Uufilima waMubiana otawu ka ulikwa paife

0
93

Ku Pinehas Nakaziko

Windhoek – Gumwe gwaa ningi yoofilima dhookino oofupi moNamibia, Leon Mubiana, okwa tsikila oku shi enditha nawa pondje nomeni lyoshilongo.

Mubiana ngoka ti ilongele okuwilika, nokushanga omahokolo goofilima koshiputudhilo shuunkulungu shaAfrica Film Drama Art (AFDA)moCape Town, South Africa, okwa lombwele Kundana kutya uufilima we uyali mboka a thanekela ko AFDA, otawu ka ulikwa moshiwikwe sheuliko lyookino dhaNamibia Olyomakaya ndjika.

Ndjika onkundana ombwaana oku uva, oshoka Mubiana okwa kala noku kondjitha noonkondo ngele tashi ya poshitalenti she. Okwa holola enyanyu lye ta ti, ye okwa pandula noonkondo. Omvalele yo moKatima Mulilo, inayi ilongela ashike uunkulungu mbuka, ashike oye shi thigulula ku he ngoka a li omuhikingalo manga Leon a li omushona lela. Kakele ko ku ninga uufilima, Leon okwa tamekele ashike omuhikingalo manga ena oomvula 12. Okwa li a kwathelwa ku he manga ali omushona, moku shanga okangalo ke kotango mo 1999.

Ohokwe ye yoongalo lela oya tamekele mo 1997 sho ali ha pulakene aahikingalo yopondje yoshilongo, ngaashi 2 Pac, Eminem naD12. Kakele koongalo, Leon okwa li ishewe a hokithwa ookino ku hekulu ngoka ali ashike ha tala okino yaAmerica, Ninja, pamwe nuundenge we.

Noshitalenti she sho a koko, Leon okwa li a tameke okulonga ongomuningi goofilima nomunduluki gwopaunongononi, a longele omahangano ga yoolokathana. Dhimwe po dhomoopoloyeka ndhika ongaahsi okulongela oshiputudhilo shopombanda IUM moku ninga uumbo womayele nomapukululo goosikola. Okwa kala ishewe noku kwathela oku ninga iikulanda ya yoolokathana.

Leon okwa ti ye okwa holokele mehangano lyuufilima oshoka okwa hala oku eta po onkatu ompe mokunduluka iilonga yuunkulungu we ngele tashi ya miinyangadhalwa yomainyanyudho ngaashi oongalo, oshowo iinyandwa.

LEAVE A REPLY

Please enter your comment!
Please enter your name here