi kashishi oshipu. Ito shi sindi ongoye awike. Kandi shiwo. Owu na okukala ngiika Maria nenge Jesus opo wu vule okushininga noku sindana ongoye awike.Oshidhigu lela’osho a ti.

    Uuna a kolwa nokuli monkalo yuunkolwi Sophia ka kele kokula uuvite nayi nokwa geela yalwe oshowo ta ulike uuhwapindi,okwa li wo ha popi shoka uuvite, omathimbo gamwe ha longitha nomatumbulo gaashi okupulakenwa.

    “Inandi hala we nando okumona onkalo ndjoka ngame ndali mo. Inandi hala oku mona uukwatya wuuntu wandje pethimbo nda li omupika gwiikolitha oomwedhi mbali dha piti. Onda hala okukala hwepo.Onda hala okukala omuntu ngoka ezimo lyandje hali vulu oku inekela”

    Sophia okwa koneke kutya okwa pumbwa okukonga ekwatho lyopaithano sho esiku limwe ongula yOmaandaha muNovomba 2016 iiyadha pomatsakaneno gomapandaanda lya Sam Nujoma na Robert Mugabe moKlein Windhoek.

    ‘Itandi ku lombwele kutya onde ya po ngiini mpoka. Onda li tandi ende koompadhi, osha li konima yotundi ontiyali koongulasha, no kandi shi kutya onde ya po ngiini’ osho iidhiladhila. Ota dhimbulukwa ashike shoka omumwayinamati emu lombwele. Kutya okwe mu dhengele okuza kongodhi yomweendanandjila ta indile opo emu ile po mpoka. ‘Itandi shi dhimbulukwa. Otandi dhimbulukwa ashike ndili pomalamba gomoondjila moKlein Windhoek naashoka sha landulako otandi penduka mombete yandje” osho a ti.Shika osho nee she mu petha omayele opo a konge ekwatho kEtegameno , endiki lyezulonkalo.

    ‘Oshinima shotango tandi ningi uuna nda zimo muka osho okupula edhimino po ku tate oshoka onda kala aluhe tandi kambadhala oku mu ehameka noku mu shundula. Onda li nde mu geela noonkondio molwashoka okwa henge po meme”Sophia a ti a tsikile kutya ye okwi idhiminapo mwene molwomaihumbato ga nika eyonagulo.

    Oalkoholi oya thiminike Sophia a tembuke megumbo lyaandjawo eta ka kala mokandingosho, moka omo a li a mono ondunda yokukala.Onkalo ye yokunwa oya kenyeneke sigo oompoka kutya ookuume ke koshili oye mu etha po noku mwi idhimbika.
    “Ookuume kandje oya tameke okutalela ndje monkalo yi ili.Onda li handi vulu okutameka okunwa pombali yongula ndele ethimbo lyokuya kiilonga ngele lya thiki otandi thiki wo kiilonga pethimbo nonda zala ndoopala nawa. Nongele ku shi ndje ito vulu okundhindhilika kutya onda nwamo momalovu oshoka ihandi popi ongomuntu a kolwa nenge a nwa.Oshikwawo ngame ihandi ende tandi funga funga ngonkolwi. Kandali he kala nda kaka na onda li handi longo nawa iilonga yandje natango ngaashi ashike handi shi ningi uuna inaandi kolwa.

    “Ihe ngele owa li wu shi ndje nawa ando oto mono momeho gandje. Onkene ookuume kandje mboka ya li ye shi ndje nawa oya tameke taya thigi ndje po oogumwe noogumwe. Onkene ondi iyadha ashike nda thigala po naamboka aawinayi.”

    Verona Du Preez omuwiliki gwendiki lyezulonkalo Etegameno okwa ti oku shi aantu oyendji ngashingeyi mboka ye li monkalamwenyo yaana oalkoholi konima yoku konga omakwatho gopaithano.Okwa gwedha po a ti opo omuntu a tsikile nokusindana okuna oku kala ena eitulemo enene.

    Utya oshipumbiwa shimwe okutaambelwa mezulonkalo ndika osho omuyakulwa a kale ena omukumo gwakola kutya okwa pumbwa ekwatho noshitiyali okuna okuzimina kutya okwa pikwa komalovu nenge kiingangamithi.

    Aanto oyendji ohaya kongo ekwatho lyopahungomwenyo uuna ookuume kawo nenge aakwanezimo ye ya tilitha nokuya henga po.

    Sophia ngoka uuva nayi kushoka a longa okwa popi ta fudha muule a ti. “Ino kambadhala nando. Ino kambadhala oshoka omalovu ogo omawanawa noku kutha po. Kokutya omawanawa momwiityo omwiinayi’Okwa gwedha po kutya alkoholi oha yonagula eisimaneko mwene, ondhilo oshowo ookuume aawanawa.

    “ Ohayi vulu wo okukutha po efamilia lyoye.Lago enene kungame onde shi mono kaayakulwa yalwe kutya ezimo lya ndje ina li etha ndje ongame awike. Opena natango etegameno nando eshona”

    Okwa ti ekwathelo ndika ewanawa olyo lya pumbiwa kwaamboka taya tembuka muupika wuunkolwi.

    LEAVE A REPLY

    Please enter your comment!
    Please enter your name here