Omolwashike una okutungila moshana

0
81

Onghalo hai kala ya taalelwa komalelo eedoolopa, unene kwaali laShakati omudo keshe ngee kuna omuloka, otai dulu okukeelelwa.

Keshe komudo ngeenge kuna omuloka ovanhu omayovi hava di momalukanda mOshakati ohava tulululwa, tava kufwa moyana omo va tungila shaashi omaumbo avo eyadi omeva.
Keshe dula epangelo ohali longifa oshimaliwa okupa ovanhu ovo oikulya, okukonga nokudika eetenda omo tava kala, okuva pa omeva noundjuwo noshotuu.

Ashike nande ongaha ihapa hangwa ekandulepo lomukundu tali kalele. Epangelo ola kendabalele oku tunga po omaumbo ngeno mu ye ovanhu ovo hava kala veli moudjuu kefundja ndele eshi ina shi kwafa sha. Vamwe ava va pewa omaumbo, omaumbo avo ovea na ashike inava tembuka ko koubashu.

Vamwe omaumbo omakuma oo va pewa otave a rentingifa po, omanga vamwe oubashu oveva ninga eenhele domalandifilo.

Elelo lodoolopa nalo ola kendabalele ko yoo, li yandje eepolota dipe kwaavo veli molukanda. Ashike vamwe ova ninga ‘ladiwa olo hali nangalwa.’ Hano ovanhu tava tungu poima poo opo pa kufwa mukwao molweyelu.

Ile pamwe ovanhu ohava kala ve udite nawa ngee tava tulwa meetenda hano? Ngeenge hasho, omolwashike hano omunhu ena oku tungila moshana ewetelele mo kutya omoshana ndele omo ashike ta dengele obashu yaye?

Opena eyelulo lili mondjila ngaashi omaumbo opEhenye, osho oshinima shilile. Eeindjiniya pamwe nelelo odo dina oku pewa ombedi. Ashike ovo tava tungile momeva veshi wete ove na epuko linene, nokwa pumbiwa ku ningwe sha opo onghalo yokutungila moyana iha yambididwe nande nande, yo i xulifwe po.

Omalelo eedoolopa nao hapo opo eli. Ohaa kala a mwena momukokomoko wodula aishe, ponhele yokukatuka onghatu, eshi ashike omunhu ta tungu okabashu –manga inaka pwa, manga ashike inava ninga vavali ile vatatu –ye nakutunga ota kanghamekwa meendelelo.
Nokuli ngeenge otashi shiva oveta nai ye mo onyala. Paife ohaku teelelwa ashike ndele ovanhu tava ningi vahapu, ndele tashi djuupalele elelo opo li katutuke onghatu.
Oshipu oku taalela omunhu umwe, shi dulife omangungo.

Oshinima shikwao, omalelo eedoolopa nao okuna omapuko. Ngeenge taa ningi omatokolo nokufaneka eedoolopa, ovanhu ovo veli moubashu, voo iha va tendelwa ko naanaa eenhele dili nawa odo ngeno iha di yelulwa, ohava yukufwa ashike moyana, ile peenhele opo ina di teelelwa ngeno dokukalelela.

Ngee ovanamapya vonhumba tava tembulwa opo va yapukile odoolopa, ito hange nande taku ti, onhele nee oyo oyo kuya oubashu, ndee ovanhu tava tendelwa nawa edu lili meladulafano. Luhapu ohaku lalakanenwa ashike omaumbo ondilo, twafa twa dimbwa kutya oshiwana shetu osha fikama po moolyelye.

Xwepo, ngeenge ovanhu tava tembulwa ku kongwe onhele yokutunga oubashu tava tungwa veli melandulafano, opo naau a hala a tunge eumbo laye li ninge lekuma, ta tungu. Eedoolopa oda yeleka oku kufa oshihopaenenwa kOngwediva. Ongwediva nayo oina olukanda, yoo oina ngoo nayo oyana, ndele shaashi olukanda ola tulwa melandulafano liwa, oubashu otava ende tava ninipala efiku nefiku.

Ovanhu otava tungu omakuma, tava longifa oilongifo yombilixa elelo oleva mangulula.
Eedoolopa dikwao ngaashi Oshakati nOndangwa, nadi kufe ko oshihopaenewa. Olukanda ngaashi olo kwali hali ifanwa Mukwanamba nale, paife oNew Reception, nalo olali ashike lina oshimbwilikita. Apa pena oUnam Engineering, napo opali ashike polukanda kwali hakuti okalukanda koNPF, ashike ovanhu ovo ova tembulwa po ashike, olukanda laMukwanambwa (New Reception) ola tamununwa mo, ndele oubashu vahapu tava ame kombinga imwe. Oshakati nasho ota shi dulu oku ninga ngaha. Ngaashi Ehenye ile Ekuku, ngeno ola ninga ashike olukanda la planingwa nawa, ponhele yokutunga omaumbo oo ovanhu tava nyengwa okufuta.

Omass hausinga ngeno oya tungilwa ngoo ava vena oiyemo yofaafaa, tava dulu okufuta, ndele havaava veli momalukanda, vamwe nokuli ohava xupu shokadila.

LEAVE A REPLY

Please enter your comment!
Please enter your name here