Hamukoto ota hepekwa koombepo dha nyata

0
3737

KuMaria Namupala

ELOOLO – Omukiintu gomimvo 48 ota kongo ekwatho moshigwana, omolwomahepeko gokolutu nogopamadhiladhilo ngoka ta ningilwa koombepo dha nyata.

Olivia Hamukoto omukalimo gomOnheleiwa mEeloolo okwa holola uudhigu we, ta ti okuli meshongo enene, sho ihaa kotha we uusiku nomutenya omolwomahepeko ngoka ta ningilwa.

“Ondi na uupyakadhi wolutu lwandje talu pi owala ndaashi kutya otalu fikwa koshike, ngele ndi li megumbo ohandi mono omizizimba dha landula ndje, ngame shampa nda kwata oshinima megumbo otashi tika owala,” ta ti ngaaka.

Okwa pula moshigwana kehe ngoka ta vulu okumukwathela moshinima shika tashi hepeke omadhiladhilo ge a kale emu yambidhidha, ye a tale kutya tashi hulile peni, ta ti uupyakadhi mbuka owe mu tameke konima yoomvula ne dha piti manga a li koSwakopmund.

Sho a mono olutu lwe talu pi lwo itaalu lunguna po okwa tokola opo a tembukile kOwambo kuyina, hono oko eli sigo ongaashingeyi, ta ti okwa kambadhala okuya kiipangelo sho olutu lwe talu monika lwafa lwa tsa ihe ina mona ekwatho tali mu aludha.

“Onkalo ndjika oya nyenga ndje oondunge, no kandi shi we shoka ndina okuninga molwaashoka ndu umbile nda mana po, ihe ondili owala muupyakadhi sigo onena onkene , otandi pula moshigwana kehe ngoka eshi shoka tandi vulu okuninga opo uuwehame nuuvu mbuka ta wu hepeke omwenyo gwandje wa adhe ehulilo a kwathe ndje,”Hamukoto a indile.

Ta gwedha po kutya okwa kambadhala okukonga omakwatho mpaka naampeyaka, ashike uuvu mboka owu uka komeho, a ti oshinima shoka osha tamekele owala sha fa shopakathimbo nosheende tashi koko.

Hamukoto ota ti ngaashingeyi iha vulu okulonga sha we.
Uuna olutu lwe lwa tameke okupya oha kala owala anuwa afa a tema omulilo molutu lwe go tagu ihanene olutu lwe aluhe ndoka talu monika lwa luudha ngashingeyi.

Okwa gwedha po kutya omasiku gamwe oha kala ewete iiluli tayi mu lombwele iinima keeyi shi, ye ngele ta lala oha kala owala e wete a landulwa komuntu ta ti ina kotha, shampa a zi mo mondunda omizizimba ohadhi kala odhindji tadhi mu ngwangwaneke.

LEAVE A REPLY

Please enter your comment!
Please enter your name here