Efimbo laMalaria natu li ufe komalombwelo

0
72

Moshifo shimwaina naKundana shoNew Era, shEtitatu loshivike eshi omwa nyolwa kutya ovanhu veli 6500 moitukulwa yokonooli ova kwatwa komukifi woMalaria. Oshifo osha holola vali kutya movanhu ovo omwa kwatelwa ovafi 20, ovo omafyo avo a etwa komukifi oo tuu oo.

Okudja muJanuali moitukulwa yaKavango shokOuninginino naKavango kOushilo omo amuke, omwa monika ovanhu va fika hanga lwopo 4000 va kwatwa komukifi oo, novanhu 13 vaavo va fya ovadja mOitukulwa oyo ivali. Oitukulwa oyo ya shikula ko mouhapu womalaria oshaZambezi omo mwa monika ovanhu 546, nomOhangwena, omo mwa monika ovanhu veli 490, va kwatwa komukifi ou.

Omivalu edi otadi ulike kutya oshilongo otashi yuka kowii ngeenge tashi uya kekeelelo lomukifi ou tau eta nokuli nefyo.

Vali omivalu edi otadi ulike nghene oshilongo sha shuna monima mekondjifo loMalaria oyo yali ya findika netandavelo lali nokuli la shuna pedu neepelesenda 90 momudo 2013.

Omolwa nee ombwili omo oshilongo sha shuna mo, epangelo, okupitila mouministeli wouhaku, ola pumbwa oku kufa ko eenghaku mekondjifo lomukifi oo okupitila momiti, odo tadi lwifa omukifi, okutula oilongifomwa mekeelelo lomukifi peenhele opo tapa dulu oku hangika kukeshe ngaashi peembelewa dookansela nopeefikola nokuninga omaxwaxwameko a kwata moiti oku udifa ko oshiwana, unene okupitila moikundaneki, nomalongo poupangelo vanini. Ihapu yomwaai oya ningwa nale nomolwaasho epangelo la kala ladula okukondjifa omukifi womalaria omido odo da djako.

Eshi nee onghalo yanaipala omudo ou, ovayakuli vouhaku ova pumbwa oku nghonopeka luvali, ile shi dule po opo pwaasho lali la longa po eedula dinya opo li shunife pedu ile nokuli ku kombwe mo omalaria moNamibia.

Oshiwana nee efimbo limwe nasho ohashi wedele ko keindjipalo lomukifi, nande epangelo otali longo oilonga yalo.

Omudo 2008 fiyo 2011 eshi onooli yali hai hangwa kefundja ngaashi naanaa eli loneudo, epangelo olali hali longo noudiinini, oku fya oshisho kutya ovo va pumbwa eenete deemwe ovedi pewa. Ashike ponhele yokulongifa eenete odo osho da nuninwa, ovakwashiwana odo vakala tava longifa okukwata eeshi moyana.

Shimwe vali, oshiwana otashi tokelwa peendingosho po kape na eameno okulikeelela keemwe. Omunhu eshi ta di oko ye, okwa lika keemwe, ye mwene, eshi taka nangala shaashi okuli koshi yodungo kena eenghono dokuli tuvika, ndee eemwe ngheengo nee da ninga okavilo kado oufiku aushe. Umwe ngeenge okuna okaana, nako ohaka ka nangala naanaa monghalo oyo mu na ina.

Shimwe oumbodo ngoo ou woovenevene, omunhu a kalelwa ashike ketenhe lomeva ile kofuka yo mwiidi ndele kena efimbo lokuli fufila ile okukunghula omwiidi.

Shikwao vali, oshiwana shetu oshina ovanhu veli ninga vehe na ko nasha. Ngeenge ouministeli wouhaku tau ningi oikonga, vamwe koyoongalela ihava i ko. Nande omunhu oku kale ngoo ehena eshi ta ningi, koshikonga ita i ko.

Ngeenge ope na exwaxwameko tali ningilwa moifo, omunhu ngee okwa mono pepandja pena oshihako shOuministeli wOuhaku, oto mono omunhu ta nhuka po pepandja opo, ita tale kutya oshike naanaa sha shangwa po. Mongula eshi onghalo tai naipala, ye omunhu ota pe epangelo oushima. Hano oshiwana nashi shakeneke epangelo odjilakati mekondjifo lomalaria.

LEAVE A REPLY

Please enter your comment!
Please enter your name here