FCTS a gandja omakwatho kaalongwa mOnyaanya

0
109

KuMaria Namupala

ONYAANYA – Aalongwa omulongo nayatano ya za moosikola dha yooloka moshikandjolongo Onyaanya oya pewa omakwatho nomayambidhidho kehangano lyoFirst Capital Treasury Solutions, oshiwike sha yi pOnyaanya.

Pethimbo ta gandja omagano ngoka kaalongwa mbaka omunambelewa omukuluntu gwehangano ndika Maria Nakale, okwa ti oya kala haya gandja omakwatho gopalongo koosikola ndhoka dhili moshikandjolongo shika uule womimvo ne (4) ngaashingeyi.

Nakale ta ti oya gandja oshimaliwa shooN$15 000.00 kaanaskola 15, mono kehe omulongwa ta mono oshimaliwa shooN$700.00 opo yi ikwathele moompumbwe dhe, dhesiku kehe. Aanaskola mboka ya nuninwa omakwatho ngaka nayo opo yali pethimbo, sho ngaka taga gandjwa.

First Capital Treasury Solutions ehangano hali gandja omayakulo gopaliko, ngaashi okugandja omikuli kaanashilonga ya vule okutunga omagumbo gawo, olya totwa po mo 2009 mewiliko lya Martin Mwinga.

Nakale ta ti gamwe gomomalalakano gawo okugandja omakwatho moshigwana shoka hashi ya yambidhidha olundji. “Olundji aayambidhidhi yetu aalongi, notu na elalakano opo tu pungule maalongwa yetu mboka oyo aaleli yokomongula, otu na einekelo kutya omayambidhidho ngaka otaga ti sha moshigwana,” ta ti ngaaka.

Yamwe yomaalongwa mboka ya pewa oshimaliwa shoka oya za koosikola ngaashi Iipopo, Amakali, Epumbu, Okahanya, Okwandja, Uukule nosho wo dhilwe. Aalongi pomanongelo ngoka oya li ya pewa oshinakugwanithwa opo ya tothemo aanona mboka yeli monkalo tayi nyengathana no ya pumbwa eyambidhidho.

Nakale ta ti oshimaliwa shoka ya gandja otashi ka kwathela okulanda omizalo dhoskola dhaanona mboka, osho wo iipumbiwa yilwe. Yamwe yomaanona mboka ka ye na aakuluntu yawo, yo yamwe aakuluntu otaya nyengwa okuya gwanithila po oompumbwe dhawo adhihe.

Ta gwedha po kutya ehangano lyawo ota li kambadhala li kongele aanona omakwatho mpoka tali vulu, yo yambidhidhe oshigwana shoka tashi nana nuudhigu. “Konima sho ehangano lyetu lya totwa po otwa kwathela iikondo oyindji mono mwa kwatelwa noosikola miitopolwa ya yooloka moshilongo,” Nakale ta ti.

Okwa ti oya tota po opoloyeka onomenawina nelalakano lyokugandja sha moshigwana, sho shi kale aluhe sha nongela kutya ope na aasamalia aanamutimahenda ye yana komitima. Okwa uvaneke kutya shika hasho tashi kala oshikando shawo sha hugunina ndele otaya tsikile okugandja omakwatho moshigwana. Omasiku ga ziko ehangano olya li lya gandja omakwatho giikwathitholongo koosikola dhomoshitopolwa shaMusati.

LEAVE A REPLY

Please enter your comment!
Please enter your name here